ഇന്ത്യന്‍ വ്യവസായ ഭീമന്‍ രത്തന്‍ ടാറ്റയുടെ വിയോഗത്തില്‍ ആദരാഞ്ജലികള്‍ അര്‍പ്പിക്കാന്‍ നിരവധി പേരാണ് മുംബൈയുടെ എന്‍സിപിഎയിലേക്ക് എത്തിയത്. എന്നാല്‍ ഏറെ ദു:ഖകരമായ കാഴ്ചകളില്‍ ഒന്ന് അദ്ദേഹം രക്ഷപ്പെടുത്തിയ ടാറ്റയുടെ നായ ഗോവയുടേതായിരുന്നു. 86-ാം വയസ്സില്‍ അസുഖത്തെത്തുടര്‍ന്ന് ഇന്നലെ രാത്രി അന്തരിച്ച രത്തന്‍ ടാറ്റയ്ക്ക് ആദരാഞ്ജലികള്‍ അര്‍പ്പിക്കാന്‍ സെലിബ്രിറ്റികളും നേതാക്കളും മുംബൈയിലെ നാഷണല്‍ സെന്റര്‍ ഫോര്‍ പെര്‍ഫോമിംഗ് ആര്‍ട്സില്‍ (എന്‍സിപിഎ) എത്തിയപ്പോള്‍, ടാറ്റയുടെ നായ ഗോവയായിരുന്നു പ്രത്യേക ശ്രദ്ധനേടിയത്.
ഏതാനും വര്‍ഷം മുമ്പ് ഗോവയില്‍ വച്ച് തന്നെ രക്ഷപ്പെടുത്തി ബോംബെ ഹൗസില്‍ എത്തിച്ച തന്റെ യജമാനനെ അവസാനമായി ഒരുനോക്ക് കാണാനാണ് ഗോവ എത്തിയത്. ജീവിതകാലം മുഴുവന്‍ മൃഗസ്‌നേഹിയായ രത്തന്‍ ടാറ്റ പരിക്കേറ്റ തെരുവ് നായ്ക്കളെ പതിവായി സഹായിക്കുകയും തന്റെ ഇന്‍സ്റ്റാഗ്രാം അക്കൗണ്ടില്‍ ദത്തെടുക്കല്‍ അപ്പീലുകള്‍ പതിവായി പോസ്റ്റ് ചെയ്യുകയും ചെയ്തിരുന്നു.
വര്‍ഷങ്ങളായി ടാറ്റ ജീവനക്കാരനായ ശന്തനു നായിഡു ഒരു ചെറുകിട ബിസിനസ് സംരംഭം ആരംഭിച്ചിരുന്നു, റോഡില്‍ വാഹനം ഇടിക്കാതിരിക്കാന്‍ തെരുവ് നായ്ക്കളുടെ മേല്‍ റിഫ്‌ളക്റ്റീവ് കോളറുകള്‍ സ്ഥാപിക്കാന്‍ ലക്ഷ്യമിട്ടായിരുന്നു ഇത് . കമ്പനിക്ക് ധനസഹായം നല്‍കണമെന്ന് ആവശ്യപ്പെട്ട് അദ്ദേഹം ടാറ്റയ്ക്ക് കത്തെഴുതി. തന്റെ സഹായിയായി ജോലി വാഗ്ദാനം ചെയ്തുകൊണ്ട് ടാറ്റ പ്രതികരിച്ചു. ടാറ്റ ട്രസ്റ്റിന്റെ മാനേജരായി അദ്ദേഹത്തെ നിയമിച്ചു. നായകളോടുള്ള അദ്ദേഹത്തിന്റെ സ്‌നേഹം അങ്ങനെയാണ്, ഒരിക്കല്‍ രത്തന്‍ ടാറ്റ തന്റെ രോഗിയായ നായയുടെ അരികില്‍ നില്‍ക്കാന്‍ ഒരു രാജകീയ അവാര്‍ഡ് ചടങ്ങ് ഒഴിവാക്കിയ സംഭവം പോലുമുണ്ട്.
2018-ല്‍, ടാറ്റയുടെ മികച്ച ജീവകാരുണ്യ പ്രവര്‍ത്തനങ്ങള്‍ക്കുള്ള അംഗീകാരമായി ബക്കിംഗ്ഹാം കൊട്ടാരത്തില്‍ ഒരു ലൈഫ് ടൈം അച്ചീവ്മെന്റ് അവാര്‍ഡ് വാഗ്ദാനം ചെയ്യപ്പെട്ടു. ചടങ്ങില്‍ പങ്കെടുക്കാന്‍ അദ്ദേഹം ആദ്യം സമ്മതിച്ചിരുന്നു. ചടങ്ങിന് ദിവസങ്ങള്‍ക്ക് മുമ്പ്, അദ്ദേഹത്തിന്റെ വളര്‍ത്തുനായയ്ക്ക് ഗുരുതരമായ അസുഖം ബാധിച്ചു. ഒരു രാത്രിയില്‍ ടാറ്റയില്‍ നിന്ന് 11 മിസ്ഡ് കോളുകള്‍ ലഭിച്ചതായി വ്യവസായി സുഹേല്‍ സേത്ത് വെളിപ്പെടുത്തിയ വീഡിയോയില്‍ പറഞ്ഞു. തിരികെ വിളിച്ചപ്പോള്‍, തന്റെ നായയ്ക്ക് അസുഖം ബാധിച്ചതായി ടാറ്റ വിശദീകരിച്ചു.
‘എനിക്ക് അവനെ വിട്ട് വരാന്‍ കഴിയില്ല.’ . സേത്തിന്റെ നിര്‍ബന്ധം വകവയ്ക്കാതെ, ടാറ്റ തന്റെ പ്രിയപ്പെട്ട വളര്‍ത്തുമൃഗത്തെ പരിപാലിക്കുന്നതിനായി രാജകീയ ചടങ്ങ് ഒഴിവാക്കാന്‍ തീരുമാനിച്ചു. ചാള്‍സ് മൂന്നാമനെ വരെയാണ് ഈ പ്രവര്‍ത്തി ആകര്‍ഷിച്ചത്.
