ഗോസിപ്പ് കോളങ്ങളില്‍ അടുത്തിടെ നിറഞ്ഞു നില്‍ക്കുന്ന പേരാണ് ബോളിവുഡ് നടി നിമ്രത് കൗറിന്റേത്. അഭിഷേക് ബച്ചനുമായുള്ള ഡേറ്റിംഗ് കിംവദന്തികളാണ് പ്രധാനമായും പാപ്പരാസികളുടെ കണ്ടുപിടുത്തം. ഇരുവരും ദസ്വി എന്ന സിനിമയിലാണ് ഒരുമിച്ച് അഭിനയിച്ചത്. ഐശ്വര്യയുമായി അഭിഷേകിന്റെ ഡിവോഴ്‌സ് വാര്‍ത്തകള്‍ നിലനില്‍ക്കുന്നതും നിമ്രത്-അഭിഷേക് ബന്ധത്തെ കുറിച്ചുള്ള ചര്‍ച്ചയ്ക്ക് കാരണവുമായി.
ഇപ്പോള്‍ അഭിഷേക് ബച്ചനുമായുള്ള ഡേറ്റിംഗ് കിംവദന്തികളെ കുറിച്ച് തുറന്ന് പറയുകയാണ് നിമ്രത്. ഒരു അഭിമുഖത്തിലാണ് നടി തന്റെ സ്വകാര്യ ജീവിതത്തെക്കുറിച്ചുള്ള തന്റെ നിലപാട് വ്യക്തമാക്കിയത്. ”എനിക്ക് എന്തു ചെയ്യാന്‍ കഴിയും, ആളുകള്‍ ഇപ്പോഴും അവര്‍ക്കാവശ്യമുള്ളത് പറയും. അത്തരം ഗോസിപ്പുകള്‍ നിര്‍ത്തില്ല, എന്റെ ജോലിയില്‍ ശ്രദ്ധ കേന്ദ്രീകരിക്കാന്‍ ഞാന്‍ ആഗ്രഹിക്കുന്നു.” – നിമ്രത് വ്യക്തമാക്കി.
അഭിഷേകുമായുള്ള ബന്ധത്തെക്കുറിച്ച് സോഷ്യല്‍ മീഡിയയില്‍ ആഴ്ചകളായി പ്രചരിക്കുന്ന അഭ്യൂഹങ്ങള്‍ക്ക് ശേഷമാണ് നിമ്രത്തിന്റെ പ്രതികരണം. താന്‍ തന്റെ സ്വകാര്യതയെ വിലമതിക്കുന്നുവെന്നും അടിസ്ഥാനരഹിതമായ ഊഹാപോഹങ്ങളില്‍ നിന്ന് മാറി നില്‍ക്കാന്‍ ആഗ്രഹിയ്ക്കുന്നുവെന്നും താരം കൂട്ടിച്ചേര്‍ത്തു.
