തന്റെ ഏറ്റവും പുതിയ ചിത്രമായ അമരന്റെ വിജയത്തില്‍ മുഴുകിയിരിക്കുന്ന നടി സായ് പല്ലവി ഉജ്വലപ്രകടനം നടത്തിയ സിനിമയാണ് നാനി നായകനായ ശ്യാം സിംഘാറോയി. 2021 ല്‍ പുറത്തുവന്നു വന്‍ വിജയമായ സിനിമയ്ക്ക് വലിയ കഷ്ടപ്പാടാണ് നടി ഏറ്റെടുത്തത്. ചിത്രീകരണത്തിനിടെ നേരിട്ട ശാരീരികവും വൈകാരികവുമായ വെല്ലുവിളികള്‍ നടി അടുത്തിടെ ഒരു അഭിമുഖത്തില്‍ പങ്കുവച്ചു.
ഏതാണ്ട് 30 ദിവസം തുടര്‍ച്ചയായി രാത്രിയിലാണ് സിനിമയുടെ മിക്ക രംഗങ്ങളും ചിത്രീകരിച്ചത്. നന്നായി ഉറങ്ങാന്‍ പോലും കഴിയുമായിരുന്നില്ല. ”ശ്യാം സിംഹ റോയിയുടെ ഷൂട്ടിംഗ് സമയത്ത്, ഒരു ദിവസത്തെ ഷൂട്ട് പൂര്‍ത്തിയാക്കിയാല്‍ ഞാന്‍ സന്തോഷിക്കുമായിരുന്നു. ഞങ്ങളുടെ ഭൂരിഭാഗം രംഗങ്ങളും ചിത്രീകരിച്ചത് രാത്രിയിലാണ്. ഉറക്കം നഷ്ടപ്പെടുമെന്നതിനാല്‍ എനിക്ക് രാത്രി ഷൂട്ടുകള്‍ ഇഷ്ടമല്ല. ഒന്നോ രണ്ടോ ദിവസത്തേക്ക് രാത്രി മുഴുവന്‍ ഉണര്‍ന്നിരിക്കാം. എന്നാല്‍ ഇത് ഏകദേശം 30 ദിവസങ്ങള്‍ നീണ്ടുനിന്നു.”
താന്‍ ഒരേസമയം ഒന്നിലധികം പ്രൊജക്ടുകളില്‍ പ്രവര്‍ത്തിക്കുന്നതിനാല്‍ വൈകാരികമായ തകര്‍ച്ച അനുഭവപ്പെട്ടെന്നും ആ സമയത്ത് സഹോദരി പൂജ കണ്ണന്‍ തന്റെ സഹായത്തിനെത്തിയെന്നും സായി പരാമര്‍ശിച്ചു. ”എനിക്ക് സിനിമയില്‍ അഭിനയിക്കാന്‍ ആഗ്രഹമുണ്ട്. പക്ഷേ എനിക്ക് ഒരു ദിവസം അവധി ലഭിച്ചാല്‍ മതിയെന്ന് പറഞ്ഞ് ഞാന്‍ ഒരു ഘട്ടത്തില്‍ കരഞ്ഞത് ഓര്‍ക്കുന്നു, പക്ഷേ ഞാന്‍ അത് ആരോടും പറഞ്ഞില്ല, പക്ഷേ എന്റെ ഇളയ സഹോദരി ഞാന്‍ കരയുന്നത് കണ്ടു. നേരെ നിര്‍മ്മാതാവിന്റെ അടുത്തേക്ക് പോയി. ”അവള്‍ കരയുകയാണ്, അവള്‍ക്ക് ഒരു ദിവസത്തെ അവധി മതി” എന്ന് പറഞ്ഞു.
വിഷയം ഉന്നയിച്ചപ്പോള്‍ നിര്‍മ്മാതാവ് വെങ്കട്ട് ബോയനപള്ളിയുടെ പ്രതികരണം തന്നെ അത്ഭുതപ്പെടുത്തിയെന്ന് താരം പറഞ്ഞു. തന്റെ അവസ്ഥയെക്കുറിച്ച് അയാള്‍ക്ക് അഗാധമായ ഉത്കണ്ഠയുണ്ടായിരുന്ന. തുടര്‍ന്ന് പത്തു ദിവസത്തെ അവധിനല്‍കി. പത്തു ദിവസത്തെ അവധിയെടുക്കൂ. നിങ്ങള്‍ ആഗ്രഹിക്കുന്നതെന്തും ചെയ്യുക. നിങ്ങള്‍ തയ്യാറാകുമ്പോള്‍ തിരികെ വരൂ എന്ന് പറഞ്ഞുകൊണ്ട് അവള്‍ക്ക് 10 ദിവസത്തെ അവധി അനുവദിച്ചു. സിനിമ പിന്നീട് വന്‍ ഹിറ്റാകുകയും ചെയ്തു.
