ഗൂഗിൾ തങ്ങളുടെ ജെമിനി ഇമേജ് എഡിറ്റിംഗ് ടൂളിന് ‘നാനോ ബനാന’ എന്ന് പേരിട്ടത് എന്തുകൊണ്ടാണെന്ന് എപ്പോഴെങ്കിലും ചിന്തിച്ചിട്ടുണ്ടോ? ഗൂഗിൾ ഡീപ്മൈൻഡിലെ പ്രൊഡക്റ്റ് മാനേജറായ നൈന റൈസിംഗാനി പുലർച്ചെ 2:30-ന് എടുത്ത ഒരു തീരുമാനമായിരുന്നു അത്. നാനോ ബനാനയ്ക്ക് ആ പേര് ലഭിച്ചതിനെക്കുറിച്ചുള്ള നൈനയുടെ കഥ ഇപ്പോൾ ഇന്റർനെറ്റിൽ തരംഗമാവുകയാണ്. വിചിത്രമായ ഒരു പേര് എന്നതിലുപരി, നൈനയുടെ പെട്ടെന്നുള്ള തീരുമാനവും സ്വന്തം ജീവിതത്തിലെ ചില തമാശകളുമാണ് ഇതിനെ ശ്രദ്ധേയമാക്കുന്നത്.
സാങ്കേതികമായി ‘Gemini 2.5 Flash Image’ എന്ന് വിളിക്കപ്പെടുന്ന മോഡലിന് ഈ വ്യത്യസ്തമായ പേര് എങ്ങനെ വന്നു എന്ന് നൈന വിവരിക്കുന്നു. കഴിഞ്ഞ ഓഗസ്റ്റ് മാസത്തിൽ, റിലീസ് ചെയ്യാത്ത ഈ മോഡൽ പരിശോധനയ്ക്കായി ‘LMArena’ എന്ന പ്ലാറ്റ്ഫോമിൽ രഹസ്യമായി സമർപ്പിക്കേണ്ടി വന്നു. സാങ്കേതികമായ പേരുകൾക്ക് പകരം മറ്റെന്തെങ്കിലും പേര് വേണമെന്ന ചർച്ചകൾ പുലർച്ചെ വരെ നീണ്ടുപോയി.
“അവസാന നിമിഷം വരെ ഞങ്ങൾ ആ പേരിനെക്കുറിച്ചുള്ള ചർച്ചകൾ നീട്ടിവെച്ചു,” നൈന തന്റെ ബ്ലോഗിൽ കുറിച്ചു. “പുലർച്ചെ 2:30-ന് സഹപ്രവർത്തകൻ പേര് ചോദിച്ചപ്പോൾ, ‘നാനോ ബനാന’ (Nano Banana) പോലുള്ള രസകരമായ എന്തെങ്കിലും പേര് ഇട്ടാലോ എന്ന് ഞാൻ ചോദിച്ചു. ‘ശരി, ഇതിന് വലിയ അർത്ഥമൊന്നുമില്ലല്ലോ’ എന്ന് പറഞ്ഞ് അവർ അത് ഉടൻ അംഗീകരിച്ചു.”
പേരിന് പിന്നിലെ രഹസ്യം ഈ പേര് വെറുതെ ഉണ്ടായതല്ല. തന്റെ സുഹൃത്തുക്കൾ വിളിക്കുന്ന വിളിപ്പേരുകൾ കൂട്ടിച്ചേർത്താണ് നൈന ഈ പേര് കണ്ടെത്തിയത്. “ചില സുഹൃത്തുക്കൾ എന്നെ ‘നൈന ബനാന’ എന്ന് വിളിക്കും. ഉയരം കുറവായതിനാലും കമ്പ്യൂട്ടറുകളോടുള്ള താൽപ്പര്യം കാരണവും മറ്റു ചിലർ ‘നാനോ’ എന്നും വിളിക്കാറുണ്ട്. ഞാൻ ആ രണ്ട് പേരുകളും കൂട്ടിമുട്ടിച്ചു,” നൈന പറഞ്ഞു. ഒരു ‘ഫ്ലാഷ്’ മോഡലായതിനാൽ ആ പേര് അതിന് അനുയോജ്യമായി തോന്നി.
പരിശോധനയ്ക്കായി ആഭ്യന്തരമായി ഉപയോഗിച്ച ഈ പേര്, ഓഗസ്റ്റ് അവസാനത്തോടെ ജെമിനി ആപ്പിലും മറ്റ് സേവനങ്ങളിലും ഔദ്യോഗികമായി എത്തിയതോടെ വലിയ ഹിറ്റായി മാറി.
ആഗോളതലത്തിൽ ശ്രദ്ധേയമായ വിജയം ചിത്രങ്ങൾ കൃത്യതയോടെ നിർമ്മിക്കാനും എഡിറ്റ് ചെയ്യാനും ടെക്സ്റ്റുകൾ മനോഹരമായി ഉൾപ്പെടുത്താനുമുള്ള ഈ മോഡലിന്റെ കഴിവിനെ ഉപയോക്താക്കൾ പ്രശംസിച്ചു. അതിനൊപ്പം ‘നാനോ ബനാന’ എന്ന രസകരമായ പേരും ഇതിന്റെ സ്വീകാര്യത വർദ്ധിപ്പിച്ചു.
തായ്ലൻഡിലെ 3D ഫിഗറിൻ സ്റ്റൈൽ ചിത്രങ്ങൾ മുതൽ ഇന്ത്യയിലെ സാരി തീമിലുള്ള എഡിറ്റുകൾ വരെ ലോകമെമ്പാടും ട്രെൻഡായി മാറി. ഇതോടെ ലോകത്തിലെ ഏറ്റവും മികച്ച ഇമേജ് എഡിറ്റിംഗ് മോഡലുകളിൽ ഒന്നായി ഇത് മാറി. ഗൂഗിളും ഈ തമാശ ഏറ്റെടുത്തു; ജെമിനി ആപ്പിൽ ബനാന ഇമോജികളും എഐ സ്റ്റുഡിയോയിൽ മഞ്ഞ നിറത്തിലുള്ള ബട്ടണുകളും ടീം അംഗങ്ങൾക്ക് ബനാന തീമിലുള്ള സമ്മാനങ്ങളും നൽകി അവർ ഇത് ആഘോഷിച്ചു.
ആദ്യ ദിവസം തന്നെ ഡെവലപ്പർമാർക്കും സാധാരണ ഉപയോക്താക്കൾക്കും ഒരുപോലെ ലോകമെമ്പാടും ഈ സേവനം ലഭ്യമാക്കിയതാണ് ഇതിന്റെ വിജയത്തിന് പിന്നിലെ പ്രധാന കാരണങ്ങളിലൊന്നെന്ന് നൈന റൈസിംഗാനി വിശ്വസിക്കുന്നു.
