ലുധിയാന : പരിചയമില്ലാത്ത ഡ്രൈവറും സ്കൂള് ബസും കണ്ട് സംശയം തോന്നിയ ഒരു അമ്മയുടെ അവസരോചിതമായ ഇടപെടല് മകളെ തട്ടിക്കൊണ്ടു പോകലില്നിന്നും രക്ഷപ്പെടുത്തി. മാതാപിതാക്കളെ ബോധവല്ക്കരിക്കാനായി ആ അമ്മ പോസ്റ്റ് ചെയ്ത വീഡിയോ വൈറലായി. പല മാതാപിതാക്കള്ക്കും ഇീ സംഭവം വലിയ മുന്നറിയിപ്പായി മാറുകയും ജാഗ്രത പാലിക്കേണ്ടതിന്റെ ആവശ്യകത ബോദ്ധ്യപ്പെടുത്തുകയും ചെയ്തു.
സംഭവം ഇങ്ങനെ: അന്ന് അപരിചിതമായ സ്കൂള് വാനാണ് മകളെ കൂട്ടിക്കൊണ്ടുപോകാന് വന്നത്. ആദ്യം സംശയം തോന്നിയെങ്കിലും പിന്നീട് തന്റെ മനസു പറയുന്നതിനെ വിശ്വസിക്കാന് തീരുമാനിച്ചു. സാധാരണ സ്കൂള് വാന് ആയിരുന്നില്ല അതെന്നും, സ്ഥിരം ഡ്രൈവറല്ല വാന് ഓടിച്ചിരുന്നതെന്നും അവര് ഓര്ത്തു.
പതിവിലും നേരത്തെ വാന് എത്തിയപ്പോള് എന്തോ കുഴപ്പമുണ്ടെന്ന് അവര്ക്ക് തോന്നി. അവര് വാനിന്റെ അടുത്തേക്ക് പോയി ഡ്രൈവറോട് സാധാരണ ഡ്രൈവറാണോ അയച്ചതെന്ന് ചോദിച്ചു. ഡ്രൈവര് അതെ എന്ന് പറഞ്ഞപ്പോള് സംശയം വര്ദ്ധിച്ചു. അവര് ഉടന് തന്നെ സ്ഥിരം ഡ്രൈവറെ വിളിച്ചു. താന് ആരെയും അയച്ചിട്ടില്ലെന്നും പത്ത് മിനിറ്റിനുള്ളില് എത്തുമെന്നും അയാള് അറിയിച്ചു.
സാഹചര്യത്തിന്റെ ഗൗരവം മനസ്സിലാക്കിയ അമ്മ ഉടന് തന്നെ വീടിന്റെ വാതില് അടച്ച് മകളെ അകത്ത് സുരക്ഷിതയാക്കി. തുടര്ന്ന് സംശയാസ്പദമായ വാഹനത്തെ ക്കുറിച്ചും അതിലെ ഡ്രൈവറെക്കുറിച്ചും സുരക്ഷാ ഉദ്യോഗസ്ഥരെ അറിയിക്കുകയും ചെയ്തു.
വികാരനിര്ഭരമായ വീഡിയോയില്, മധ്യപ്രദേശില് അടുത്തിടെ നടന്ന സമാന സംഭവങ്ങളെക്കുറിച്ചും നിരവധി പെണ്കുട്ടികളെ തട്ടിക്കൊണ്ടുപോയതിനെക്കുറിച്ചും ആ അമ്മ സൂചിപ്പിക്കുന്നു. ഇത് തന്റെ മകള് നേരിട്ട അപകടത്തിന്റെ സാധ്യതയെ എടുത്തു കാണിക്കുന്നു. രക്ഷിതാക്കള് അവരുടെ കുട്ടികളുടെ ജീവിതത്തില് നടക്കുന്ന കാര്യങ്ങളെക്കുറിച്ച് ജാഗ്രത പാലിക്കണമെന്നും അവര് ആഹ്വാനം ചെയ്തു.
