മറ്റൊരു ലോകകപ്പ് കൂടി നാട്ടില്‍ നടക്കുമ്പോള്‍ 2011 ലോകകപ്പിന്റെ ഓര്‍മ്മകളിലാണ് ആരാധകര്‍. ക്രിക്കറ്റിലെ ഇതിഹാസതാരമായി മാറിയ സച്ചിന് തെന്‍ഡുല്‍ക്കര്‍ ആദ്യമായി ലോകകപ്പ് നേടിയ ടൂര്‍ണമെന്റായിരുന്നു അത്. എന്നാല്‍ ക്രിക്കറ്റില്‍ ലോകത്തുടനീളമായി ഏറ്റവും കൂടുതല്‍ ആരാധകരുള്ള സച്ചിന് ഏറ്റവും ഇഷ്ടപ്പെട്ട ലോകകപ്പ് ഏതാണെന്ന് അറിയാമോ?
എന്തായാലും അത് താരം കപ്പുയര്‍ത്തിയ 2011 ല്‍ ഇന്ത്യയില്‍ നടന്ന ലോകകപ്പല്ല. കരിയറില്‍ ആറു തവണ ഐസിസി ലോകകപ്പില്‍ കളിച്ച സച്ചിന് രണ്ടു തവണയാണ് ഫൈനലില്‍ കളിച്ചത്. ഇതില്‍ ഒരു തവണ കപ്പുയര്‍ത്തുകയും ചെയ്തപ്പോള്‍ മറ്റൊന്നില്‍ ഓസ്‌ട്രേലിയയോട് കലാശപ്പോരില്‍ തോറ്റുപോയി. രണ്ടു ലോകകപ്പിലും സച്ചിന് ബാറ്റ് കൊണ്ട് ഇന്ത്യയ്ക്കായി മികച്ച പ്രകടനം നടത്തുകയും ചെയ്തു. തന്റെ പ്രിയപ്പെട്ട ലോകകപ്പ് മത്സരം തിരഞ്ഞെടുക്കാന്‍ ആവശ്യപ്പെട്ടപ്പോള്‍ അദ്ദേഹം പറഞ്ഞത് 2003-ല്‍ ദക്ഷിണാഫ്രിക്കയില്‍ നടന്ന ലോകകപ്പിലെ ഇന്ത്യാ പാക് മത്സരമെന്നായിരുന്നു താരത്തിന്റെ മറുപടി. ക്വാര്‍ട്ടറില്‍ നടന്ന മത്സരത്തില്‍ ഇന്ത്യ ഉജ്വലമായി പാകിസ്താനെ തോല്‍പ്പിക്കുകയും ചെയ്തു.
ദക്ഷിണാഫ്രിക്കയിലെ സെഞ്ചൂറിയനില്‍ നടന്ന പോരാട്ടമാണ് സച്ചിന്റെ പ്രിയപ്പെട്ട ലോകകപ്പ് മത്സരം. ആ മത്സരത്തില്‍, വെറും 75 പന്തില്‍ 98 റണ്‍സ് നേടിയ സച്ചിന് മിന്നുന്ന പ്രകടനം കാഴ്ചവച്ചു, ഷൊയ്ബ് അക്തര്‍, വഖാര്‍ യൂനിസ്, വസീം അക്രം തുടങ്ങിയ ചില തീപ്പൊരി പേസര്‍മാര്‍ പാകിസ്ഥാന് ഒപ്പമുണ്ടായിട്ടും നാല് ഓവര്‍ ബാക്കിനില്‍ക്കെ ഇന്ത്യയെ വിജയത്തിലേക്ക് ഉയര്‍ത്താന്‍ സഹായിച്ചു. സച്ചിന്റെ അചഞ്ചലമായ സംയമനത്തിന്റെയും കടുത്ത സമ്മര്‍ദത്തിനു കീഴില്‍ പോലും സച്ചിന് മികച്ച പ്രകടനം നടത്തുകയായിരുന്നു.
രണ്ട് പതിറ്റാണ്ടിലേറെ നീണ്ട കരിയറില്‍, നിരവധി റെക്കോര്‍ഡുകളും അംഗീകാരങ്ങളും നേടിയ സച്ചിന് ഈ കായികരംഗത്ത് മായാത്ത മുദ്ര പതിപ്പിച്ചയാളാണ്. അഹമ്മദാബാദിലെ നരേന്ദ്ര മോദി സ്റ്റേഡിയത്തില്‍ നടന്ന ഏകദിന ലോകകപ്പ് 2023 ന്റെ ഉദ്ഘാടനച്ചടങ്ങില്‍ സച്ചിനെ ആദരിച്ചു, ഒപ്പം ഫീല്‍ഡിലേക്ക് ട്രോഫി കൊണ്ടുവരാന്‍ നിയോഗിക്കപ്പെട്ട താരം സച്ചിനായിരുന്നു. ഇതിന് പുറമേ ഇംഗ്ലണ്ടും ന്യൂസിലന്‍ഡും തമ്മിലുള്ള ഉദ്ഘാടന മത്സരത്തില്‍ കമന്ററി പാനലിലും സച്ചിന് ചേര്‍ന്നു. ഈ സമയത്താണ് അദ്ദേഹം തന്റെ പ്രിയപ്പെട്ട ലോകകപ്പ് മത്സരം പങ്കുവെച്ചത്.
2003 ലോകകപ്പ് സച്ചിന്റെ സ്വപ്ന ടൂര്‍ണമെന്റായിരുന്നു എന്നതും എടുത്തു പറയേണ്ടതാണ്. എഡിഷനിലുടനീളം, അദ്ദേഹം മികച്ച ഫോമിലായിരുന്നു, അതിശയിപ്പിക്കുന്ന 673 റണ്‍സ് നേടി, ഒരു ലോകകപ്പ് പതിപ്പിലെ ഏതൊരു ബാറ്ററുടെയും ഏറ്റവും ഉയര്‍ന്ന സ്‌കോര്‍. അദ്ദേഹത്തിന്റെ സ്ഥിരതയും മാച്ച് വിന്നിംഗ് ഇന്നിംഗ്സുകള്‍ കളിക്കാനുള്ള കഴിവും അദ്ദേഹത്തെ ‘പ്ലയര്‍ ഓഫ് ദ ടൂര്‍ണമെന്റ്’ ആക്കി. പക്ഷേ അതേസമയം തന്റെ പ്രിയപ്പെട്ട ലോകകപ്പ് മത്സരം നടന്ന ടൂര്‍ണമെന്റില്‍ ഇന്ത്യയ്ക്ക് കപ്പിനും ചുണ്ടിനും ഇടയില്‍ മത്സരം നഷ്ടമായിരുന്നു. സൗരവ് ഗാംഗുലി നയിച്ച ടീം ഫൈനലില്‍ ഓസ്‌ട്രേലിയയോട് പരാജയപ്പെട്ടു.
