സ്ഥിരമായി മദ്യപിക്കുന്നവര് ഒരു മാസത്തേക്ക് മദ്യം ഒഴിവാക്കിയാല് ശരീരത്തിന് സംഭവിക്കുന്ന മാറ്റങ്ങള് ഒന്ന് പരിശോധിക്കാം. സ്ഥിരമായ മദ്യപാനം നിര്ജലീകരണം, കുറഞ്ഞ ധാരണശേഷി, ആശയക്കുഴപ്പം, ഉറക്കത്തകരാര്, ക്ഷീണം തുടങ്ങിയ ആരോഗ്യപ്രശ്നങ്ങള് ശരീരത്തിന് ഉണ്ടാക്കാറുണ്ട്. അമിത കലോറി, പ്രമേഹം, ഉയര്ന്ന രക്തസമ്മര്ദ്ദം, ഓട്ടോഇമ്മ്യൂണ് രോഗങ്ങള് എന്നിവയും മദ്യപാനത്തിന്റെ ഫലങ്ങളാണ്. കരളിന്റെ പ്രശ്നങ്ങള്, അമിതവണ്ണം തുടങ്ങിയ പ്രശ്നങ്ങള് വേറെയും.
മദ്യപാനികള് മദ്യം ഉപേക്ഷിക്കുമ്പോള് സംഭവിക്കുന്ന മാറ്റങ്ങള് വിവരിക്കുകയാണ് ഗുരുഗ്രാം മാരെങ്കോ ഏഷ്യ ഹോസ്പിറ്റല്സിലെ ഗ്യാസ്ട്രോളജി ആന്ഡ് ഹെപറ്റോബൈലിയറി സയന്സ് സീനിയര് കണ്സള്ട്ടന്റ് ഡോ.വിഭോര് പരീഖ്.
- തുടക്കത്തില് ചില പിന്വലിയല് ലക്ഷങ്ങളൊക്കെ ഉണ്ടായേക്കാം. ഉത്കണ്ഠ, തടസ്സപ്പെട്ട ഉറക്കം, നിര്ജലീകരണം, ദേഷ്യം എന്നിങ്ങനെയുള്ള പ്രശ്നങ്ങള് നേരിടാം. പക്ഷേ, ഒന്നോ രണ്ടോ ആഴ്ച കൊണ്ട് ഇവയെല്ലാം മാറുന്നതാണ്.
- എന്നും മദ്യത്തെ വിഘടിപ്പിച്ച് ക്ഷീണിച്ച കരളിന് കുറച്ച് വിശ്രമം ലഭിക്കും. കരളില് അടിഞ്ഞു കൂടിയ കൊഴുപ്പ് കുറേശ്ശയായി മാറി തുടങ്ങാനും ഈ സമയം സഹായിക്കും. കരള് പതിയെ ആരോഗ്യം വീണ്ടെടുക്കും.
- സ്ഥിരം മദ്യപാനികളുടെ വയറില് സാധാരണയിലും കവിഞ്ഞ ദഹനരസങ്ങള് ഉത്പാദിപ്പിക്കപ്പെടുന്നത് വയറിന്റെ ആവരണത്തെ ക്ഷയിപ്പിക്കും. ഇവിടെ നീര്ക്കെട്ടും മറ്റും ഉണ്ടാകാനും മദ്യം കാരണമാകും. മദ്യപാനം നിര്ത്തുന്നതോടെ വയറിന്റെ ആവരണവും പതിയെ ആരോഗ്യം പുനസ്ഥാപിക്കാന് തുടങ്ങും.
- മദ്യപാനം ഒഴിവാക്കുന്നതിലൂടെ നിര്ജലീകരണം കുറയുകയും തലവേദന പതിയെ ശമിക്കാന് തുടങ്ങുകയും ചെയ്യും. രക്തസമ്മര്ദ്ദവും കുറയും. മൂഡും ശ്രദ്ധയും കൂടുതല് മെച്ചപ്പെടും.
- കുറഞ്ഞത് 30 ദിവസത്തേക്ക് മദ്യം ഒഴിവാക്കിയാല് കൊളസ്ട്രോളും രക്തത്തിലെ പഞ്ചസാരയും അര്ബുദവുമായി ബന്ധപ്പെട്ട പ്രോട്ടീനുകളുടെ തോതും കുറയുമെന്നും പഠനങ്ങള് ചൂണ്ടിക്കാണിക്കുന്നു.
മദ്യപാനം ഒഴിവാക്കാന് ശ്രമിക്കുമ്പോള് ശരീരം പ്രകടിപ്പിക്കുന്ന പിന്വലിയല് ലക്ഷണങ്ങളെയും ആസക്തിയെയും എതിര്ത്ത് തോല്പ്പിക്കല് അത്ര എളുപ്പമല്ല. എന്നാല് ദൃഢനിശ്ചയത്തോടെ ശ്രമിച്ചാല് സാധ്യമാണ്. ശരീരത്തിന്റെ ജലാംശം നിലനിര്ത്താന് വെള്ളവും കരിക്കിന് വെള്ളവും ജ്യൂസും ഉള്പ്പെടെ ആരോഗ്യകരമായ പാനീയങ്ങള് കുടിക്കേണ്ടതാണ്.
സുഹൃത്തുക്കളും കുടുംബക്കാരുമൊക്കെ ഒത്തു ചേരുമ്പോള് ആഘോഷത്തിന് മദ്യത്തിന് പകരം പഴച്ചാറുകളും മോക്ടെയ്ലുകളും ആകാം. പോഷകസമ്പുഷ്ടമായ ഭക്ഷണവും കഴിക്കേണ്ടതാണ്. ആസക്തി മറികടക്കാന് മനസ്സിനെ ആകര്ഷിക്കുന്ന പുതിയൊരു ഹോബി ആരംഭിക്കാവുന്നതാണ്. പ്രചോദനത്തിനും പിന്തുണയ്ക്കും അഭ്യുദയകാംക്ഷികളായ സുഹൃത്തുക്കളുടെയും കുടുംബാംഗങ്ങളുടെയും ബന്ധുക്കളുടെയും സഹായവും തേടാവുന്നതാണ്.
