തമിഴ്‌സിനിമാവേദിയെ ഒന്നടങ്കം ദു:ഖത്തിലാഴ്ത്തി നടന്‍ വിജയകാന്തിന്റെ മരണത്തില്‍ തമിഴ് സൂപ്പര്‍താരം വിജയ്ക്ക് ചെരുപ്പേറ്. വിജയകാന്തിന്റെ സംസ്‌ക്കാര ചടങ്ങിനിടയില്‍ വിജയകാന്തിന് അന്തിമോപചാരം അര്‍പ്പിച്ച ശേഷം മടങ്ങുമ്പോഴായിരുന്നു ഏറ്. വിജയ് യെ ജനക്കൂട്ടത്തിനിടയില്‍ സുരക്ഷാഭടന്മാര്‍ കൊണ്ടുപോകുമ്പോള്‍ നടന്റെ തലയ്ക്ക് പിന്നിലൂടെ ഒരു സ്‌ളിപ്പര്‍ പറന്നുപോകുന്നതും തലയില്‍ കൊള്ളുന്നതിന്റെയും വീഡിയോ എക്‌സില്‍ പ്രത്യക്ഷപ്പെട്ടിട്ടുണ്ട്.
മാധ്യമങ്ങളും ആരാധകരുമായി വിജയ് യെ ചുറ്റി ഒരു വന്‍ ജനക്കൂട്ടമാണ് നിന്നിരുന്നത്. ഇതിനിടയിലാണ് അജ്ഞാതന്‍ താരത്തെ ലക്ഷ്യമാക്കി ചെരുപ്പെറിഞ്ഞത്. അതേസമയം ആള്‍ക്കൂട്ടത്തിനിടയില്‍ മറ്റൊരു ആരാധകന്‍ താരത്തെ ചുംബിക്കാന്‍ ശ്രമം നടത്തിയിരുന്നു. ജനക്കൂട്ടത്തിന്റെ ഈ രീതിയിലുള്ള പെരുമാറ്റം കാരണമാണ് വലിയ ജനക്കൂട്ടം വരുന്ന പരിപാടികള്‍ സാധാരണഗതിയില്‍ സൂപ്പര്‍താരങ്ങള്‍ ഒഴിവാക്കുന്നത്.
അതേസമയം തമിഴ് സിനിമാവേദിയിലെ ഒട്ടേറെ നടന്മാരുമായി വലിയ അടുപ്പമുള്ളയാളാണ് വിജയകാന്ത്. വിജയ് യുടെ ആദ്യകാല സിനിമയായ സെന്തൂരപാണ്ടിയിലെ നായകന്‍ വിജയകാന്തായിരുന്നു. വിജയ് യുടെ പിതാവ് എസ്.എ. ചന്ദ്രശേഖര്‍ സംവിധാനം ചെയ്ത സിനിമയില്‍ വിജയ് യുടെ ജേഷ്ഠനായിട്ടായിരുന്നു വിജയകാന്ത് അഭിനയിച്ചത്. അന്നുമുതല്‍ ഇരുവരും തമ്മില്‍ വലിയ ബന്ധം കാത്തുസൂക്ഷിച്ചിരുന്നു. നിറകണ്ണുകളോടെയായിരുന്നു വിജയകാന്തിന് വിജയ് ആദരം അര്‍പ്പിച്ചത്. വിജയകാന്തുമായുള്ള ബന്ധത്തെക്കുറിച്ച് മാധ്യമങ്ങളോട് പ്രതികരിക്കുമ്പോള്‍ വിജയ് പൊട്ടിക്കരയുകയും ചെയ്തു.
