ഹരിയാനയിലെ മുർത്തലിൽ ഗ്രാൻഡ് ട്രങ്ക് റോഡിൽ സ്ഥിതി ചെയ്യുന്ന അംരിക് സുഖ്ദേവ് ധാബ ഇന്ത്യൻ ഹോട്ടല് രംഗത്തെ ഒരു അസാധാരണ വിജയഗാഥയാണ്. 1956-ൽ ട്രക്ക് ഡ്രൈവർമാർക്ക് ഭക്ഷണം നൽകാൻ തുടങ്ങിയ ഒരു സാധാരണ ഭക്ഷണശാല, ഇപ്പോൾ പ്രതിവർഷം 100 കോടി രൂപ വരുമാനം നേടുകയും പ്രതിദിനം 10,000 ഉപഭോക്താക്കൾക്ക് ഭക്ഷണം നൽകുകയും ചെയ്യുന്നു.
എളിയ തുടക്കത്തിൽ നിന്ന് മൾട്ടി- ക്യുസിൻ ഭീമനിലേക്ക്
1956-ൽ സർദാർ പ്രകാശ് സിംഗ് സ്ഥാപിച്ച അംരിക് സുഖ്ദേവ് ധാബ, തുടക്കത്തിൽ റോഡരികിലെ ഒരു സാധാരണ ഭക്ഷണശാലയായിരുന്നു. ദാൽ റോട്ടി, സബ്സി, ചോറ് തുടങ്ങിയ സാധാരണ ഇന്ത്യൻ വിഭവങ്ങൾ കട്ടിലുകളിൽ ഇരുന്ന് കഴിക്കാനുള്ള സൗകര്യമാണ് അന്ന് പ്രധാനമായും നൽകിയിരുന്നത്. ഗ്രാൻഡ് ട്രങ്ക് റോഡിലൂടെ യാത്ര ചെയ്യുന്ന ട്രക്ക് ഡ്രൈവർമാരുടെ ആവശ്യങ്ങൾ നിറവേറ്റുക എന്നതായിരുന്നു പ്രധാന ലക്ഷ്യം.
ഇന്ന്, സർദാർ പ്രകാശ് സിംഗിന്റെ മക്കളായ അംരിക് സിംഗും സുഖ്ദേവ് സിംഗും ചേർന്നാണ് ധാബയുടെ നടത്തിപ്പ്. അവർ ശ്രദ്ധേയമായ ഒരു മാറ്റമാണ് ഈ സ്ഥാപനത്തിൽ വരുത്തിയത്. 1990-കളിൽ ഇരുവരും ധാബയെ നവീകരിക്കുന്നതിനായി വലിയ നിക്ഷേപം നടത്തുകയും 2000-ൽ ഒരു പുതിയ കെട്ടിടത്തിലേക്ക് മാറ്റുകയും ചെയ്തു. ഈ മാറ്റം പഞ്ചാബിലേക്കും ഹിമാചലിലേക്കും പോകുന്ന ഉയർന്ന വരുമാനക്കാരായ യാത്രക്കാരെയും ആകർഷിക്കാൻ സഹായിച്ചു.
അംരിക് സുഖ്ദേവ് ധാബ ഇപ്പോൾ മൾട്ടി- ക്യുസിൻ കേന്ദ്രമായി വളർന്നു. നോർത്ത് ഇന്ത്യൻ, സൗത്ത് ഇന്ത്യൻ വിഭവങ്ങൾ മാത്രമല്ല, ചൈനീസ്, കോണ്ടിനെന്റൽ വിഭവങ്ങൾ, കൂടാതെ നിരവധി മധുരപലഹാരങ്ങൾ എന്നിവയും ഇവിടെ ലഭ്യമാണ്.
വിജയ രഹസ്യം: വിശ്വാസവും മൗത്ത് പബ്ലിസിറ്റിയും
വലിയ വിജയമുണ്ടാകാന് അംരിക് സുഖ്ദേവ് ധാബ ഒരിക്കലും വലിയ പ്രചരണങ്ങളെയോ പരസ്യങ്ങളെയോ ആശ്രയിച്ചിട്ടില്ല. വാമൊഴി പ്രചരണം (word-of-mouth) മാത്രമാണ് അവരുടെ വളർച്ചയ്ക്ക് കാരണം. ഇൻസ്റ്റാഗ്രാം ഇൻഫ്ലുവൻസറായ റോക്കി സാഗ്ഗു ക്യാപിറ്റൽ, ധാബയുടെ യാത്രയെക്കുറിച്ചുള്ള ഒരു വീഡിയോയിൽ അവരുടെ ബിസിനസ്സ് മോഡലിന്റെ പ്രധാന വശങ്ങൾ എടുത്തു കാണിക്കുന്നുണ്ട്.
വിജയത്തിന്റെ ഒരു പ്രധാന ഘടകം ആദ്യകാല ഉപഭോക്താക്കളുമായുള്ള വിശ്വാസം വളർത്തിയെടുക്കുക എന്നതായിരുന്നു. ആദ്യകാലങ്ങളിൽ ട്രക്ക് ഡ്രൈവർമാർക്കും ടാക്സി ഡ്രൈവർമാർക്കും സൗജന്യമായോ കുറഞ്ഞ വിലയിലോ ഭക്ഷണം നൽകിയിരുന്നു. ഇത് ഒരു വിശ്വസ്ത ഉപഭോക്തൃ അടിത്തറ രൂപീകരിക്കാൻ സഹായിച്ചു. ഇവര് പിന്നീട് സ്ഥിരം സന്ദർശകരായി മാറി. ആയിരക്കണക്കിന് ആളുകളാണ് ദിവസേന ഇവിടുത്തെ പ്രശസ്തമായ പറാട്ടകളും മറ്റ് വിഭവങ്ങളും ആസ്വദിക്കാൻ എത്തുന്നത്. രാത്രി വൈകിയും റെസ്റ്റോറന്റ് ഉപഭോക്താക്കളെക്കൊണ്ട് നിറഞ്ഞിരിക്കും.
500-ൽ അധികം ജീവനക്കാരുടെ പിന്തുണയോടെ പ്രവർത്തിക്കുന്ന അംരിക് സുഖ്ദേവ് ധാബ, ഒരു പ്രാദേശിക അടയാളമെന്നതിലുപരി, എല്ലാ പ്രായത്തിലുമുള്ള ഭക്ഷണപ്രിയരുടെ ഇഷ്ടകേന്ദ്രമായി മാറിക്കഴിഞ്ഞു. ടേസ്റ്റ്അറ്റ്ലസിന്റെ ലോകത്തിലെ ഏറ്റവും മികച്ച 100 റെസ്റ്റോറന്റുകളുടെ പട്ടികയിലും ഇവർ ഇടം നേടിയിട്ടുണ്ട്.
