പോഷകപ്രദമായ ഭക്ഷണം കുട്ടികൾക്ക് ദീർഘകാല ആരോഗ്യം, ക്ഷേമം, ഊർജ്ജം എന്നിവ പ്രദാനം ചെയ്യുന്നു . ആരോഗ്യകരമായ ഭക്ഷണശീലങ്ങൾ കുട്ടികള്‍ക്ക് നല്‍കുന്നതിൽ മാതാപിതാക്കളുടെ പങ്ക് വളരെ വലുതാണ്.
മാതാപിതാക്കൾ വിവിധ തരം പഴങ്ങൾ, പച്ചക്കറികൾ, ധാന്യങ്ങൾ, പ്രോട്ടീനുകൾ എന്നിവ കുട്ടികൾക്ക് നൽകേണ്ടതുണ്ട്. മാതാപിതാക്കൾ കഴിക്കുന്നത് കാണുമ്പോൾ കുട്ടികൾ ആരോഗ്യകരമായ ഭക്ഷണരീതികൾ അനുകരിക്കാൻ സാധ്യതയുണ്ട്. ഭക്ഷണം തയ്യാറാക്കുന്നതിൽ കുട്ടികളെ ഉൾപ്പെടുത്തുകയും വിവിധ ഭക്ഷണങ്ങളുടെ ആരോഗ്യഗുണങ്ങൾ വിശദീകരിക്കുകയും ചെയ്യുന്നത് ഭക്ഷണ സമയം ആസ്വാദ്യകരമാക്കുനതോടൊപ്പം അവയുടെ ഗുണനിലവാരത്തെ പറ്റിയുള്ള വിവരങ്ങളും അവർക്ക് നൽകും .
ആരോഗ്യകരമായ ഭക്ഷണം നൽകുന്നതിനപ്പുറം, പോഷകാഹാരത്തെക്കുറിച്ച് കുട്ടികളെ ബോധവൽക്കരിക്കുക. ഭക്ഷണം അവരുടെ ഊർജ്ജം, ഏകാഗ്രത, മാനസികാവസ്ഥ എന്നിവയുമായി എങ്ങനെ പരസ്പരം ബന്ധപ്പെടുന്നു എന്നത് പഠിപ്പിക്കുന്നതിന് സ്കൂളുകൾ ഒരു പ്രധാന പങ്ക് വഹിക്കുന്നു. ഭക്ഷണം എവിടെ നിന്ന് വരുന്നു എന്ന് കുട്ടികളെ പരിചയപ്പെടുത്തുന്ന പരിപാടികൾ, ഫാമുകൾ, പച്ചക്കറിത്തോട്ടം എന്നിവിടങ്ങളിലേക്കുള്ള സന്ദർശനങ്ങൾ ഇവ നിർണായക അറിവുകൾ കുട്ടികൾക്ക് നൽകുന്നു .
ആരോഗ്യകരമായ ഭക്ഷണം പ്രോത്സാഹിപ്പിക്കുക
ആരോഗ്യകരമായ ഭക്ഷണത്തെ പ്രോത്സാഹിപ്പിക്കേണ്ടത് അത്യാവശ്യമാണ്. സ്‌കൂളുകളും കമ്മ്യൂണിറ്റികളും പൊതുജനാരോഗ്യ കാമ്പെയ്‌നുകളും പോഷകസമൃദ്ധമായ ഭക്ഷണങ്ങൾ വാഗ്ദാനം ചെയ്യുകയും ശാരീരിക പ്രവർത്തനങ്ങൾ പ്രോത്സാഹിപ്പിക്കുകയും വേണം. പോഷകാഹാര പരിപാടികൾ, കായിക പ്രവർത്തനങ്ങൾ എന്നിവയെല്ലാം ആരോഗ്യത്തിനും ക്ഷേമത്തിനും സമഗ്രമായ സംഭാവന നൽകുന്നു.
ആരോഗ്യകരമായ ഭക്ഷണം തിരഞ്ഞെടുക്കുന്നത് ശാശ്വതമായ ഗുണങ്ങൾ നൽകുന്നതായി ശിശുരോഗ വിദഗ്ധനായ ഡോക്ടർ അഭിഷേക് ചോപ്ര പറയുന്നു. സമീകൃതാഹാരം കഴിക്കുന്ന കുട്ടികളിൽ ശക്തമായ പ്രതിരോധ സംവിധാനങ്ങൾ, മെച്ചപ്പെട്ട മാനസികാരോഗ്യം എന്നിവ വികസിക്കുന്നതോടൊപ്പം പൊണ്ണത്തടി, പ്രമേഹം, ഹൃദ്രോഗം തുടങ്ങിയ വിട്ടുമാറാത്ത രോഗങ്ങളുടെ അപകടസാധ്യത കുറയ്ക്കാനും കഴിയും . കൂടാതെ, ആരോഗ്യകരമായ ഭക്ഷണക്രമം വൈജ്ഞാനിക പ്രവർത്തനത്തെ മെച്ചപ്പെടുത്തുന്നു. ഊർജം വർധിപ്പിക്കുന്നു. ശരിയായ പോഷകാഹാരത്തോടൊപ്പം മാനസികാവസ്ഥ മെച്ചപ്പെടുത്തുന്നു.
കുട്ടികൾക്ക് അനുയോജ്യമായ ഭക്ഷണങ്ങൾ
- പഴങ്ങൾ
- പച്ചക്കറികൾ
- പയർവർഗ്ഗങ്ങൾ, ബീൻസ്
- ഗോതമ്പ്, ചോളം, ബാർലി, അരി തുടങ്ങിയ ധാന്യങ്ങൾ
- മാംസം, കോഴി, മത്സ്യം
- പാൽ, തൈര്, ചീസ് തുടങ്ങിയ പാലുൽപ്പന്നങ്ങൾ
ചപ്പാത്തി, ചോറ്, ഓട്സ്, മില്ലറ്റുകൾ ഇവ സാവധാനത്തിൽ ഊർജ്ജം പുറത്തുവിടുന്നു. പാൽ, ചീസ്, തൈര് എന്നിവ പ്രോട്ടീനിന്റെയും കാൽസ്യത്തിന്റെയും മികച്ച ഉറവിടങ്ങളാണ്. അമിതഭാരമുള്ള കുട്ടികൾക്ക്, കൊഴുപ്പ് കുറഞ്ഞ പാലുൽപ്പന്നങ്ങളാണ് അഭികാമ്യം.
ഒഴിവാക്കേണ്ട ഭക്ഷണങ്ങൾ
കൊഴുപ്പ്, പഞ്ചസാര അല്ലെങ്കിൽ ഉപ്പ് എന്നിവ കൂടുതലുള്ള ഭക്ഷണങ്ങളുടെ ഉപയോഗം കുറയ്ക്കുക
- ബിസ്ക്കറ്റ്, പേസ്ട്രികൾ, ചോക്കലേറ്റുകൾ, ഐസ്ക്രീം
- പ്രിസർവേറ്റീവുകൾ ഉപയോഗിച്ച് ടിൻ ചെയ്തതോ പാക്കേജുചെയ്തതോ സംസ്കരിച്ചതോ ആയ ഭക്ഷണങ്ങൾ
- വാണിജ്യ പ്രഭാതഭക്ഷണ ധാന്യങ്ങൾ
- കാപ്പി, ചായ, ഊർജ്ജ പാനീയങ്ങൾ എന്നിവയുൾപ്പെടെ കഫീൻ അടങ്ങിയ പാനീയങ്ങൾ
പാലും ജ്യൂസുകളും
ഡോക്ടർ അഭിഷേക് ചോപ്ര പറയുന്നത് അമ്മമാർ കുഞ്ഞുങ്ങൾക്ക് കുറഞ്ഞത് രണ്ട് വർഷമെങ്കിലും മുലയൂട്ടൽ തുടരണമെന്നാണ് .1 മുതൽ 2 വയസ്സുവരെ കുട്ടിക്ക് ലഭിക്കുന്ന അമ്മയുടെ മുലപ്പാൽ അവരുടെ മസ്തിഷ്ക വളർച്ചയ്ക്ക് അനിവാര്യമാണ് . 2 വയസ്സിന് ശേഷം, കൊഴുപ്പ് കുറഞ്ഞതോ കൊഴുപ്പ് നീക്കം ചെയ്തതോ ആയ പാൽ നൽകാം . പായ്ക്ക് ചെയ്ത ജ്യൂസുകളിൽ ഉയർന്ന പഞ്ചസാരയുടെ അംശം ഉള്ളതിനാൽ ജ്യൂസുകൾ ഒഴിവാക്കണം.
പഴങ്ങളും പച്ചക്കറികളും വ്യത്യസ്ത ആകൃതിയിൽ മുറിച്ച് ഭക്ഷണം രസകരമാക്കുന്നത് പുതിയ ഭക്ഷണങ്ങൾ പരീക്ഷിക്കാൻ കുട്ടികളെ പ്രോത്സാഹിപ്പിക്കും. ഒരിക്കലും നിർബന്ധിക്കരുത്.
ആരോഗ്യകരമായ ജീവിതം രൂപപ്പെടുത്തുന്നതിൽ വ്യായാമത്തിന്റെ പങ്ക് പ്രധാനമാണ്.
ശാരീരിക പ്രവർത്തനങ്ങൾ അക്കാദമിക് പ്രകടനവും ശാരീരികക്ഷമതയും മൊത്തത്തിലുള്ള ആരോഗ്യവും വർദ്ധിപ്പിക്കുന്നു . “പ്രീസ്‌കൂൾ കുട്ടികൾ (3-5 വയസ്സ്) ദിവസേന 3 മണിക്കൂർ സജീവമായ കളിയിൽ ഏർപ്പെടണം. അതേസമയം 6-17 വയസ് പ്രായമുള്ള കുട്ടികൾ ദിവസവും കുറഞ്ഞത് 60 മിനിറ്റ് എങ്കിലും ശാരീരിക പ്രവർത്തികളിൽ ഏർപ്പെടാൻ ശ്രദ്ധിക്കണം .
