അര്‍നോള്‍ഡ് ഷ്വാസ്നെഗറിന്റെ ദി ടെര്‍മിനേറ്ററും അതിന്റെ ഇന്‍സ്റ്റോള്‍മെന്റുകളും ഹോളിവുഡിലെ ഏറ്റവും ജനപ്രിയമായ ആക്ഷന്‍ ചിത്രങ്ങളില്‍ ചിലതാണ്. സൈബോര്‍ഗുകളുടെ കഥ പറഞ്ഞ ഫ്രഞ്ചൈസിയിലെ എത്ര ഭാഗം വന്നാലും ആരാധകര്‍ ഇരു കയ്യും നീട്ടിയാണ് സ്വീകരിക്കാറ് പതിവ്. സിനിമയുടെ ഇനിയൊരു ഭാഗത്തെക്കുറിച്ച് വിവരമില്ലെങ്കിലും ഹോളിവുഡിലെ ഏറ്റവും സെന്‍സേഷനായ മാര്‍ഗോട്ട് റോബിയുടെയും ഹെന്റി കാവില്ലിന്റെയും ചിത്രങ്ങള്‍ വെച്ച് പുതിയൊരു പതിപ്പിനെക്കുറിച്ച് ചിന്തിക്കുകയാണ് ആരാധകര്‍.
ടെര്‍മിനേറ്റര്‍മാരായി ബാര്‍ബിഗേള്‍ മാര്‍ഗോട്ട് റോബിയുടെയും ഹെന്റി കാവില്ലിന്റെയും ചിത്രങ്ങള്‍ അവര്‍ തങ്ങളുടെ പോസ്റ്റില്‍ പങ്കിട്ടു. ഫേസ്ബുക്ക് പേജിലൂടെ അടുത്തിടെ മാര്‍ഗോട്ടും ഹെന്റിയും ചേര്‍ന്ന് ഒരു പുതിയ ടെര്‍മിനേറ്റര്‍ സിനിമയുടെ എഐ ജനറേറ്റഡ് വ്യാജ പോസ്റ്ററുകള്‍ പങ്കിട്ടു.
”മാര്‍ഗോട്ട് ഈസ് സാറ കോണര്‍! 2025! മാര്‍ഗോട്ട് റോബിയെ സാറാ കോണറായി അവതരിപ്പിക്കുന്ന, ദി ടെര്‍മിനേറ്ററിന്റെ റീമേക്കിലൂടെ ഭാവിയിലേക്കുള്ള തിരിച്ചുവരവിന് തയ്യാറാകൂ. ഒരു പോസ്റ്റ്-അപ്പോക്കലിപ്റ്റിക് ലോകത്ത്, ന്യായവിധി ദിനത്തിന് ശേഷം അഴിച്ചുവിട്ട അരാജകത്വങ്ങള്‍ക്കിടയില്‍ തന്റെ പത്തുവയസ്സുള്ള മകന്‍ ജോണിനെ വളര്‍ത്തുന്ന സാറയുടെ അക്ഷീണമായ ദൃഢനിശ്ചയത്തിന് സാക്ഷ്യം വഹിക്കുക. ഐക്കണിക് സാഗ ഒരു പുതിയ യുഗത്തിലേക്ക് ഒരു ധീരമായ കുതിച്ചുചാട്ടം നടത്തുമ്പോള്‍, ആവേശകരമായ പ്രവര്‍ത്തനത്തിന്റെയും വികാരത്തിന്റെയും സമന്വയത്തിനായി സ്വയം ധൈര്യപ്പെടുക. 2025ല്‍ തീയറ്ററുകളില്‍ എത്തും.” ചിത്രത്തിലെ അടിക്കുറിപ്പ് ഇങ്ങിനെയാണ്.
ആദ്യ പോസ്റ്ററില്‍ ബാര്‍ബി നടിയെ ഒരു യുവാവിനൊപ്പം പോസ്റ്ററില്‍ കാണാം. മറ്റൊരു പോസ്റ്ററില്‍ ഹെന്റി കാവില്‍ ദി ടെര്‍മിനേറ്ററായി കാണാം. ഹിറ്റ് ഫ്രാഞ്ചൈസിയുടെ റീബൂട്ടില്‍ കാവില്ലിന്റെയും മാര്‍ഗോട്ടിന്റെയും ആശയം പ്രലോഭിപ്പിക്കുന്നതാണെങ്കിലും അങ്ങിനെയൊരു സിനിമ സംഭവിക്കാന്‍ തീരെ ഇടയില്ല. ടൈറ്റാനിക്, അവതാര്‍ തുടങ്ങിയ സിനിമകള്‍ പ്രേക്ഷകര്‍ക്ക് നല്‍കിയ ജെയിംസ് കാമറൂണാണ് ഫ്രാഞ്ചൈസിയിലെ ഒന്നും രണ്ടും ചിത്രങ്ങള്‍ സംവിധാനം ചെയ്തത്. 1984-ലെ സിനിമ, ലിന്‍ഡ ഹാമില്‍ട്ടണിന്റെ സാറാ കോണറിനെ കൊല്ലാനുള്ള ദൗത്യവുമായി ഭാവിയില്‍ നിന്നുള്ള സൈബര്‍ഗ് കൊലയാളിയായ ആര്‍ണിയെക്കുറിച്ചായിരുന്നു. ആറ് സിനിമകളാണ് ഫ്രാഞ്ചൈസിയിലുള്ളത്.
