ലംബോർഗിനി സ്വന്തമാക്കുക എന്ന തന്റെ സ്വപ്നം പൂർത്തിയാക്കാൻ, കേരളത്തിൽ നിന്നുള്ള ബിബിൻ എന്ന യുവാവ് സ്വന്തം ഗാരേജിൽ നിര്മ്മിച്ചത് ആഡംബര കാർ. സാമ്പത്തിക ബുദ്ധിമുട്ടുകൾ കാരണം യഥാർത്ഥ ലംബോർഗിനി വാങ്ങാൻ കഴിയാതിരുന്നതുകൊണ്ട്, സ്വന്തം വീട്ടുമുറ്റത്ത് അതിന്റെ ഇന്ത്യൻ പതിപ്പ് നിർമ്മിക്കാൻ അദ്ദേഹം തീരുമാനിക്കുകയായിരുന്നു.
ബിബിന്റെ ശ്രമങ്ങൾ ഫലം കണ്ടു, ഇപ്പോൾ അദ്ദേഹത്തിന്റെ കഥ യൂട്യൂബറായ അരുൺ സ്മോക്കിയിലൂടെ ആയിരക്കണക്കിന് നെറ്റിസൺസിലേക്ക് എത്തിയിരിക്കുകയാണ്.
കേരളത്തിലെ ഒരു കമ്പനിയിലെ ക്വാളിറ്റി അഷ്വറൻസ് (QA) വിഭാഗത്തിൽ ജോലി ചെയ്യുന്ന ബിബിൻ, തന്റെ ഈ സ്വപ്ന പദ്ധതി ഏകദേശം മൂന്ന് വർഷം മുമ്പാണ് ആരംഭിച്ചത്. ലംബോർഗിനിയുടെ ഈ പകർപ്പിന്റെ 80% ജോലികളും അദ്ദേഹം ഇതിനോടകം പൂർത്തിയാക്കിക്കഴിഞ്ഞു. പരിമിതമായ ഫണ്ടും സമയക്കുറവും കാരണം കാർ നിർമ്മാണത്തില് ബിബിൻ ചില ബുദ്ധിമുട്ടുകൾ നേരിട്ടിട്ടുണ്ട്. ഇതുവരെ 1.5 ലക്ഷം രൂപയോളം അദ്ദേഹം ഇതിനായി ചിലവഴിച്ചു.
ഇന്ത്യൻ നിർമ്മിത ലംബോർഗിനി
അടുത്തുള്ള സ്ക്രാപ്പ് യാർഡുകളിൽ നിന്ന് ലഭിച്ച പഴയ ഭാഗങ്ങളും, മറ്റ് ഭാഗങ്ങൾ പ്രാദേശിക ഹാർഡ്വെയർ കടകളിൽ നിന്നും ശേഖരിച്ചാണ് ബിബിൻ തന്റെ ലംബോർഗിനി നിർമ്മിച്ചതെന്ന് പറഞ്ഞു. യഥാർത്ഥ കാറിന് സമാനമായ രൂപം ലഭിക്കാൻ പുറംഭാഗത്ത് കാർഡ്ബോർഡ് ഉപയോഗിച്ചു. മെറ്റൽ പൈപ്പുകളും ഫൈബർഗ്ലാസ് പോലുള്ള വസ്തുക്കളും ഉപയോഗിച്ച് നിർമ്മാണച്ചെലവ് കുറയ്ക്കാനും ബിബിന് സാധിച്ചു.
യഥാർത്ഥ ലംബോർഗിനിയുടെ ചക്രങ്ങൾ വാങ്ങുന്നത് ബജറ്റിന് പുറത്താകുമായിരുന്നതിനാൽ, ബിബിൻ തന്റെ ആഡംബര കാറിന്റെ പകർപ്പിന് ചില “നാടൻ” ഭാവങ്ങൾ നൽകാൻ തീരുമാനിച്ചു. ഇതിനായി അദ്ദേഹം മാരുതി ആൾട്ടോയുടെ ചക്രങ്ങൾ ഉപയോഗിക്കുകയും, അതിനനുസരിച്ച് കാറിന്റെ അളവുകൾ പുനർരൂപകൽപ്പന ചെയ്യുകയും ചെയ്തു.
