അതിവേഗക്രിക്കറ്റിന് ചേരാത്തവനെന്നാണ് ചേതേശ്വര് പൂജാരയ്ക്ക് പണ്ടുമുതലുള്ള പേര്. ദേശീയ ടീമില്‍ അവസരം നിഷേധിക്കപ്പെട്ട താരം കൗണ്ടി ക്രിക്കറ്റിലായിരുന്നു അഭയം കണ്ടെത്തിയിരുന്നത്. കൗണ്ടിക്രിക്കറ്റിലും കളി അവസാനിച്ചതോടെ പൂജാരയുടെ അടുത്ത നീക്കം എന്താണെന്ന ചോദ്യം ഉയരുകയാണ്. കൗണ്ടി ക്രിക്കറ്റില്‍ സസ്സെക്സിന് വേണ്ടി കളിച്ചിരുന്ന പൂജാരയുടെ കാലാവധി അവസാനിച്ചതോടെ ഇനി ആഭ്യന്തര ക്രിക്കറ്റിലെ പുതിയ അവസരം നോക്കുകയാണ് പൂജാര.
മൂന്ന് സീസണുകളില്‍ കൗണ്ടി ചാമ്പ്യന്‍ഷിപ്പില്‍ സസെക്സിനായി കളിച്ച ശേഷം, ക്ലബ് ഒടുവില്‍ പൂജാരയെ അദ്ദേഹം ഒഴിവാക്കിയിരിക്കുകയാണ്. വരാനിരിക്കുന്ന സീസണില്‍ പൂജാരയുടെ പകരക്കാരനായി ഡാനിയല്‍ ഹ്യൂസിനെ സസെക്സ് തിരഞ്ഞെടുത്തതോടെയാണ് പൂജാരയുടെ കാര്യത്തില്‍ പുതിയ അനിശ്ചിതത്വം വന്നിരിക്കുന്നത്. 2025 സീസണില്‍ കൗണ്ടി ക്രിക്കറ്റ് ഇല്ലാത്തതിനാല്‍, ആഭ്യന്തര ക്രിക്കറ്റ് കളിക്കാന്‍ പൂജാര തന്റെ രാജ്യത്തേക്ക് മടങ്ങാന്‍ സാധ്യതയുണ്ട്. അദ്ദേഹത്തിന് ഇന്ത്യന്‍ ക്രിക്കറ്റ് ടീമിന്റെ വാതിലും അടഞ്ഞിരിക്കുകയാണ്.
കഴിഞ്ഞ രഞ്ജി സീസണില്‍ മികച്ച പ്രകടനം നടത്തിയെങ്കിലും ഇന്ത്യ ഇംഗ്ളണ്ട് ടെസ്റ്റ് ടീമിലേക്ക് ക്ഷണം കിട്ടിയിരുന്നില്ല. കെ എല്‍ രാഹുലിനും ശ്രേയസ് അയ്യര്‍ക്കും പരിക്കേറ്റ് കാര്യങ്ങള്‍ കൂടുതല്‍ മോശമായിട്ടും ധ്രുവ് ജുറല്‍, സര്‍ഫറാസ് ഖാന്‍ തുടങ്ങിയ യുവതാരങ്ങള്‍ക്ക് അവസരം നല്‍കാന്‍ ഇന്ത്യ തീരുമാനിച്ചതോടെ പൂജാരയുടെ ഇന്ത്യന്‍ ടീമിലെ കാലാവധി കഴിഞ്ഞെന്ന് എല്ലാവരും വിശ്വസിക്കുന്നു.
ഇന്ത്യയിലേക്ക് തിരിച്ചുവന്ന് ആഭ്യന്തര ക്രിക്കറ്റില്‍ ശ്രദ്ധ കേന്ദ്രീകരിക്കുക എന്നതാണ് ചേതേശ്വര് പൂജാരയുടെ മുന്നിലുള്ള ഓപ്ഷനുകളിലൊന്ന്. മറുവശത്ത്, പരിചയസമ്പന്നനായ പൂജാരയ്ക്ക് മറ്റ് കൗണ്ടി ക്രിക്കറ്റ് ക്ലബ്ബുകളുമായി ഒരു പുതിയ കരാര്‍ വേണമെങ്കില്‍ ചര്‍ച്ച ചെയ്യാം.
പൂജാര ആഭ്യന്തര ക്രിക്കറ്റ് കളിക്കുന്നത് തുടരാമെങ്കിലും അത് ഇന്ത്യന്‍ ക്രിക്കറ്റ് ടീമിലേക്കുള്ള വഴി എളുപ്പമാകില്ല. കഴിഞ്ഞ വര്‍ഷത്തെ പോലെ ദേശീയ ടീമിന്റെ വാതിലുകള്‍ അടഞ്ഞിരിക്കുകയാണ്. യുവതാരങ്ങള്‍ക്ക് അവസരം നല്‍കുന്നതിലാണ് ടീം ഇപ്പോള്‍ ശ്രദ്ധ കേന്ദ്രീകരിക്കുന്നത്.
