അഹമ്മദാബാദ്: ലോകകപ്പ് ക്രിക്കറ്റിന്റെ കലാശപ്പോരിൽ ന്യൂസിലൻഡിന് മുന്നിൽ കൂറ്റൻ വിജയലക്ഷ്യം ഉയർത്തി ഇന്ത്യ. ലോകത്തിലെ ഏറ്റവും വലിയ സ്റ്റേഡിയത്തിൽ മലയാളി താരം സഞ്ജു സാംസൺ നയിച്ച ബാറ്റിംഗ് താണ്ഡവമാണ് ഇന്ത്യയെ അഞ്ച് വിക്കറ്റ് നഷ്ടത്തിൽ 255 റൺസ് എന്ന പടുകൂറ്റൻ സ്കോറിലെത്തിച്ചത്. പവർപ്ലേ ഓവറുകളിൽ തുടങ്ങിയ തകർത്തടിയിലൂടെ ആദ്യ 15 ഓവറിൽ ഇന്ത്യൻ ബാറ്റർമാർ മൈതാനത്ത് വിരുന്നൊരുക്കി. സഞ്ജു സാംസൺ 89 റൺസുമായി ടോപ് സ്കോററായപ്പോൾ അഭിഷേക് ശർമ്മയും ഇഷാൻ കിഷനും അർധസെഞ്ചുറികളുമായി മികച്ച പിന്തുണ നൽകി.
ഇന്നിങ്സിന്റെ തുടക്കത്തിൽ അൽപ്പം പതറിയെങ്കിലും അഞ്ചാം പന്തിൽ തകർപ്പൻ സിക്സറിലൂടെയാണ് സഞ്ജു ഇന്ത്യയുടെ റൺവേട്ടയ്ക്ക് തുടക്കമിട്ടത്. ആദ്യ രണ്ട് ഓവറുകളിൽ കരുതലോടെ കളിച്ച സഞ്ജുവും അഭിഷേക് ശർമ്മയും ജേക്കബ് ഡഫി എറിഞ്ഞ മൂന്നാം ഓവർ മുതൽ ആക്രമണത്തിന്റെ ഗിയർ മാറ്റി. ആ ഓവറിൽ 15 റൺസ് പിറന്നതോടെ ഇന്ത്യൻ ഇന്നിങ്സിന് വേഗം കൂടി. പിന്നീട് കണ്ടത് സിക്സറുകളുടെ പെരുമഴയായിരുന്നു. നാലാം ഓവറിൽ 24 റൺസും അഞ്ചാം ഓവറിൽ 21 റൺസും അടിച്ചെടുത്തതോടെ വെറും നാലോവറിൽ തന്നെ ഇന്ത്യ അമ്പത് കടന്നു.
ആറാം ഓവറിൽ 20 റൺസ് കൂടി പിറന്നതോടെ പവർപ്ലേ അവസാനിക്കുമ്പോൾ വിക്കറ്റ് നഷ്ടമില്ലാതെ 92 റൺസെന്ന ശക്തമായ നിലയിലായിരുന്നു ഇന്ത്യ. ഇതിനിടെ കേവലം 18 പന്തിൽ നിന്ന് അഭിഷേക് ശർമ്മ തന്റെ അർധസെഞ്ചുറി പൂർത്തിയാക്കി. കിവീസ് ബൗളർമാർ കാഴ്ചക്കാരായി മാറിയ നിമിഷങ്ങളായിരുന്നു അത്. എന്നാൽ എട്ടാം ഓവറിൽ 21 പന്തിൽ 52 റൺസെടുത്ത അഭിഷേകിനെ ഇന്ത്യയ്ക്ക് നഷ്ടമായി. തുടർന്ന് ക്രീസിലെത്തിയ ഇഷാൻ കിഷനും സഞ്ജുവും ചേർന്ന് റൺറേറ്റ് താഴാതെ ഇന്ത്യയെ മുന്നോട്ട് നയിച്ചു.
ഇഷാൻ കിഷന്റെ തകർപ്പൻ ബാറ്റിംഗ് കൂടി ചേർന്നതോടെ പത്തോവറിൽ ഇന്ത്യ 127 റൺസിലെത്തി. 33 പന്തിൽ നിന്ന് സഞ്ജു തന്റെ അർധസെഞ്ചുറി തികച്ചു. അനാവശ്യ ഷോട്ടുകൾ ഒഴിവാക്കി പ്രൊഫഷണൽ രീതിയിൽ ബാറ്റ് ചെയ്ത സഞ്ജു, ഫിഫ്റ്റിക്ക് ശേഷം കൂടുതൽ ആക്രമണകാരിയായി മാറി. അഹമ്മദാബാദിലെ ഗാലറിയെ ആവേശത്തിലാഴ്ത്തി സഞ്ജുവും ഇഷാനും ചേർന്ന് മൈതാനത്തിന്റെ എല്ലാ കോണുകളിലേക്കും പന്ത് പായിച്ചു. കിവീസ് ബൗളിംഗ് നിരയെ നിഷ്പ്രഭമാക്കുന്ന പ്രകടനമായിരുന്നു പിന്നീട് സ്റ്റേഡിയത്തിൽ കണ്ടത്.
പന്ത്രണ്ടാം ഓവറിൽ ലോക്കി ഫെർഗൂസനെ സിക്സറുകൾക്കും ഫോറിനും ശിക്ഷിച്ച സഞ്ജു ഇന്ത്യയെ 150 കടത്തി. രചിൻ രവീന്ദ്രയുടെ 14-ാം ഓവറിലെ അവസാന മൂന്ന് പന്തുകളും അതിർത്തി കടന്നതോടെ ഇന്ത്യൻ സ്കോർ 191-ൽ എത്തി. ഇതിനുപിന്നാലെ 15-ാം ഓവറിൽ ഇഷാൻ കിഷൻ തന്റെ അർധസെഞ്ചുറി പൂർത്തിയാക്കുകയും ഇന്ത്യ 200 റൺസ് മറികടക്കുകയും ചെയ്തു. ഇന്ത്യൻ ബാറ്റർമാർ ആധിപത്യം പുലർത്തിയ ഇന്നിങ്സിൽ 16-ാം ഓവറിൽ ജയിംസ് നീഷാം എറിഞ്ഞ പന്തിലാണ് സഞ്ജു സാംസൺ പുറത്തായത്.
ലോങ് ഓണിൽ ക്യാച്ച് നൽകി മടങ്ങുമ്പോൾ 46 പന്തിൽ അഞ്ച് ഫോറുകളും എട്ട് സിക്സറുകളുമടക്കം 89 റൺസായിരുന്നു സഞ്ജുവിന്റെ സമ്പാദ്യം. സെമിഫൈനലിലെ തന്റെ സ്കോറിന് സമാനമായ പ്രകടനമായിരുന്നു ഇത്. അതേ ഓവറിൽ തന്നെ 25 പന്തിൽ 54 റൺസെടുത്ത ഇഷാൻ കിഷനും ക്യാപ്റ്റൻ സൂര്യകുമാർ യാദവും പുറത്തായത് ഇന്ത്യയെ പെട്ടെന്ന് പ്രതിരോധത്തിലാക്കി. സൂര്യകുമാർ ഗോൾഡൻ ഡക്കായാണ് മടങ്ങിയത്. ഇതോടെ 16 ഓവറിൽ ഇന്ത്യ 204-ന് 4 എന്ന നിലയിലായി.
അവസാന ഓവറുകളിൽ കിവീസ് ബൗളർമാർ റണ്ണൊഴുക്ക് നിയന്ത്രിച്ചതോടെ ഹാർദിക് പാണ്ഡ്യയും തിലക് വർമ്മയും റൺസ് കണ്ടെത്താൻ വിഷമിച്ചു. 18 റൺസെടുത്ത ഹാർദിക് 18-ാം ഓവറിൽ പുറത്തായതോടെ റൺറേറ്റ് അല്പം കുറഞ്ഞു. എന്നാൽ അവസാന ഓവറിൽ ശിവം ദുബെ നടത്തിയ വെടിക്കെട്ട് പ്രകടനം ഇന്ത്യയെ മികച്ച സ്കോറിലെത്തിച്ചു. ആ ഓവറിൽ പിറന്ന 24 റൺസിന്റെ കരുത്തിൽ നിശ്ചിത 20 ഓവറിൽ 255 റൺസെന്ന ഹിമാലയൻ ലക്ഷ്യം ന്യൂസിലൻഡിന് മുന്നിൽ ഉയർത്താൻ ഇന്ത്യയ്ക്ക് സാധിച്ചു.
