റെഡ് മീറ്റ് ആരോഗ്യപ്രശ്നങ്ങള്‍ ഉണ്ടാക്കും എന്ന് അറിയാവുന്നതുകൊണ്ട് ചിക്കൻ വിഭവങ്ങളിൽ പലർക്കും പ്രിയപ്പെട്ടവയാണ്. ചിക്കൻ ടിക്കയും തന്തൂരി ചിക്കനുമൊക്കെ നാം കഴിക്കുന്നത് എണ്ണയിൽ വറുത്തെടുക്കാത്തതുകൊണ്ട് ഇവ ആരോഗ്യപ്രദമാണെന്ന് കരുതിയാണ്. എന്നാൽ, ഒരു പ്രശ്നമുണ്ട്. ശരിയായ രീതിയിലല്ല പാകം ചെയ്യുന്നതെങ്കിൽ ഗുണത്തേക്കാളേറെ ദോഷമേറെയാണെന്ന് പറയുകയാണ് ഹൈദരാബാദിൽ നിന്നുള്ള പ്രശസ്ത ന്യൂറോളജിസ്റ്റ് ആയ ഡോ.സുധീർ കുമാർ.
ഗ്രിൽഡ് ചിക്കൻ വിഭവങ്ങൾ കൂടിയ ചൂടിൽ വേവിക്കുന്നതും അടിക്കടി കഴിക്കുന്നതുമൊക്കെ ആരോഗ്യത്തിന് ഹാനികരമാണെന്ന് പറയുകയാണ് സുധീർ കുമാർ. ഗ്രില്ലിങ്, റോസ്റ്റിങ് പോലെ ഉയർന്ന താപനിലയിൽ ഇറച്ചി വേവിക്കുമ്പോള്‍ ഹെറ്റെറോസൈക്ലിക് അമിനെസ്(HCAS) പോളിസൈക്ലിക് അരോമാറ്റിക് ഹൈഡ്രോകാർബൺസ്(PAHS) എന്നീ ശരീരത്തിന് ഹാനികരമായ സംയുക്തങ്ങൾ രൂപപ്പെടും. ഉയർന്ന താപനിലയിൽ വേവിക്കുമ്പോൾ ഇറച്ചിയിലെ അമിനോ ആസിഡുകളും ക്രിയാറ്റിനും പ്രതിപ്രവർത്തിക്കുമ്പോഴാണ് ഈ കെമിക്കലുകൾ രൂപപ്പെടുന്നത്. ഇവ രണ്ടും മലാശയ അർബുദം, പാൻക്രിയാറ്റിക് കാൻസർ, പ്രോസ്റ്റേറ്റ് കാൻസർ എന്നിവയുടെ സാധ്യത വർധിപ്പിക്കുന്നുണ്ടെന്നും ഡോ. സുധീർ കുമാർ പറയുന്നു.
ഇത്തരം ചിക്കൻ വിഭവങ്ങളിൽ ആളുകൾക്ക് ഇഷ്ടമുള്ള കറുത്തതും രുചിയേറിയതുമായ ഭാഗങ്ങൾ അപകടസാധ്യത വീണ്ടും കൂട്ടുകയാണെന്നും അദ്ദേഹം പറയുന്നു. അമിതമായി മാരിനേറ്റ് ചെയ്ത, റെസ്റ്ററന്റ് ശൈലിയിലുള്ള ഗ്രിൽഡ് ചിക്കനാണ് തയ്യാറാക്കുന്നതെങ്കിൽ പൂരിതകൊഴുപ്പും സോഡിയവും അധിക അളവിൽ ശരീരത്തിലെത്താൻ കാരണമാകും. അത് ഹൃദ്രോഗങ്ങൾക്കും കൊളസ്ട്രോൾ നില ഉയരാനും വണ്ണംവെക്കാനും രക്തസമ്മർദം കുടാനും കാരണമാകും.
ചിക്കൻ അമിതമായി വേവിക്കുന്നതും വേണ്ടത്ര വേവിക്കാത്തതും പ്രശ്നമാണെന്ന് അദ്ദേഹം പറയുന്നു. ചിക്കൻ വേണ്ടത്ര നന്നായി വേവിച്ചില്ലെങ്കിൽ സാൽമോണെല്ല, കാംപിലോബാക്റ്റർ തുടങ്ങിയ ബാക്ടീരിയകൾ പെരുകാനും ഭക്ഷ്യവിഷബാധയ്ക്കും കാരണമാകും.
ഇത്രയും കേൾക്കുമ്പോൾ ഗ്രിൽഡ് ചിക്കൻ പാടേ ഉപേക്ഷിക്കണമെന്നാണ് ഡോ. സുധീർ കുമാർ പറയുന്നതെന്ന് കരുതരുത്. സുരക്ഷിതമായ രീതിയിൽ ഇവ കഴിക്കാനുള്ള വഴിയും അദ്ദേഹം പറയുന്നുണ്ട്. 75 ഡിഗ്രി സെൽഷ്യസ് താപനിലയിൽ വേവിക്കുക, കരിയാതിരിക്കാൻ നേരിട്ട് ചൂടേൽക്കുന്ന രീതി ഒഴിവാക്കുക, അമിതമായ കാെഴുപ്പ് നീക്കംചെയ്യുക, കലോറിയും കൊഴുപ്പും കുറയ്ക്കണമെങ്കിൽ തൊലി നീക്കം ചെയ്യുക തുടങ്ങിയവ ഗുണംചെയ്യുമെന്നാണ് ഡോ.സുധീർ കുമാർ പറയുന്നത്.
