നിങ്ങള്‍ക്ക് ആവശ്യത്തിന് ഉറങ്ങാനായി സാധിക്കുന്നില്ലേ? ഇനി അധികം സമയം ഉറങ്ങുന്നതാണോ പതിവ് ? എന്നാല്‍ രണ്ടും അത്ര നന്നല്ല. അമേരിക്കയില്‍ മൂന്നില്‍ രണ്ട് പേരും ആവശ്യത്തിന് ഉറങ്ങാറില്ലെന്നും അവരുടെ ആരോഗ്യം അപകടത്തിലാണെന്നും പഠനം വ്യക്തമാക്കുന്നു.7 മുതല്‍ 9 മണിക്കൂര്‍ വരെ ഉറങ്ങാത്തവര്‍ക്കാണ് ആരോഗ്യ പ്രശ്‌നങ്ങള്‍.
വാന്‍ഡര്‍ ബില്‍റ്റ് യൂണിവേഴ്‌സിറ്റി മെഡിക്കല്‍ സെന്ററിലെ ഗവേഷകരായ കെൽസിഫുള്ളിന്റെ നേതൃത്വത്തിലാണ് പഠനം നടന്നത്. 40 മുതൽ 79 വയസ്സ് വരെ പ്രായമുള്ള 47,000 പേരുടെ വിവരങ്ങളാണ് പിരശോധിച്ചത്. 5 വര്‍ഷത്തിലധികം കാലം ഉറക്കം ക്രമരഹിതരായവര്‍ക്ക് അകാലമരണത്തിന് വരെ സാധ്യതയുണ്ട്.
വളരെ കുറച്ച് സമയം ആദ്യം ഉറങ്ങിയിരുന്നു, എന്നാല്‍ പിന്നീട് കൂടുതൽ സമയം ഉറങ്ങുന്നവര്‍ക്ക് ഏതെങ്കിലും കാരണത്താലുള്ള മരണസാധ്യത 29 ശതമാനമാണ്. ഇവര്‍ക്ക് ഹൃദ്രേഹം മൂലമുള്ള മരണത്തിന് 32 ശതമാനം സാധ്യതയുണ്ടെന്നുംപഠനം വ്യക്തമാക്കുന്നു. പഠനം പ്രസിദ്ധീകരിച്ചത് ജാമാ നെറ്റ്വര്‍ക്ക് ഓപ്പണിലാണ്.
പഠനത്തില്‍ പങ്കെടുത്തവരുടെ ഉറക്കരീതികള്‍ വര്‍ഷങ്ങളോളം ഗവേഷകര്‍ പഠന വിധേയമാക്കി. അവരെ പല രീതിയില്‍ തരം തിരിച്ചു. ചിലര്‍ ആദ്യം ധാരാളം സമയം ഉറങ്ങുന്നവരും പിന്നീട് കുറച്ച് സമയം ഉറങ്ങുന്നവരുമായിരുന്നു. മറ്റ് ചിലരാവട്ടെ നേരെ തിരിച്ചും. 66 ശതമാനം പേരും അനാരോഗ്യകരമായ ഉറക്കരീതികള്‍ പിന്തുടരുന്നവരാണെന്ന് കണ്ടെത്തി. നീണ്ട ഉറക്കസമയ മാറ്റങ്ങള്‍ ഹൃദയസംബന്ധമായ രോഗങ്ങള്‍ വരാനുള്ള സാധ്യത കൂട്ടുന്നു.
ഉറക്കം മെച്ചപ്പെടുത്താനായി ചില കാര്യങ്ങള്‍ ശ്രദ്ധിച്ചാല്‍ മതി. എല്ലാ ദിവസവും കൃത്യ സമയത്ത് തന്നെ ഉറങ്ങാനും ഉണരാനും ശ്രദ്ധിക്കണം. ഉറങ്ങുന്നതിന് മുമ്പായി സ്‌ക്രീന്‍ ടൈം പരിമിതപ്പെടുത്തണം. ഫോണ്‍, ടിവി പോലുള്ളവയിലെ നീല വെളിച്ചം ശരീരത്തിലെ മെലാടോണിന്റെ ഉല്‍പാദനത്തെ തടസ്സപ്പെടുത്തും.
കിടക്കുന്നതിന് മുമ്പായി വായിക്കുകയോ ചൂടുവെള്ളത്തില്‍ കുളിക്കുകയോ ആവാം. മദ്യവും കഫിനും ഒഴിവാക്കുക. പതിവായി വ്യായാമം ചെയ്യണം. ഇത് സ്‌ളീപ്പ് സൈക്കിളിനെ നിയന്ത്രിക്കുന്നു. ഉറങ്ങുന്നതിന് ഏതാനും മണിക്കൂര്‍ മുമ്പ് തന്നെ വര്‍ക്ക്ഔട്ട് ചെയ്ത് തീര്‍ക്കാനായി ശ്രദ്ധിക്കുക. ശാന്തമായ ഉറക്കം ലഭിക്കുന്നതിന് കിടപ്പുമുറി വൃത്തിയായും ശാന്തമായും ഇരുണ്ടതായും സൂക്ഷിക്കാം. സമ്മര്‍ദം കുറയ്ക്കാനായി റിലാക്‌സേഷന്‍ ടെക്‌നിക്കുകള്‍ പരിശീലിക്കാം.
