മിക്ക വിദ്യാർത്ഥികൾക്കും നീറ്റ് (NEET) പരീക്ഷ വിജയിക്കുക എന്നത് മാസങ്ങളുടെ കഠിനാധ്വാനവും സമർപ്പണവും ആവശ്യമുള്ള വലിയ ദൗത്യമാണ്. എന്നാൽ പതിനെട്ടുകാരിയായ സൃഷ്ടി ദുബെയ്ക്ക് ഈ പരീക്ഷ എഴുതുക എന്നത് എല്ലാ പ്രതികൂല സാഹചര്യങ്ങളോടുമുള്ള ഒരു പോരാട്ടമായിരുന്നു.
നീറ്റ് യുജി 2026 പരീക്ഷയ്ക്ക് വെറും ഒരാഴ്ച മാത്രം ബാക്കിയുള്ളപ്പോഴാണ് സൃഷ്ടിക്ക് നേരെ അമിതവേഗതയിൽ വന്ന ഒരു കാർ ഇടിക്കുന്നത്. അപകടത്തിൽ കുട്ടിയുടെ ഒമ്പത് വാരിയെല്ലുകൾ തകരുകയും ശ്വാസകോശത്തിന് ഗുരുതരമായി പരിക്കേൽക്കുകയും ചെയ്തു. എന്നാൽ ജൂൺ 21-ന്, ഡോക്ടർമാരുടെയും മെഡിക്കൽ ജീവനക്കാരുടെയും പിന്തുണയോടെയും, നാഷണൽ ടെസ്റ്റിംഗ് ഏജൻസി (NTA) ചെയ്ത പ്രത്യേക ക്രമീകരണങ്ങളോടെയും അവൾ രാജ്യത്തെ ഏറ്റവും വലിയ മെഡിക്കൽ പ്രവേശന പരീക്ഷ എഴുതാൻ പരീക്ഷാ കേന്ദ്രത്തിലെത്തി.
ഈ വർഷത്തെ നീറ്റ് പരീക്ഷയിലെ ഏറ്റവും പ്രചോദനാത്മകമായ നിമിഷങ്ങളിൽ ഒന്നായി ഈ പെൺകുട്ടിയുടെ കഥ മാറിയിരിക്കുകയാണ്. ജൂൺ 14-നുണ്ടായ ആ വലിയ റോഡ് അപകടത്തോടെയാണ് സൃഷ്ടിയുടെ ദുരിതങ്ങൾ ആരംഭിക്കുന്നത്. ഒമ്പത് വാരിയെല്ലുകൾ തകരുകയും ശ്വാസകോശത്തിന് ഗുരുതരമായ പരിക്കേൽക്കുകയും ചെയ്തതിനെ തുടർന്ന് അവൾക്ക് വലിയൊരു രക്തക്കുഴൽ ശസ്ത്രക്രിയയ്ക്ക് വിധേയയാകേണ്ടി വന്നു. നില ഗുരുതരമായിരുന്നതിനാൽ കുറച്ചുദിവസം വെന്റിലേറ്ററിന്റെ സഹായത്തോടെയാണ് ജീവൻ നിലനിർത്തിയത്.
പിന്നീട് നില അല്പം മെച്ചപ്പെട്ടതിനെ തുടർന്ന് വെന്റിലേറ്റർ കുഴലുകൾ മാറ്റിയെങ്കിലും അവൾ ശാരീരികമായി അതീവ ദുർബലയായിരുന്നു. കൃത്യമായി ശ്വാസമെടുക്കാൻ പോലും ബുദ്ധിമുട്ടിയ അവൾക്ക് ഓക്സിജൻ സഹായം ആവശ്യമായിരുന്നു. എന്നാൽ ഈ പ്രതിസന്ധികൾക്കിടയിലും നീറ്റ് പരീക്ഷ എഴുതണമെന്ന കാര്യത്തിൽ അവൾ ഉറച്ചുനിന്നു.
മകളുടെ ദൃഢനിശ്ചയം മനസ്സിലാക്കിയ സൃഷ്ടിയുടെ പിതാവ് നാഷണൽ ടെസ്റ്റിംഗ് ഏജൻസിയെ സമീപിച്ച് അവളുടെ ആരോഗ്യസ്ഥിതിയെക്കുറിച്ച് ഉദ്യോഗസ്ഥരെ അറിയിച്ചു. മകൾക്ക് സുരക്ഷിതമായി പരീക്ഷ എഴുതാൻ ആവശ്യമായ സഹായം നൽകണമെന്ന് അദ്ദേഹം അഭ്യർത്ഥിച്ചു. ഐഎൽഎസ് (ILS) ആശുപത്രിയിലെ ഡോക്ടർമാരും മെഡിക്കൽ സംഘവും ആവശ്യമായ പിന്തുണ നൽകുമെന്നും പരീക്ഷാ കേന്ദ്രത്തിന്റെ താഴത്തെ നിലയിൽ അവളുടെ ശാരീരികാവസ്ഥയ്ക്ക് അനുയോജ്യമായ മേശയും കസേരയും അടങ്ങുന്ന പ്രത്യേക ഇരിപ്പിടം ഒരുക്കണമെന്നും അദ്ദേഹം ഏജൻസിയോട് ആവശ്യപ്പെട്ടു. ധാക്കൂർയയിലെ ബിനോദിനി ഗേൾസ് ഹൈസ്‌കൂളിലായിരുന്നു സൃഷ്ടിക്ക് പരീക്ഷാ കേന്ദ്രം അനുവദിച്ചിരുന്നത്.
അപേക്ഷ പരിശോധിച്ച എൻടിഎ, കുട്ടിയുടെ ആരോഗ്യപരമായ ആവശ്യങ്ങളിൽ യാതൊരു വിട്ടുവീഴ്ചയും വരുത്താതെ പരീക്ഷ എഴുതാൻ സാധിക്കുന്ന തരത്തിൽ പ്രത്യേക ക്രമീകരണങ്ങൾ ഏകോപിപ്പിച്ചു. പരീക്ഷാ കേന്ദ്രത്തിൽ അവൾക്കായി ഒരു പ്രത്യേക മുറി അനുവദിച്ചു. അടിയന്തര സാഹചര്യങ്ങൾ നേരിടാൻ മെഡിക്കൽ സംഘത്തെ അവിടെ നിയോഗിക്കുകയും പരീക്ഷാ സമയം മുഴുവൻ പരീക്ഷാ കേന്ദ്രത്തിന് പുറത്ത് ഒരു ആംബുലൻസ് സജ്ജമാക്കി നിർത്തുകയും ചെയ്തു. പരിക്കുകളുടെ വേദനയിലും സൃഷ്ടിക്ക് പരീക്ഷയിൽ ശ്രദ്ധ കേന്ദ്രീകരിക്കാൻ കഴിയുന്ന തരത്തിലുള്ള എല്ലാ പിന്തുണയും അധികൃതർ ഉറപ്പാക്കി. ഒന്നിലധികം ഒടിവുകൾ സംഭവിക്കുകയും ശസ്ത്രക്രിയയ്ക്ക് വിധേയയാവുകയും ഓക്സിജൻ സഹായത്തോടെ കഴിയേണ്ടി വരികയും ചെയ്തിട്ടും പരീക്ഷ എഴുതാനുള്ള വിദ്യാർത്ഥിനിയുടെ ആത്മവിശ്വാസത്തെ എൻടിഎ പ്രസ്താവനയിലൂടെ അഭിനന്ദിച്ചു.
പരീക്ഷാ ദിവസം കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ സൃഷ്ടിയുടെ കുടുംബത്തെ ഫോണിൽ വിളിച്ചു സംസാരിച്ചു. അവളുടെ മാതാപിതാക്കളോട് ആരോഗ്യവിവരങ്ങൾ അന്വേഷിച്ച അദ്ദേഹം പരീക്ഷയ്ക്കായി ചെയ്തിട്ടുള്ള ക്രമീകരണങ്ങളെക്കുറിച്ചും ചോദിച്ചറിഞ്ഞു. തങ്ങളുടെ അപേക്ഷയോട് ഉടനടി പ്രതികരിക്കുകയും ഇത്തരം ആരോഗ്യപ്രശ്നങ്ങൾക്കിടയിലും മകൾക്ക് പരീക്ഷ എഴുതാൻ അവസരമൊരുക്കുകയും ചെയ്തതിന് വിദ്യാഭ്യാസ മന്ത്രാലയത്തോടും എൻടിഎയോടും മാതാപിതാക്കൾ നന്ദി അറിയിച്ചു.
