ആദവും ഹൗവ്വയും ജീവിച്ച ഏദന്തോട്ടം ആഫ്രിക്കയിലായിരുന്നെന്ന വാദവുമായി ഗവേഷകന്. ടെക്സസ് സ്വദേശിയായ ഗവേഷകന് മഹ്മൂദ് ജാവേദാണ് ഏദന് യഥാര്ത്ഥത്തില് വടക്കുപടിഞ്ഞാറന് എത്യോപ്യയിലെ ബഹിര് ദാര് എന്ന പ്രദേശത്താണെന്ന വാദവുമായി രംഗത്തെത്തിയത്.
ഏദന് തോട്ടം മധ്യേഷ്യയിലാണെന്നായിരുന്നു നേരത്തെ ഉണ്ടായിരുന്ന വാദങ്ങള്. ബൈബിള് അനുസരിച്ച്, ഏദന് തോട്ടം ദൈവം സ്ഥാപിച്ച പറുദീസയാണ്. അവിടെനിന്നും ഗിഹോന്, യൂഫ്രട്ടീസ്, ടൈഗ്രിസ്, പിഷോന് എന്നിങ്ങനെ നാല് ശാഖകളായി പിരിഞ്ഞൊഴുകുന്ന ഒരു നദിയുണ്ടായിരുന്നു. ടൈഗ്രിസും യൂഫ്രട്ടീസും ഇന്നത്തെ ഇറാഖിലൂടെ ഒഴുകുന്നതിനാല്, ഏദന് ആ പ്രദേശത്തായിരിക്കണം എന്ന് പല പണ്ഡിതരും ദീര്ഘകാലമായി അനുമാനിച്ചിരുന്നു.
ടാന തടാകത്തിന്റെ തെക്കന് അറ്റത്താണ് ഏദനെന്ന് മഹ്മൂദ് ജാവേദ് പറയുന്നു. അവിടെയാണു ബ്ല്യൂ നൈല് നദി ആരംഭിക്കുന്നത്. ബൈബിളും ഖുറാനും ശ്രദ്ധാപൂര്വ്വം വായിച്ചും ആദാം ഹവ്വമാരെക്കുറിച്ചും, നദികളെക്കുറിച്ചും, തോട്ടത്തെക്കുറിച്ചുമുള്ള വിവരണങ്ങള് വിശകലനം ചെയ്തുമായിരുന്നു ഗവേഷണമെന്ന് അദ്ദേഹം പറഞ്ഞു.ബ്ല്യൂ നൈലിനെ ബൈബിളിലെ ഗിഹോന് നദിയുമായി ജാവേദ് ബന്ധപ്പെടുത്തി. ടാന തടാകത്തില് നിന്നൊഴുകുന്ന വെള്ളം വിവിധ ജലമാര്ഗ്ഗങ്ങളായി വിഭജിക്കപ്പെടുന്നതിനാല്, ഇത് ഉല്പത്തി പുസ്തകത്തില് പറയുന്ന നാല് നദികളായി രൂപപ്പെട്ടതാകാം എന്നും അദ്ദേഹം പറയുന്നു.
ആദ്യകാല മനുഷ്യരെക്കുറിച്ചുള്ള പഠനവും അദ്ദേഹം ഗവേഷണത്തിന്റെ ഭാഗമാക്കി. കിഴക്കന് ആഫ്രിക്കന് റിഫ്റ്റ് വാലിയുടെ സമീപത്തുള്ള ഓള്ഡ്വൈ ഗോര്ജ് എന്നറിയപ്പെടുന്ന മനുഷ്യരാശിയുടെ ഉത്ഭവസ്ഥാനമായി കണക്കാക്കപ്പെടുന്ന പ്രദേശത്ത്, ഹോമോ ഹാബിലിസ് അല്ലെങ്കില് ഓസ്ട്രലോപിത്തെക്കസിന്റെ അവസാന രൂപത്തില്നിന്നാകാം ആദാം പരിണമിച്ചത് എന്ന് അദ്ദേഹം വാദിക്കുന്നു.
അവിടെനിന്നും, ആദാമും ഹവ്വയും ബഹിര്ദാറിലെ ഉയര്ന്ന പ്രദേശങ്ങളിലെ ഒരു പറുദീസയിലേക്ക് മാറിയിരിക്കാം. അവിടെനിന്നും ഖുറാന് വിവരിക്കുന്ന ‘ഹബട്ട’ എന്ന പ്രകാരം റിഫ്റ്റ് വാലിയുടെ താഴ്വരയിലേക്ക് അവര് മാറിയെന്നുമാണ് അദ്ദേഹം പറയുന്നത്.
ആ പ്രദേശം സമുദ്രനിരപ്പില്നിന്ന് ഏകദേശം 6,000 അടി ഉയരത്തിലാണു സ്ഥിതി ചെയ്യുന്നത്. സവിശേഷതകള് ബൈബിളിലെ ഏദന് തോട്ടത്തിന്റെ വിവരണങ്ങളുമായി ഒത്തുപോകുന്നു. അതുപോലെ, ഭൂമിയിലെ പറുദീസയെക്കുറിച്ചുള്ള ഖുറാന് സങ്കല്പ്പവുമായും അത് ബന്ധപ്പെട്ടിരിക്കുന്നതായി ജാവേദ് പറഞ്ഞു. ‘എല്ലാ സൂചനകളും ബഹിര് ദാറിലേക്കാണ് വിരല് ചൂണ്ടുന്നത്, ടാന തടാകത്തിനടുത്തുള്ള ഈ പ്രദേശം അതിശയിപ്പിക്കുന്ന സൗന്ദര്യവും സമൃദ്ധമായ സസ്യജാലങ്ങളും ബ്ല്യൂ നൈല് നദിയുടെ ഉത്ഭവസ്ഥാനവുമാണ്, ഇത് ഏദന് തോട്ടത്തിന്റെ പുരാതന വിവരണങ്ങളുമായി ഒത്തുപോകുന്നു’- ജാവേദ് എഴുതി.
പ്രത്യേകിച്ച്, ഗിഹോന് നദിയെക്കുറിച്ചുള്ള പരാമര്ശം കൂഷ് എന്ന ദേശത്തെ ഉള്ക്കൊള്ളുന്നതാണ്. ഈ പുരാതന പദം എത്യോപ്യയുമായി വ്യാപകമായി ബന്ധപ്പെട്ടിരിക്കുന്നു.
ഈ ഭാഷാപരമായ സൂചനയെ ജാവേദ് ഉപയോഗിച്ചു. ഗിഹോന് നദി ടാന തടാകത്തില്നിന്ന് ആരംഭിച്ച്, സുഡാനിലൂടെ വടക്കോട്ട് ഒഴുകി, ഖാര്ട്ടൂമില്വച്ച് വൈറ്റ് നൈലില് ചേരുന്ന ബ്ലൂ നൈല് നദിയാണെന്ന് അദ്ദേഹം വാദിച്ചു.
‘ടാന തടാകം ഏദന് തോട്ടത്തിന്റെ വിവരണവുമായി തികച്ചും യോജിക്കുന്നു,’ അദ്ദേഹം എഴുതുന്നു. അഗ്നിപര്വത നിരകള് ചുറ്റുമുള്ള ഉയര്ന്ന പ്രദേശങ്ങളെ വലയം ചെയ്യുന്നുണ്ടെന്നും, അത് പല നദീ സംവിധാനങ്ങളെയും പോഷിപ്പിക്കുന്നുണ്ടെന്നും അദ്ദേഹം പറയുന്നു.
അദ്ദേഹത്തിന്റെ അവകാശവാദപ്രകാരം ടാന തടാകം തന്നെ ഏദന് തോട്ടമാണ്, ഏദന് തോട്ടം അതിന് തൊട്ടു തെക്കുള്ള ബഹിര് ദാറിന് ചുറ്റുമാണ്. ബൈബിളിലെ പ്രയോഗമായ ‘ഏദന് കിഴക്ക്’ എന്ന ഭാഗത്താണ്, നദി തടാകത്തില്നിന്ന് പുറത്തേക്ക് ഒഴുകുന്നത്.ഉല്പത്തി പുസ്തകത്തില് ആദാമും ഹവ്വയും പുറത്താക്കപ്പെട്ട ശേഷം ജീവവൃക്ഷത്തിലേക്കുള്ള പ്രവേശനം തടയാന് ദൈവം സ്ഥാപിച്ച ‘ജ്വലിക്കുന്ന വാള്’ നെക്കുറിച്ച് പറയുന്നു. ഏദന് തോട്ടത്തിന്റെ ചുറ്റും ടാന തടാകത്തെ വലയം ചെയ്യുന്ന എത്യോപ്യന് ഹൈലാന്ഡിലെ അഗ്നിപര്വത നിരകളാല് ‘ജ്വലിക്കുന്ന വാള്’ പ്രതിനിധീകരിക്കപ്പെടാം എന്ന് ജാവേദിന്റെ പഠനം നിര്ദേശിച്ചു.
‘ചരിത്രപരമായി സജീവമായ അഗ്നിപര്വതങ്ങളാല് താഴ്വര വലയം ചെയ്യപ്പെട്ടിരിക്കുന്നതിനാല്, ബൈബിളില് പരാമര്ശിക്കപ്പെട്ട ജ്വലിക്കുന്ന വാള് സജീവ അഗ്നിപര്വതങ്ങളാല് രൂപപ്പെട്ടതാകാന് സാധ്യതയുണ്ട്’- അദ്ദേഹം അഭിപ്രായപ്പെട്ടു.ബൈബിളും ഖുറാനും ഓരോന്നും ഭൂമിയിലെ ഒരു തോട്ടത്തെക്കുറിച്ച് വിവരിക്കുന്നു, നീതിമാന്മാര്ക്കായി കരുതിവെച്ചിട്ടുള്ള നിത്യമായ പറുദീസയില്നിന്ന് വ്യത്യസ്തമായി, ഈ പ്രദേശത്തിന്റെ മിതമായ കാലാവസ്ഥയും, ഫലഭൂയിഷ്ഠമായ മണ്ണും, സമൃദ്ധമായ ജല ലഭ്യതയും വിശപ്പ്, ദാഹം, കഠിനമായ ചൂട് എന്നിവയില്നിന്ന് മുക്തമായ ഒരു സ്ഥലത്തെക്കുറിച്ചുള്ള വിശുദ്ധ ഗ്രന്ഥങ്ങളിലെ ചിത്രീകരണങ്ങളുമായി സാമ്യമുള്ളതായി പഠനം സൂചിപ്പിക്കുന്നു.
