ബോളിവുഡില് ഇടയ്ക്കിടയ്ക്ക് വില്ലന്വേഷങ്ങളില് എത്തുന്ന പൃഥ്വിരാജ് സുകുമാരനും ഇന്ത്യന് മുഴുവന് ഓടിനടന്ന് അഭിനയിക്കുന്ന ഫഹദ് ഫാസിലും ദക്ഷിണേന്ത്യയിലെ മാത്രമല്ല ഇന്ത്യ മുഴുവനും ആരാധകരുണ്ട്. ഫഹദ് മാരീസനുമായി തമിഴില് എത്തിയിരിക്കെ കാജോള്, ഇബ്രാഹിം അലി ഖാന് എന്നിവര്ക്കൊപ്പം സര്സമീന് ആയിരുന്നു പൃഥ്വിയുടെ അവസാന സിനിമ. ഇന്ത്യമുഴുവന് ശ്രദ്ധിക്കുന്ന രണ്ടു നടന്മാരും തമ്മിലുള്ള അസാധാരണമായ ബോണ്ടിനെക്കുറിച്ച് വെളിപ്പെടുത്തുകയാണ് നടനും സംവിധായകനുമായ പൃഥ്വി.
സൂമുമായുള്ള ഒരു പ്രത്യേക അഭിമുഖത്തിലാണ് ഫഹദ് ഫാസിലുമായി താന് എങ്ങനെ അടുത്തിടപഴകിയെന്നും അദ്ദേഹം പങ്കുവച്ചത്. ”സിനിമാക്കാരുടെ മക്കള് എന്ന നിലയില് ഞങ്ങള് കുട്ടിക്കാലം മുതല് പരസ്പരം അറിയാവുന്നവരും ഒരുമിച്ച് സമയം ചെലവഴിച്ചിട്ടുള്ളവരുമാണ്. ഫഹദിന്റെ അച്ഛന് മലയാള ചലച്ചിത്ര വ്യവസായത്തിലെ ഒരു ഇതിഹാസ ചലച്ചിത്ര സംവിധായകന്, നിര്മ്മാതാവ് എന്ന നിലയില് വളരെയധികം ബഹുമാനിക്കപ്പെടുന്നു. അദ്ദേഹം മോഹന്ലാല് ഉള്പ്പെടെ നിരവധി സൂപ്പര്സ്റ്റാറുകളെ പരിചയപ്പെടുത്തി. രസകരമായ കാര്യം, എന്റെ കരിയര് ആരംഭിക്കുന്നതിലും അദ്ദേഹവും ഒരു പങ്കുവഹിച്ചു.
ഗജിനി ഫെയിം അസിനോടൊപ്പമുള്ളതായിരുന്നു തന്റെ ആദ്യ സ്ക്രീന് ടെസ്റ്റെന്നും താരം പറഞ്ഞു. അതിന് പിന്നിലെ രസകരമായ ഒരു സംഭവം അനുസ്മരിച്ചുകൊണ്ട് താരം പങ്കുവെച്ചു. ”ഞാന് പന്ത്രണ്ടാം ക്ലാസില് പഠിക്കുമ്പോള്, അദ്ദേഹം എന്നോടൊപ്പം ഒരു ടെസ്റ്റ് ഷൂട്ട് ചെയ്യാന് തീരുമാനിച്ചു. അതെന്തിനാണെന്ന് എനിക്കറിയില്ല. പക്ഷേ അന്ന് എന്റെ സഹതാരം അസിന് തോട്ടുങ്കല് എന്ന പെണ്കുട്ടിയാണ്. ഞങ്ങള് ഫഹദിന്റെ വീട്ടിലായിരുന്നു ടെസ്റ്റ് ഷൂട്ട് നടത്തിയത്. ഞാന് ആക്ഷന് സിനിമകള്ക്ക് പാകമാണെന്ന് അന്ന് ആദ്യമായി പറഞ്ഞത് അദ്ദേഹമായിരുന്നു. അദ്ദേഹം എന്നെ രഞ്ജിത്ത് സാറിനോട് ശുപാര്ശ ചെയ്തു, ഇത് എന്റെ അരങ്ങേറ്റ ചിത്രത്തിലേക്ക് നയിച്ചു.”
”ഞാന് അന്ന് ചെയ്ത ആ ടെസ്റ്റ് ഷൂട്ട് പിന്നീട് ഫഹദിന്റെ ആദ്യ ചിത്രമായി മാറി. ഞങ്ങള് പരസ്പരം വളരെക്കാലമായി അറിയാം, അദ്ദേഹവുമായി സഹകരിക്കാനുള്ള അവസരത്തില് ഞാന് ആവേശത്തിലാണ്.” പൃഥ്വി ടൈംസ് നൗവിന് നല്കിയ അഭിമുഖത്തില് പറഞ്ഞു. മേഘ്ന ഗുല്സാര് സംവിധാനം ചെയ്യുന്ന ‘ദയ്ര’യില് പൃഥ്വിരാജ് കരീന കപൂര് ഖാനൊപ്പം അഭിനയിക്കും. മഹേഷ് ബാബുവിനും പ്രിയങ്ക ചോപ്രയ്ക്കുമൊപ്പം എസ്എസ് രാജമൗലിയുടെ എസ്എസ്എംബി 29 ലും അദ്ദേഹം അഭിനയിക്കും.
