ഇന്ത്യയിലെ ഏറ്റവും പഴക്കമേറിയതും പുണ്യസ്ഥലവുമായ ഒരു ആരാധനാലയമാണ് കേദാർനാഥ് ക്ഷേത്രം . ശിവനാണ് ഇവിടുത്തെ പ്രധാന പ്രതിഷ്ഠ. ഓരോ വർഷവും നിരവധി ഭക്തർ ഈ ക്ഷേത്രം സന്ദർശിക്കുന്നു. എന്നാല്, ശ്രീ കേദാർനാഥ് ജ്യോതിർലിംഗ ക്ഷേത്രത്തിലേക്കുള്ള യാത്ര അത്ര എളുപ്പമല്ല. ഉയർന്ന പ്രദേശവും, പ്രവചനാതീതമായ കാലാവസ്ഥയും, കഠിനമായ യാത്രയും കേദാർനാഥിനെ കൂടുതൽ പ്രാധാന്യമുള്ളതാക്കുന്നു. ഉത്തരാഖണ്ഡ് സംസ്ഥാനത്തിലെ ഹിമാലയൻ പർവതനിരകൾക്കിടയിലാണ് ഈ പുണ്യസ്ഥലം സ്ഥിതി ചെയ്യുന്നത്.
ഈ പുരാതന ക്ഷേത്രത്തിന്റെ ചരിത്രം പുരാണങ്ങളുടെയും വിശ്വാസങ്ങളുടെയും ഐതിഹ്യങ്ങളുടെയും ഒരു സങ്കലനമാണ്. അതിനാൽ ക്ഷേത്രം നിർമ്മിച്ച തീയതിയും, നിർമ്മാതാവിനെയും കണ്ടെത്തുക എന്നത് ഒരു ചർച്ചാവിഷയമാണ്.
ആരാണ് ശ്രീ കേദാർനാഥ് ജ്യോതിർലിംഗ ക്ഷേത്രം നിർമ്മിച്ചത്?
കുരുക്ഷേത്ര യുദ്ധത്തിന് ശേഷം പാണ്ഡവ സഹോദരങ്ങളാണ് കേദാർനാഥ് ക്ഷേത്രം നിർമ്മിച്ചതെന്ന് വിശ്വസിക്കപ്പെടുന്നു. മഹാഭാരതത്തിലെ നായകന്മാരാണ് പാണ്ഡവർ. തങ്ങളുടെ പാപങ്ങൾക്ക് മാപ്പ് ചോദിക്കാൻ ശിവനെ തേടിപ്പോയ പാണ്ഡവർ, ശിവൻ ഒരു കാളയുടെ രൂപത്തിൽ അപ്രത്യക്ഷമായ സ്ഥലത്താണ് ക്ഷേത്രം നിർമ്മിച്ചതെന്നാണ് വിശ്വാസം. എന്നാല്, പാണ്ഡവരാണ് ക്ഷേത്രം നിർമ്മിച്ചതെന്നതിന് പുരാവസ്തുപരമായ സ്ഥിരീകരണമോ ചരിത്രപരമായ രേഖകളോ ലഭ്യമല്ല. അതിനാൽ, ഈ വിശ്വാസം മതഗ്രന്ഥങ്ങളെയും വാമൊഴി പാരമ്പര്യത്തെയും അടിസ്ഥാനമാക്കിയുള്ളതാണ്.
ശ്രീ കേദാർനാഥ് ജ്യോതിർലിംഗ ക്ഷേത്രം എപ്പോഴാണ് നിർമ്മിച്ചത്?
ആർക്കിയോളജിക്കൽ സർവേ ഓഫ് ഇന്ത്യയുടെ രേഖകളും ചരിത്രവും അനുസരിച്ച്, ഇന്നത്തെ കേദാർനാഥ് ക്ഷേത്രം എട്ടാം നൂറ്റാണ്ടിൽ ആദി ശങ്കരാചാര്യർ ആണ് നിർമ്മിക്കുകയോ പുനർനിർമ്മിക്കുകയോ ചെയ്തത്. ഇന്ത്യയിലെ പല തീർത്ഥാടന കേന്ദ്രങ്ങളും പുനരുജ്ജീവിപ്പിച്ചതിൽ ആദി ശങ്കരാചാര്യർക്ക് വലിയ പങ്കുണ്ട്. പാണ്ഡവർ പണിത ഒരു പഴയ ക്ഷേത്രത്തിന്റെ സ്ഥലത്താണ് അദ്ദേഹം കേദാർനാഥ് ക്ഷേത്രം പുനർനിർമ്മിച്ചതെന്നാണ് BehindEveryTemple.org പറയുന്നത്.
കേദാർനാഥ് ക്ഷേത്രത്തിന്റെ നിർമ്മാണവുമായി ബന്ധപ്പെട്ട് ഈ രണ്ട് കഥകൾ മാത്രമല്ല നിലവിലുള്ളത്. മാൾവയിലെ ഭോജ് രാജാവോ അല്ലെങ്കിൽ മറ്റൊരു ഭരണാധികാരിയോ പതിനൊന്നാം നൂറ്റാണ്ടിൽ ഈ ക്ഷേത്രം പുതുക്കിപ്പണിഞ്ഞതായും ചില സ്രോതസ്സുകൾ സൂചിപ്പിക്കുന്നു.
ഈ ക്ഷേത്രം കഠിനമായ ഹിമാലയൻ കാലാവസ്ഥയെ അതിജീവിക്കാൻ ശേഷിയുള്ള രീതിയിൽ കല്ലുകൾ ഉപയോഗിച്ചാണ് നിർമ്മിച്ചിരിക്കുന്നത്. ഈ വാസ്തുവിദ്യാ വിസ്മയം പുരാണപരമായ ഉത്ഭവത്തിന്റെയും, പാണ്ഡവരുടെയും, എട്ടാം നൂറ്റാണ്ടിൽ ആദി ശങ്കരാചാര്യർ നടത്തിയ നിർമ്മാണത്തിന്റെയും ചരിത്രപരമായ പല അടരുകളെയും സൂചിപ്പിക്കുന്നു. അതിനാൽ, പലരും ഇതിന്റെ സ്ഥാപകർ പാണ്ഡവരാണെന്ന് വിശ്വസിക്കുന്നു. എന്നാൽ, ഭൂരിഭാഗം ചരിത്രകാരന്മാരും എട്ടാം നൂറ്റാണ്ടിൽ ആദി ശങ്കരാചാര്യർ നടത്തിയ നിർമ്മാണത്തെയാണ് ഈ ക്ഷേത്രത്തിന്റെ തുടക്കമായി കണക്കാക്കുന്നത്.
