33 വയസ്സുള്ള ഇന്ത്യൻ യുവാവ് ആരോഗ്യ വിദഗ്ദ്ധർക്ക് ഒരു അത്ഭുതമായി മാറിയിരിക്കുന്നു. കാരണം, ഇദ്ദേഹം ഭക്ഷണമേ കഴിക്കുന്നില്ല, പകരം ദിവസവും 7-8 ലിറ്റർ ഉപയോഗിച്ച എഞ്ചിൻ ഓയിലും ചായയും മാത്രം കഴിച്ചാണ് ജീവിക്കുന്നതെന്ന് അവകാശപ്പെടുന്നു. ഇദ്ദേഹത്തിന്റെ അവകാശവാദങ്ങളും ജീവിതരീതിയും ഡോക്ടർമാരെയും ശാസ്ത്രജ്ഞരെയും ഞെട്ടിച്ചിരിക്കുകയാണ്. ഇതു ശരിയാണെങ്കില് അദ്ദേഹം ആരോഗ്യവാനായിരിക്കുന്നത് എന്തുകൊണ്ടാണെന്ന് വിശദീകരിക്കാൻ അവർക്ക് സാധിക്കുന്നില്ല.
കർണാടകയിൽ നിന്നുള്ള ഇദ്ദേഹം, ഷിമോഗയിലെ ഓയിൽ കുമാർ എന്നാണ് അറിയപ്പെടുന്നത്. ഈ അസാധാരണമായ ജീവിതരീതി അയ്യപ്പസ്വാമിയുടെ അനുഗ്രഹം കൊണ്ടാണെന്നാണ് ഇദ്ദേഹം പറയുന്നത്. അരിയും ചപ്പാത്തിയുമടക്കമുള്ള സാധാരണ ഭക്ഷണം കഴിക്കുന്നതിന് പകരം, ദിവസവും 7-8 ലിറ്റർ ഉപയോഗിച്ച എഞ്ചിൻ ഓയിലും ചായയും കഴിച്ചാണ് ഇദ്ദേഹം ജീവിക്കുന്നത്. ഒരു സന്യാസിയെപ്പോലെ കർണാടകയിൽ അലഞ്ഞുതിരിയുന്ന ഓയിൽ കുമാർ മോട്ടോർ ഓയിൽ കുടിച്ച് സന്തോഷത്തോടെ ജീവിക്കുന്നു. ഇതുവരെ ഇദ്ദേഹത്തിന് ആശുപത്രിയിൽ പോകേണ്ടി വന്നിട്ടില്ലെന്നും ആരോഗ്യവാനായി ജീവിക്കുന്നുവെന്നും റിപ്പോർട്ടുകൾ പറയുന്നു.
@avalakki_pavalakki എന്ന ഇൻസ്റ്റാഗ്രാം അക്കൗണ്ടാണ് ഇദ്ദേഹത്തിന്റെ ഈ അസാധാരണമായ ജീവിതരീതി റീൽ രൂപത്തിൽ ചിത്രീകരിച്ചത്. ഈ വിചിത്രമായ ഭക്ഷണക്രമത്തിൽ അത്ഭുതപ്പെട്ട അക്കൗണ്ട് ഉടമ, മനുഷ്യർക്ക് ശരിക്കും എഞ്ചിൻ ഓയിൽ കുടിക്കാൻ കഴിയുമോ എന്ന് സ്ഥിരീകരിക്കാൻ AI-യോട് ചോദിച്ചു, അതിന് ഞെട്ടിക്കുന്ന പ്രതികരണമാണ് ലഭിച്ചത്.
എഞ്ചിൻ ഓയിൽ കുടിക്കുന്നത് മനുഷ്യശരീരത്തിന് ശരിക്കും ദോഷകരമാകുമെന്നും അത് ഗുരുതരമായ ദുരന്തത്തിലേക്ക് നയിച്ചേക്കാമെന്നും AI പറഞ്ഞു. ഇത് വിഷാംശമുള്ളതും മരണത്തിലേക്കും കോമയിലേക്കും നയിച്ചേക്കാമെന്നും AI പറയുന്നു.
“അയ്യപ്പസ്വാമിയുടെ അനുഗ്രഹം കൊണ്ടാണ് ഈ ജീവിതം സാധ്യമായതെന്ന് കുമാർ വിശ്വസിക്കുന്നു. അദ്ദേഹത്തിന്റെ ഈ കഥ കർണാടകയിലെയും ഇന്ത്യയിലെയും ഏറ്റവും കൂടുതൽ ചർച്ച ചെയ്യപ്പെടുന്ന വൈദ്യശാസ്ത്രപരമായ അത്ഭുതങ്ങളിലൊന്നായി മാറിയിരിക്കുന്നു,” അക്കൗണ്ട് ഉടമ റീലിന് അടിക്കുറിപ്പ് നൽകി.
വൈറൽ ക്ലിപ്പിൽ, ആളുകൾ കുമാറിന് ഭക്ഷണം നൽകാൻ ശ്രമിക്കുന്നുണ്ടെങ്കിലും അദ്ദേഹം അത് നിരസിക്കുകയും പകരം കുപ്പിയിൽ നിന്ന് എണ്ണ കുടിക്കുകയും ചെയ്യുന്നത് കാണാം. എഞ്ചിൻ ഓയിൽ വളരെ വിഷമുള്ളതാണെന്നും അതിൽ ഹൈഡ്രോകാർബണുകളും ഹെവി മെറ്റലുകളും അടങ്ങിയിട്ടുണ്ടെന്നും വിദഗ്ധർ വിശദീകരിക്കുന്നു, ഇത് കരൾ, വൃക്കകൾ, ശ്വാസകോശം, തലച്ചോറ് എന്നിവയെ നശിപ്പിക്കാൻ സാധ്യതയുണ്ടെന്നും അവർ കൂട്ടിച്ചേർത്തു.
