ലോകത്തുടനീളമായി 1200 കേന്ദ്രങ്ങളില്‍ അല്ലുഅര്‍ജുന്റെ ‘പുഷ്പ 2: ദി റൂള്‍’ ബിഗ് സ്‌ക്രീനുകളില്‍ എത്തുമ്പോള്‍ വലിയ പ്രതീക്ഷയോടെയാണ് ആരാധകര്‍ കാത്തിരിക്കുന്നത്. രാജ്യത്തുടനീളമുള്ള ആരാധകര്‍ അതിന്റെ ഗംഭീരമായ റിലീസ് ആഘോഷിക്കുമ്പോള്‍, ചിത്രം ഇതിനകം തന്നെ നിരവധി പൈറസി വെബ്സൈറ്റുകളില് ചോര്‍ന്നു കഴിഞ്ഞതായാണ് പുറത്തുവരുന്ന റിപ്പോര്‍ട്ടുകള്‍. ടൈംസ് നൗ, പിങ്കവില്ല ഉള്‍പ്പെടെയുള്ള വെബ്‌സൈറ്റുകള്‍ പുറത്തുവിടുന്ന റിപ്പോര്‍ട്ടുകള്‍ അനുസരിച്ച് സിനിമയുടെ എച്ച്, ഡി പതിപ്പുകളാണ് വന്നിരിക്കുന്നത്.
അല്ലു അര്‍ജുനും രശ്മിക മന്ദാനയും ഒന്നിച്ചഭിനയിച്ച ചിത്രം റിലീസ് ചെയ്ത് മണിക്കൂറുകള്‍ക്കകമാണ് പൈറസിക്ക് ഇരയായിട്ടുള്ളത്. ടൈംസ് നൗ പറയുന്നതനുസരിച്ച്, മൂവിറൂള്‍സ്, തമില്‍റോക്കേഴ്‌സ്, ഫിലിമിസില്ല, ടെലിഗ്രാം എന്നിവയുള്‍പ്പെടെ നിരവധി വെബ്സൈറ്റുകളില് സിനിമ ലഭ്യമാണ്. എച്ച്ഡി, 720പി, 1080പി, 480പി, 360പി, 240പി, കൂടാതെ മറ്റ് റെസല്യൂഷനുകളിലും ഈ പൈറസി സൈറ്റുകളില്‍ നിന്ന് പുഷ്പ 2 ഡൗണ്‍ലോഡ് ചെയ്യാമത്രേ. ഒരു ക്ലിക്കില്‍ ആളുകള്‍ക്ക് സുകുമാറിന്റെ സംവിധാന പ്രയത്‌നം സൗജന്യമായി കാണാന്‍ കഴിയും.
തമിഴ് യോഗി, ഇബൊമ്മ, തമിഴ് ബ്ലാസ്റ്റേഴ്സ്, 9എക്‌സ് മൂവീസ്, ബോളിഫോര്‍യു, മൂവിസ്ദ, ജെയ്ഷാമൂവീസ് എന്നിവയും സിനിമ ഓണ്‍ലൈനില്‍ ചോര്‍ന്ന മറ്റ് വെബ്സൈറ്റുകളില് ഉള്‍പ്പെടുന്നു. പുഷ്പ 2 ഓണ്‍ലൈനില്‍ ചോര്‍ന്നതോടെ ഇത് സിനിമയുടെ ബിസിനസിനെ ബാധിക്കുമോ എന്ന് കണ്ടറിയണം. അതേസമയം അഡ്വാന്‍സ് ബുക്കിംഗിലൂടെ തന്നെ വമ്പന്‍ പ്രകടനമാണ് സിനിമ നടത്തുന്നത്. സിനിമയുടെ ആദ്യ പ്രദര്‍ശനത്തിനായി ഹൈദരാബാദിലും ബംഗലുരുവിലുമെല്ലാം വന്‍ തിരക്കാണ്. ഹൈദരാബാദില്‍ തിക്കിലും തിരക്കിലും പെട്ട് ഒരു യുവതി മരണമടയുകയും അവരുടെ മക്കള്‍ക്കും ഭര്‍ത്താവിനും പരിക്കേല്‍ക്കുന്ന സംഭവം വരെ റിപ്പോര്‍ട്ട് ചെയ്യപ്പെട്ടിരിക്കുകയാണ്.
അല്ലു അര്‍ജുനെയും രശ്മികയെയും കൂടാതെ ആവേശം താരം ഫഹദ് ഫാസിലും ചിത്രത്തില്‍ പ്രധാന കഥാപാത്രത്തെ അവതരിപ്പിക്കുന്നു. സുകുമാര്‍ സംവിധാനം ചെയ്ത പുഷ്പ 2 തീയറ്ററുകളില്‍ മികച്ച പ്രതികരണം നേടി മുന്നേറുകയാണ്. സിനിമയെക്കുറിച്ചുള്ള നിങ്ങളുടെ അഭിപ്രായങ്ങള്‍ ചുവടെയുള്ള അഭിപ്രായങ്ങളില്‍ ഞങ്ങളുമായി പങ്കിടുക.
