രാംപൂർ: ഒരു സിനിമാ തിരക്കഥയെ വെല്ലുന്ന രീതിയിലുള്ള വിചിത്രമായ ഒരു വിധിയാണ് ഉത്തർപ്രദേശിലെ രാംപൂർ ജില്ലയിലുള്ള ഒരു ഗ്രാമപഞ്ചായത്ത് പുറപ്പെടുവിച്ചിരിക്കുന്നത്. ഭൂമിയോ സ്വത്തോ വീതം വെക്കുന്നതിന് പകരം, രക്തവും മാംസവുമുള്ള ഒരു ഭർത്താവിനെത്തന്നെയാണ് ഇത്തവണ പഞ്ചായത്ത് വീതം വെച്ചത്.
അസീം നഗർ പോലീസ് സ്റ്റേഷൻ പരിധിയിലുള്ള നഗ്ലിയ അഖിൽ ഗ്രാമത്തിലാണ് ഈ അസാധാരണ സംഭവം നടന്നത്. രണ്ട് ഭാര്യമാർക്കിടയിൽ അകപ്പെട്ടുപോയ ഒരാളായിരുന്നു ഇവിടുത്തെ താരം. ഇതിൽ ഒന്ന് വീട്ടുകാർ ഉറപ്പിച്ച വിവാഹവും (Arranged Marriage) മറ്റൊന്ന് പ്രണയവിവാഹവുമായിരുന്നു. രണ്ട് ഭാര്യമാരും ഭർത്താവിന് മേൽ പൂർണ്ണ അവകാശം ഉന്നയിക്കുകയും വിട്ടുകൊടുക്കാൻ തയ്യാറാകാതിരിക്കുകയും ചെയ്തതോടെ വീട്ടിൽ ദിവസേന വഴക്കായി.
ഇവരുടെ സ്ഥിരമായ വഴക്ക് കാരണം അയൽവാസികൾക്ക് വൈകുന്നേരങ്ങളിൽ വിനോദത്തിനായി ടിവി പോലും വെക്കേണ്ടി വരാറില്ലെന്ന് നാട്ടുകാർ പരിഹസിക്കുന്നു. തർക്കം രൂക്ഷമായതോടെ രണ്ട് ഭാര്യമാരും ഭർത്താവിനെയും കൂട്ടി അസീം നഗർ പോലീസ് സ്റ്റേഷനിലെത്തി. തങ്ങൾക്ക് ഭർത്താവിനെ വിട്ടുകിട്ടണം എന്നതായിരുന്നു ഇരുവരുടെയും ആവശ്യം. എന്നാൽ നിയമപുസ്തകങ്ങളിലൊന്നും ഇല്ലാത്ത ഇത്തരമൊരു പരാതിക്ക് മുന്നിൽ പകച്ചുപോയ പോലീസ്, വിഷയം പരിഹരിക്കാൻ ഗ്രാമത്തിലെ മുതിർന്നവരെ ചുമതലപ്പെടുത്തി.
തുടർന്ന് ഭർത്താവിനെയും രണ്ട് ഭാര്യമാരെയും കുടുംബാംഗങ്ങളെയും സാക്ഷിനിർത്തി ഒരു പഞ്ചായത്ത് യോഗം ചേർന്നു. ദീർഘനേരം നീണ്ടുനിന്ന നാടകീയമായ ചർച്ചകൾക്കൊടുവിൽ , മുതിർന്നവർ ഒരു വിധി പ്രസ്താവിച്ചു. ആ വിധി കേട്ട് അവിടെ കൂടിയിരുന്നവർ ആദ്യം അമ്പരന്നെങ്കിലും പിന്നീട് ചിരിച്ചുപോയി. ഭർത്താവിനെ ആഴ്ചയിലെ ദിവസങ്ങളുടെ അടിസ്ഥാനത്തിൽ രണ്ട് പേർക്കുമായി പങ്കുവെച്ചു നൽകാനായിരുന്നു പഞ്ചായത്തിന്റെ തീരുമാനം.
ലിഖിതമായി തയ്യാറാക്കിയ കരാർ പ്രകാരം, ഭർത്താവ് തിങ്കൾ, ചൊവ്വ, ബുധൻ ദിവസങ്ങളിൽ ആദ്യത്തെ ഭാര്യയ്ക്കൊപ്പം താമസിക്കണം. വ്യാഴം, വെള്ളി, ശനി ദിവസങ്ങളിൽ രണ്ടാമത്തെ ഭാര്യയ്ക്കൊപ്പവും. എന്നാൽ ഞായറാഴ്ച ഭർത്താവിന് “സ്വാതന്ത്ര്യ ദിനം” (Freedom Day) ആയി പഞ്ചായത്ത് പ്രഖ്യാപിച്ചു. അന്നേ ദിവസം അദ്ദേഹത്തിന് ഇഷ്ടമുള്ളിടത്ത് താമസിക്കാനും വിശ്രമിക്കാനും സ്വാതന്ത്ര്യമുണ്ടാകും.
ഭർത്താവും രണ്ട് ഭാര്യമാരും ഈ കരാറിൽ ഒപ്പിട്ടു. അടുത്ത കാലത്തൊന്നും കണ്ടിട്ടില്ലാത്ത ഈ “ക്രിയേറ്റീവ് ടൈംടേബിളിന്” അങ്ങനെ ഔദ്യോഗിക പദവി ലഭിച്ചു.
നിലവിൽ പ്രദേശത്തെ ചായക്കടകളിലും തെരുവോരങ്ങളിലും ചൂടേറിയ ചർച്ചാവിഷയം ഈ വിധിയാണ്. പഞ്ചായത്ത് വിധി അനുസരിച്ച് മൂവരും വീട്ടിലേക്ക് മടങ്ങിയെങ്കിലും, നാട്ടുകാർക്കിടയിൽ ഇപ്പോഴും ഒരു ചോദ്യം ബാക്കിയുണ്ട്: ഇത്തരമൊരു ടൈംടേബിൾ കൊണ്ട് കുടുംബത്തിൽ സമാധാനം ഉണ്ടാകുമോ?
