അര്‍ധരാത്രിയില്‍ കാമുകിയെ കാണാനെത്തിയ 18-കാരനെ പെണ്‍കുട്ടിയുടെ പിതാവ് വെടിവെച്ച് കൊന്നു. ഉത്തര്‍പ്രദേശിലെ ഇട്ടാവ ജില്ലയിലെ ഖേദഹേലു ഗ്രാമത്തിലാണ് ദാരുണസംഭവം. ഔരയ്യ സ്വദേശിയും ഖേദഹേലുവില്‍ സ്വദേശിയുമായ ലവ്കുശ് ആണ് വെടിയേറ്റ് കൊല്ലപ്പെട്ടത്. കേസില്‍ ലവ്കുശിന്റെ കാമുകിയുടെ പിതാവ് അനില്‍കുമാറിനെ പോലീസ് കസ്റ്റഡിയിലെടുത്തു.
ഖേദഹേലു ഗ്രാമത്തില്‍ തന്റെ സഹോദരിക്കൊപ്പമായിരുന്നു ലവ്കുശ് താമസിച്ചിരുന്നത്. ഇതിനിടെയാണ് അനില്‍കുമാറിന്റെ മകളുമായി അടുപ്പത്തിലായത്. തിങ്കളാഴ്ച രാത്രി കാമുകിയെ കാണാന്‍ യുവാവ് അനില്‍കുമാറിന്റെ വീട്ടിലെത്തി. വീട്ടിനുള്ളില്‍ കടക്കാനുള്ള ശ്രമത്തിനിടെയാണ് യുവാവിനെ അനില്‍കുമാര്‍ വെടിവെച്ച് കൊലപ്പെടുത്തിയത്.
വെടിയൊച്ചകേട്ട് അയല്‍ക്കാര്‍ ഓടിയെത്തിയപ്പോള്‍ അനില്‍കുമാറിന്റെ വീടിന് സമീപം ചോരയില്‍കുളിച്ചനിലയിലാണ് ലവ്കുശിനെ കണ്ടത്. ഇതോടെ നാട്ടുകാര്‍ പോലീസിനെ വിവരമറിയിക്കുകയായിരുന്നു. സംഭവത്തില്‍ അനില്‍കുമാറിനെ കസ്റ്റഡിയിലെടുത്തതായും ഇയാളില്‍നിന്ന് തോക്ക് പിടിച്ചെടുത്തതായും പോലീസ് പറഞ്ഞു.
