മനുഷ്യത്വം ഇന്നും മരിച്ചിട്ടില്ല എന്നതിന് തെളിവാണ് സോഷ്യൽ മീഡിയയിൽ വൈറലായ ഈ ഹൃദയസ്പർശിയായ വാർത്ത. അമേരിക്കയിലെ ടെന്നസിയിലുള്ള മാഞ്ചസ്റ്ററിൽ നിന്നുള്ള 78 വയസ്സുകാരനായ റിച്ചാർഡ് പുള്ളിയുടെ കഥയാണിത്. ഈ പ്രായത്തിലും അദ്ദേഹം ഒരു ഫുഡ് ഡെലിവറി ഡ്രൈവറായി ജോലി ചെയ്യുന്നതിന്റെ ദൃശ്യങ്ങൾ ബിട്ടാനി സ്മിത്ത് എന്ന സ്ത്രീയാണ് ഇന്റർനെറ്റിൽ പങ്കുവെച്ചത്. വളരെ വിനയത്തോടെയും ശ്രദ്ധയോടെയും സ്റ്റാർബക്സ് ഓർഡറുകൾ ഡെലിവറി ചെയ്യുന്ന അദ്ദേഹത്തിന്റെ രീതി കണ്ടാണ് അവർ വീഡിയോ പകർത്തിയത്.
എന്തുകൊണ്ടാണ് ഈ പ്രായത്തിൽ ജോലി ചെയ്യുന്നതെന്ന് അന്വേഷിച്ചപ്പോഴാണ് റിച്ചാർഡ് തന്റെ ജീവിത സാഹചര്യം വെളിപ്പെടുത്തിയത്. “എനിക്ക് ജോലി ചെയ്യാൻ വലിയ ആഗ്രഹമൊന്നുമില്ല, പക്ഷേ ചെയ്യാതിരിക്കാൻ കഴിയില്ല. ഞാൻ വിരമിച്ചതായിരുന്നു, എന്നാൽ ഭാര്യയ്ക്ക് ജോലി നഷ്ടമായതോടെ അവളുടെ ഹെൽത്ത് ഇൻഷുറൻസും ഇല്ലാതായി. മരുന്നുകൾക്കും മറ്റ് വീട്ടുചെലവുകൾക്കും ശേഷം മാസാവസാനം ഞങ്ങളുടെ കയ്യിൽ ഒന്നും അവശേഷിക്കാറില്ല,” അദ്ദേഹം പറഞ്ഞു.
ഈ കഥ ലോകമെമ്പാടും ശ്രദ്ധിക്കപ്പെട്ടതോടെ റിച്ചാർഡിനെ സഹായിക്കാൻ സന്നദ്ധ സംഘടനയായ ‘ഗോ ഫണ്ട് മീ’ (GoFundMe) ഒരു കാമ്പയിൻ ആരംഭിച്ചു. നിമിഷനേരം കൊണ്ട് 5 ലക്ഷം യുഎസ് ഡോളർ (ഏകദേശം 4 കോടി രൂപ) ആണ് ഈ ദമ്പതികൾക്കായി അപരിചിതർ വഴി സ്വരൂപിച്ചത്. ലോകത്തിന്റെ വിവിധ ഭാഗങ്ങളിൽ നിന്നുള്ളവരുടെ ഈ ഐക്യവും കരുതലും റിച്ചാർഡിന്റെയും ഭാര്യയുടെയും ജീവിതത്തിന് വലിയൊരു ആശ്വാസമായി മാറി.
