ഇന്തോനേഷ്യയിലെ സെമരംഗിൽ, റെയിൽവേ ട്രാക്കിൽ കുടുങ്ങിയ ഒരു ട്രക്കിലേക്ക് ട്രെയിൻ ഇടിച്ചുകയറുന്ന ഭയാനകമായ നിമിഷങ്ങൾ ക്യാമറയിൽ പതിഞ്ഞു. ഒക്ടോബർ 21 ന് പ്രാദേശിക സമയം രാത്രി 10 മണിയോടെയാണ് സംഭവം . ട്രെയിൻ അതിവേഗത്തിൽ ട്രാക്കിൽ നിർത്തിയിട്ടിരുന്ന വാഹനത്തിന് നേർക്ക് പാഞ്ഞടുക്കുന്നതും, ആവർത്തിച്ച് ഹോൺ മുഴക്കുന്നതും, തുടർന്ന് അതിൽ ശക്തിയായി ഇടിക്കുന്നതുമാണ് ഭയപ്പെടുത്തുന്ന ക്ലിപ്പിൽ കാണുന്നത്.
ഇടിയുടെ ആഘാതത്തിൽ അവശിഷ്ടങ്ങൾ തെറിച്ചുപോവുകയും ട്രക്കിനെ മീറ്ററുകളോളം ട്രാക്കിലൂടെ വലിച്ചിഴക്കുകയും ചെയ്തു. സംഭവസ്ഥലത്തേക്ക് ആളുകൾ ഓടിയെത്തുന്നതും കാണാം. പ്രാദേശിക മാധ്യമ റിപ്പോർട്ടുകൾ അനുസരിച്ച്, ട്രാക്ക് മുറിച്ചുകടക്കാൻ ശ്രമിക്കുന്നതിനിടെയാണ് ട്രക്ക് നിശ്ചലമായത്. കൂട്ടിയിടിക്ക് തൊട്ടുമുമ്പ് ഡ്രൈവർ ഓടി രക്ഷപ്പെട്ടിരുന്നു. ഭാഗ്യവശാൽ, ആർക്കും ജീവാപഹാനി സംഭവിച്ചില്ല, ഡ്രൈവർക്ക് കാര്യമായ പരിക്കുകളൊന്നും ഏറ്റിട്ടില്ലെന്നും പറയപ്പെടുന്നു. സംഭവത്തിന്റെ വീഡിയോ സോഷ്യൽ മീഡിയയിൽ വൈറലായിട്ടുണ്ട്.
സെമരംഗിൽ നിന്ന് സുരബായയിലേക്ക് പോവുകയായിരുന്ന ഹരിന ട്രെയിൻ കൂട്ടിയിടിയെ തുടർന്ന് പെട്ടെന്ന് നിർത്തുകയായിരുന്നു. ട്രെയിനിനും ട്രക്കിനും കേടുപാടുകൾ സംഭവിച്ചെങ്കിലും ആർക്കും പരിക്കില്ലെന്നത് ആശ്വാസകരമാണ്. അവശിഷ്ടങ്ങൾ നീക്കം ചെയ്യാനും പ്രദേശത്തെ ഗതാഗതം പുനഃസ്ഥാപിക്കാനും പ്രാദേശിക അധികൃതർ പിന്നീട് സ്ഥലത്തെത്തി.
