കുരുന്നുകളുടെ മനോഹരമായ വീഡിയോകൾക്ക് കാഴ്ചക്കാർ ഏറെയാണ്. ഇപ്പോഴിതാ ജമ്മു കാശ്മീരില്‍ ഒരു കൂട്ടം കിന്റർഗാർട്ടൻ കുട്ടികൾ സ്കൂളിൽ
അവര്‍ക്കും പ്രിന്‍സിപ്പലിനുംവേണ്ടി സന്തോഷത്തോടെ ചായ തയ്യാറാക്കുന്ന ഹൃദയ സ്പർശിയായ ഒരു വീഡിയോയാണ് സോഷ്യൽ മീഡിയയുടെ മനം കവർന്നിരിക്കുന്നത്.
അധ്യാപകരുടെ സാന്നിധ്യത്തിൽ സ്കൂൾ യൂണിഫോം ധരിച്ച് ചായപ്പൊടിയും പഞ്ചസാരയും പാലും കലർത്തുന്ന കൊച്ചുകുട്ടികളുടെ ചാരുതയാര്‍ന്ന ദൃശ്യങ്ങൾ ആളുകളുടെ മനം കവര്‍ന്നു.
ജമ്മുവിലെ ആർ എസ് പുരയിലുള്ള കോട്‌ലി ഗാല ബനയിലെ മോണ്ടിസോറി നർഗീസ് ദത്ത് പബ്ലിക് സ്കൂളിൽ ചിത്രീകരിച്ച ഈ വൈറൽ വീഡിയോ, അനിൽ ചൗധരി ഇൻസ്റ്റാഗ്രാമിൽ പങ്കുവെച്ചതാണ്. ടീം വർക്ക്, ഉത്തരവാദിത്തം, പ്രായോഗിക കഴിവുകളുടെ പ്രാധാന്യം എന്നിവയെക്കുറിച്ചുള്ള മറക്കാനാവാത്ത പാഠം ഇത് കാണിക്കുന്നു.
ഒരു കുട്ടി തന്റെ സഹപാഠികളെ ചായ ഉണ്ടാക്കല്‍ പഠിപ്പിക്കുന്നതിൽ നേതൃത്വം വഹിക്കുന്നതോടെയാണ് വീഡിയോ ആരംഭിക്കുന്നത്. കപ്പുകൾ, പാത്രം, മേശപ്പുറത്ത് ചേരുവകൾ എന്നിവ വച്ചിരിക്കുന്നു. ഓരോ കുട്ടിയും ഓരോന്നായി കലത്തിൽ ഒരോ ചേരുവകള്‍ ചേർക്കുന്നു, സഹപാഠിയുടെ നിർദ്ദേശങ്ങൾ പാലിക്കുന്നു. കുട്ടികള്‍ പുതുതായി ഉണ്ടാക്കിയ ചായ ആസ്വദിക്കുന്നതിൽ വീഡിയോ അവസാനിക്കുന്നു.
ലളിതവും എന്നാൽ ഫലപ്രദവുമായ ജോലിയിൽ ഏർപ്പെടുമ്പോൾ കുട്ടികളുടെ മുഖത്ത് ആവേശവും ജിജ്ഞാസയുമാണ് പ്രകടമാകുന്നത്. . ചെറുപ്രായത്തിൽ തന്നെ ടീം വർക്ക്, ഉത്തരവാദിത്തം, സ്വാതന്ത്ര്യം എന്നിവ പോലുള്ള ജീവിത നൈപുണ്യങ്ങൾ എങ്ങനെ പ്രോത്സാഹിപ്പിക്കാമെന്ന് കാണിച്ചു നൽകിയതിന് നിരവധി മാതാപിതാക്കളും അധ്യാപകരും വീഡിയോയെ പ്രശംസിച്ചു.
വീഡിയോ കേവലം മനോഹരമായ ഒരു നിമിഷത്തെക്കുറിച്ചല്ല മറിച്ച് കുട്ടിക്കാലത്തെ വിദ്യാഭ്യാസം എങ്ങനെ കുട്ടികളെ ഭാവിയിലേക്ക് സജ്ജരാക്കും എന്നതിന്റെ ശക്തമായ ഓർമ്മപ്പെടുത്തലാണിത്. രസകരവും ആകർഷകവുമായ രീതിയിൽ ജീവിത നൈപുണ്യങ്ങൾ പഠിക്കുന്നതിലൂടെ, കുട്ടികൾക്ക് അവരുടെ ജീവിതത്തിലുടനീളം സ്വാതന്ത്ര്യത്തിന്റെയും ആത്മവിശ്വാസത്തിന്റെയും ഉത്തരവാദിത്തത്തിന്റെയും അടിത്തറ കെട്ടിപ്പടുക്കാൻ കഴിയും.
