ഷാദോൾ (മധ്യപ്രദേശ്): മധ്യപ്രദേശിലെ ഷാദോളിൽ കാമുകി വിവാഹ അഭ്യർത്ഥന നിരസിച്ചതിനെ തുടർന്ന് 19 വയസ്സുകാരൻ ബുധനാഴ്ച ‘ഹൈ വോൾട്ടേജ് സിനിമാറ്റിക്’ നാടകീയ രംഗം സൃഷ്ടിച്ചു. 33 കെ.വി. വൈദ്യുതി ടവറിൽ കയറിയ ഇയാൾ, കാമുകി ഫോൺ കോളുകൾ എടുക്കുന്നത് നിർത്തിയതിലുള്ള വിഷമത്തില് തന്റെ ദുഃഖകരമായ പ്രണയകഥ വിളിച്ചുപറഞ്ഞു.
സന്തോഷ് സാകേത് എന്നാണ് ഈ യുവാവിന്റെ പേര്. ദേവ്ലാന്ദ് ഏരിയയിലെ ടവറിന്റെ മൂന്നാം ലെവലിൽ കയറിയ ഇയാൾ ജീവിതം അവസാനിപ്പിക്കുമെന്ന് ഭീഷണിപ്പെടുത്തി. പെൺകുട്ടിയുടെ കുടുംബം വിവാഹാലോചന നിരസിച്ചതിലാണ് സന്തോഷ് ഇതിനു മുതിര്ന്നതെന്നാണ് പറയപ്പെടുന്നത്.
ഏകദേശം 3 മണിക്കൂറോളം ഇയാൾ പ്രശസ്തമായ ‘ഷോലെ’ സിനിമയിലെ വീരുവിനെപ്പോലെ നാടകീയമായി സംസാരിക്കുകയായിരുന്നു.
പ്രദേശവാസികളും പോലീസും താഴെയിറങ്ങാൻ ഇയാളെ പറഞ്ഞ് മനസ്സിലാക്കാൻ ശ്രമിച്ചെങ്കിലും യുവാവ് കൂട്ടാക്കിയില്ല.
വനിതാ കോൺസ്റ്റബിളിനെക്കൊണ്ട് ഫോണിൽ സംസാരിപ്പിച്ചു!
പോലീസ് ഒരു തന്ത്രപരമായ നീക്കം നടത്തി, സന്തോഷിന്റെ കാമുകിയാണെന്ന് നടിച്ച് ഒരു വനിതാ കോൺസ്റ്റബിളിനെക്കൊണ്ട് ഫോണിൽ സംസാരിക്കാൻ ഏർപ്പാടാക്കി. താൻ വിവാഹത്തിന് തയ്യാറാണെന്ന് അവർ അവന് ഉറപ്പ് നൽകി. ഇത് കേട്ടതിനുശേഷം മാത്രമാണ് സന്തോഷ് സുരക്ഷിതമായി താഴെയിറങ്ങാൻ സമ്മതിച്ചത്.
മൂന്ന് മണിക്കൂർ നീണ്ട ശ്രമത്തിനൊടുവിൽ പോലീസ് യുവാവിനെ വിജയകരമായി രക്ഷപ്പെടുത്തി. പോലീസിന്റെ കൃത്യസമയത്തുള്ളതും തന്ത്രപരവുമായ ഇടപെടൽ യുവാവിന്റെ ജീവൻ രക്ഷിക്കാൻ സഹായിച്ചു.
