ചെന്നൈ: പ്രസിദ്ധ തമിഴ്‌നടന്‍ ദാനിയേല്‍ ബാലാജി അന്തരിച്ചു, ഹൃദയാഘാതത്തെ തുടര്‍ന്ന് ചെന്നൈയിലെ സ്വകാര്യ ആശുപത്രിയില്‍ വെള്ളിയാഴ്ചയായിരുന്നു മരണം. 48 വയസ്സായിരുന്ന അദ്ദേഹത്തെ നെഞ്ചുവേദനയെ തുടര്‍ന്ന് കൊട്ടിവാകത്തെ ആശുപത്രിയില്‍ പ്രവേശിപ്പിച്ചിരിക്കുകയായിരുന്നു.
തമിഴ് ടെലിവിഷന്‍ സ്‌ക്രീനിലൂടെ വെള്ളിത്തിരയിലെത്തിയ താരം ചിത്തി എന്ന സീരിയലിലെ മികച്ച പ്രകടനത്തോടെയാണ് ശ്രദ്ധേയനായ താരമായി മാറിയത്. അതിന് ശേഷം സിനിമയില്‍ എത്തിയ താരം 40 ലധികം സിനിമകളിലാണ് വേഷമിട്ടത്. ഗൗതം മേനോന്റെ കാക്ക…കാക്ക, വേട്ടയാട് വിളയാട് എന്നീ സിനിമകളിലെ വേഷം ശ്രദ്ധിക്കപ്പെട്ടു. വെട്രിമാരന്റെ വട ചെന്നൈയിലെയും ധനുഷ് നായകാകയ പൊള്ളാതവനിലെയും വിജയ് നായകനായ ഭൈരവ, ബിഗില്‍ തുടങ്ങിയ സിനിമകളിലെല്ലാം ശ്രദ്ധേയമായ വേഷം ചെയ്തു.
മമ്മൂട്ടി നായകനായ ബ്‌ളാക്കിലൂടെ മലയാളത്തില്‍ എത്തിയ അദ്ദേഹം മോഹന്‍ലാലിന്റെ ഭഗവാനിലും പ്രതിനായകനായി. മലയാള സിനിമയായ മമ്മൂട്ടിയുടെ ഡാഡികൂളിലും പ്രതിനായകനായി. ഒട്ടേറെ തെലുങ്ക് സിനിമകളിലും അദ്ദേഹം അഭിനയിച്ചിട്ടുണ്ട്. മൃതദേഹം ശനിയാഴ്ച പുരസൈവാക്കത്തെ വസതിയില്‍ പൊതുദര്‍ശനത്തിന് വെച്ച ശേഷം സംസ്‌ക്കരിക്കും. അദ്ദേഹത്തിന്റെ വിയോഗവാര്‍ത്ത തമിഴ് സിനിമാലോകത്തും അദ്ദേഹത്തിന്റെ ആരാധകര്‍ക്കിടയിലും ഞെട്ടലും ദുഃഖവും ഉളവാക്കി.
