ഹരിദ്വാറിലെ ഏറ്റവും കൂടുതൽ തീർത്ഥാടകർ എത്തുന്ന ഘാട്ടായ ഹർ കി പൗരിയിലേക്കുള്ള എല്ലാ പ്രവേശന കവാടങ്ങളിലും ‘ഹിന്ദുക്കളല്ലാത്തവർക്ക് പ്രവേശനം നിഷിദ്ധം’ എന്നറിയിക്കുന്ന പുതിയ ബോർഡുകൾ സ്ഥാപിച്ചു. 1916-ലെ മുനിസിപ്പൽ ബൈലോ (ഉപനിയമം) നിയമപരമായ അടിസ്ഥാനമായി ചൂണ്ടിക്കാട്ടിയാണ് ഈ ബോർഡുകൾ സ്ഥാപിച്ചിരിക്കുന്നത്.
ഹർ കി പൗരിയുടെ മതപരവും ഭരണപരവുമായ കാര്യങ്ങൾ നിയന്ത്രിക്കുന്ന ‘ശ്രീ ഗംഗാ സഭ’യാണ് ഈ ബോർഡുകൾ സ്ഥാപിച്ചത്. 1916-ലെ ഹരിദ്വാർ മുനിസിപ്പൽ ആക്ട് പ്രകാരം ഹർ കി പൗരി പ്രദേശത്ത് ഹിന്ദുക്കളല്ലാത്തവർ പ്രവേശിക്കുന്നത് നിയമപരമായി തടഞ്ഞിട്ടുണ്ടെന്ന് സംഘടന അവകാശപ്പെടുന്നു.
ഹരിദ്വാറിന്റെ ആത്മീയ ഹൃദയമായി കണക്കാക്കപ്പെടുന്ന ഹർ കി പൗരിയിൽ ഗംഗാസ്നാനത്തിനായി ദിനംപ്രതി ആയിരക്കണക്കിന് തീർത്ഥാടകരാണ് എത്തുന്നത്. ഈ നിരോധനം പരസ്യമായി പ്രദർശിപ്പിക്കാനുള്ള തീരുമാനം, കൊളോണിയൽ കാലഘട്ടത്തിലെ ഉപനിയമങ്ങൾക്ക് നിലവിലെ ഭരണസംവിധാനത്തിലുള്ള നിയമസാധുതയെയും പ്രസക്തിയെയും കുറിച്ച് ചോദ്യങ്ങൾ ഉയർത്തിയിട്ടുണ്ട്.
ഈ നടപടിക്കെതിരെ സമാജ്വാദി പാർട്ടി ദേശീയ വക്താവ് ഫക്രുൽ ഹസൻ ചാന്ദ് രംഗത്തെത്തി. ബി.ജെ.പിയും അനുബന്ധ സംഘടനകളും ഭിന്നിപ്പുണ്ടാക്കാൻ ശ്രമിക്കുകയാണെന്ന് അദ്ദേഹം കുറ്റപ്പെടുത്തി. ഇത്തരം നീക്കങ്ങൾ ഹിന്ദു, മുസ്ലിം, സിഖ്, ക്രിസ്ത്യൻ, ബുദ്ധ, ജൈന മതവിഭാഗങ്ങൾക്കിടയിലുള്ള ഐക്യത്തെ തകർക്കുമെന്നും, ബി.ജെ.പി അധികാരത്തിൽ വന്നതിന് ശേഷം ഉത്സവങ്ങൾ പോലും തർക്കവിഷയങ്ങളായി മാറിയെന്നും അദ്ദേഹം പറഞ്ഞു.
“എന്തുകൊണ്ടാണ് ബി.ജെ.പിയും അവരുടെ അനുബന്ധ സംഘടനകളും ജനങ്ങൾ ഒരുമിച്ച് ആഘോഷങ്ങൾ നടത്തുന്നതിനെയോ ഐക്യത്തോടെ കഴിയുന്നതിനെയോ ഭയപ്പെടുന്നത് എന്നതാണ് യഥാർത്ഥ ചോദ്യം. ഇത് വോട്ട് ബാങ്ക് രാഷ്ട്രീയത്തിന്റെ ഭാഗമാണ്, രാജ്യം മുഴുവൻ ഇത് തിരിച്ചറിയുന്നുണ്ട്,” അദ്ദേഹം കൂട്ടിച്ചേർത്തു.
എന്നാൽ, പണ്ഡിറ്റ് മദൻ മോഹൻ മാളവ്യ സ്ഥാപിച്ച ശ്രീ ഗംഗാ സഭ ഈ തീരുമാനത്തെ ന്യായീകരിച്ചു. പുതിയ നിയന്ത്രണങ്ങൾ ഏർപ്പെടുത്തുകയല്ല, മറിച്ച് നിലവിലുള്ള നിയമങ്ങളെക്കുറിച്ച് വ്യക്തത നൽകുകയാണ് ചെയ്തതെന്ന് ഗംഗാ സഭ അധ്യക്ഷൻ നിതിൻ ഗൗതം ദൈനിക് ഭാസ്കറിനോട് പറഞ്ഞു. “ഏത് പ്രദേശത്താണ് ഏത് നിയമമാണ് ബാധകമെന്ന് അറിഞ്ഞിരിക്കേണ്ടത് ഓരോ വ്യക്തിയുടെയും ഉത്തരവാദിത്തമാണ്,” അദ്ദേഹം പറഞ്ഞു. ഹർ കി പൗരിയിലെ നിയമങ്ങളെക്കുറിച്ചുള്ള ആശയക്കുഴപ്പം നീക്കാനാണ് ബോർഡുകൾ സ്ഥാപിച്ചതെന്നും അദ്ദേഹം കൂട്ടിച്ചേർത്തു.
വിവാദത്തിന് പിന്നിലെ കൊളോണിയൽ വേരുകൾ
ദി ന്യൂ ഇന്ത്യൻ എക്സ്പ്രസ് റിപ്പോർട്ട് പ്രകാരം, 1916-ലെ ഈ മുനിസിപ്പൽ ബൈലോകൾ പണ്ഡിറ്റ് മാളവ്യയും ബ്രിട്ടീഷ് കൊളോണിയൽ ഭരണകൂടവും തമ്മിലുണ്ടാക്കിയ കരാറിൽ നിന്നാണ് ഉടലെടുത്തത്. ഹരിദ്വാറിന്റെ മതപരമായ പവിത്രതയും സാംസ്കാരിക തനിമയും സംരക്ഷിക്കുക എന്നതായിരുന്നു അക്കാലത്തെ ലക്ഷ്യം.
ഈ ചരിത്രപരമായ വ്യവസ്ഥകൾ അനുസരിച്ച്, ഹർ കി പൗരി ഉൾപ്പെടെയുള്ള പ്രധാന ഘാട്ടുകളിൽ ഹിന്ദുക്കളല്ലാത്തവർ പ്രവേശിക്കുന്നത് തടഞ്ഞിരുന്നു. കൂടാതെ നഗരത്തിന്റെ ചില ഭാഗങ്ങളിൽ സ്ഥിരതാമസമാക്കുന്നതിനും ഇവർക്ക് നിയന്ത്രണമുണ്ടായിരുന്നു.
ഹരിദ്വാർ മുനിസിപ്പൽ കോർപ്പറേഷന്റെ നിലവിലെ ബൈലോകളുടെ ഭാഗമായി ഈ വ്യവസ്ഥകൾ ഇന്നും തുടരുന്നുണ്ടെന്നാണ് ഗംഗാ സഭയുടെ വാദം. ഈ നിയമങ്ങൾ കർശനമായി നടപ്പിലാക്കണമെന്നും ഘാട്ടുകൾക്ക് സമീപം ഹിന്ദുക്കളല്ലാത്തവർ നടത്തുന്ന വാണിജ്യ പ്രവർത്തനങ്ങൾ തടയണമെന്നും സാധുക്കളും പ്രാദേശിക പുരോഹിതരും വർഷങ്ങളായി ആവശ്യപ്പെടുന്നുണ്ട്.
ഈ നിയന്ത്രണങ്ങൾ ഹർ കി പൗരിയിൽ മാത്രം ഒതുക്കരുതെന്നും ഹരിദ്വാറിലെ മറ്റ് പ്രധാന ഘാട്ടുകളിലേക്കും വ്യാപിപ്പിക്കണമെന്നും സംഘടന ആവശ്യപ്പെടുന്നു. ഹരിദ്വാറിൽ ഗംഗാതീരത്തായി ഏകദേശം 72 ഘാട്ടുകളുണ്ട്.
ജാഗ്രതയോടെ ഭരണകൂടം
വിഷയത്തിൽ ജില്ലാ ഭരണകൂടം വളരെ ജാഗ്രതയോടെയുള്ള നിലപാടാണ് സ്വീകരിക്കുന്നത്. ഹർ കി പൗരിയിൽ പ്രവേശന നിയന്ത്രണം ഏർപ്പെടുത്തുന്നതിനായി ഭരണകൂടത്തിന്റെ ഭാഗത്തുനിന്ന് പുതിയ ഉത്തരവുകളൊന്നും പുറപ്പെടുവിച്ചിട്ടില്ലെന്ന് ഒരു മുതിർന്ന ഉദ്യോഗസ്ഥൻ ടൈംസ് ഓഫ് ഇന്ത്യയോട് പറഞ്ഞു. മുനിസിപ്പൽ ബൈലോകൾ നടപ്പിലാക്കേണ്ടത് നഗരസഭാ അധികൃതരും പോലീസുമാണെന്നും, ഏതൊരു നടപടിയും നിലവിലുള്ള നിയമങ്ങൾക്കനുസൃതമായിരിക്കണമെന്നും അദ്ദേഹം വ്യക്തമാക്കി.
