വിവാഹം കഴിയുന്നതോടെ സ്വപ്‌നങ്ങള്‍ക്കെല്ലാം തടയിട്ട് സ്വയം നിയന്ത്രിച്ച് വീട്ടില്‍ കുടുംബത്തിന് വേണ്ടിയും ഭര്‍ത്താവിന് വേണ്ടിയും ഒതുങ്ങിക്കൂടാന്‍ നിര്‍ബ്ബന്ധിത മാക്കപ്പെടുന്നവരാണ് ഭൂരിപക്ഷം സ്ത്രീകളും. എന്നാല്‍ ഈ അസ്വാതന്ത്ര്യത്തിന്റെ ചങ്ങലപ്പൂട്ടുകളെ പൊട്ടിച്ചെറിയാനും ചിറകുവിരിച്ച് പറക്കാനും ആഗ്രഹിക്കുന്ന അനേകം സ്ത്രീകള്‍ക്ക് മാതൃകയാക്കാന്‍ കഴിയുന്നയാളാണ് തലശ്ശേരിക്കാരി നാജി നൗഷി.
അഞ്ച് മക്കളുടെ അമ്മയായ നാജി ആറ് മാസംകൊണ്ട് ആറ് രാജ്യങ്ങളില്‍ സഞ്ചരിക്കാനുള്ള അവിശ്വസനീയമായ ഒരു യാത്രയിലാണ്. സോഷ്യല്‍ മീഡിയ ഇന്‍ഫ്ളവന്‍സര്‍കൂടിയായ നാജി നൗഷിയും അവളുടെ മഹീന്ദ്ര ഥാറും അവളുടെ സ്വപ്നങ്ങള്‍ സാക്ഷാത്കരിക്കാനുള്ള ശ്രമത്തിലാണ്. ഇപ്പോള്‍ കുവൈറ്റിലെത്തി നില്‍ക്കുന്ന യാത്ര ബഹ്റൈന്‍, ഒമാന്‍, ഖത്തര്‍, സൗദി അറേബ്യ, യുണൈറ്റഡ് അറബ് എമിറേറ്റ്സ് എന്നിവിടങ്ങളില്‍ സഞ്ചരിക്കാനാണ് ലക്ഷ്യമിടുന്നത്.
‘എനിക്ക് ആളുകളെ കാണണം, വ്യത്യസ്ത സംസ്‌കാരങ്ങളും കുവൈറ്റിന്റെ ആകര്‍ഷകമായ പാരമ്പര്യങ്ങളും അറിയേണ്ടതുണ്ട്.’ അവര്‍ കുവൈറ്റ് ടൈംസിനോട് പറഞ്ഞു. യാത്രയില്‍ ഭക്ഷണകാര്യങ്ങള്‍ സുഗമമാക്കാന്‍, അവള്‍ തന്റെ വാഹനത്തില്‍ തന്നെ ഒരു ചെറിയ അടുക്കളയും അടുപ്പും ഗ്യാസ്‌സിലിണ്ടറും സജ്ജീകരിച്ചിട്ടുണ്ട്. ഈ താല്‍ക്കാലിക അടുക്കളയില്‍ അരി, വെള്ളം, മൈദ തുടങ്ങിയ ഭക്ഷണസാധനങ്ങള്‍ സ്റ്റോക്ക് ചെയ്താണ് യാത്ര. അതിനാല്‍ യാത്രയ്ക്കിടെ പാചകം ചെയ്യാനും കഴിക്കാനും കഴിയും.
”സാധാരണയായി, ഞാന്‍ പോകുന്നിടത്തെല്ലാം എന്റെ സുഹൃത്തുക്കള്‍ എനിക്ക് ഭക്ഷണം വിളമ്പാറുണ്ട്. പക്ഷേ, എനിക്ക് വേണമെങ്കില്‍, എന്റെ ഭക്ഷണം പാകം ചെയ്യാം അല്ലെങ്കില്‍ എനിക്കോ എന്റെ സന്ദര്‍ശകര്‍ക്കോ വേണ്ടി ഒരു കപ്പ് ചായ ഉണ്ടാക്കാം, ”അവര്‍ പറഞ്ഞു, ഒരിക്കല്‍ നാജി മുംബൈയിലെ വിനോദസഞ്ചാരികള്‍ക്ക് ബിരിയാണി പാകം ചെയ്തു വിളമ്പി. തലശ്ശേരിയില്‍ ഒരു സാധാരണ വീട്ടമ്മയായിരുന്ന നാജി 2020-ല്‍ കേരളത്തിലുടനീളം ഒരു യാത്ര നടത്തിയതോടെയാണ് സഞ്ചാരം തനിക്ക് എത്ര സന്തോഷം തരുന്നുണ്ടെന്ന് മനസ്സിലാക്കിയത്. യാത്രകളിലും ഡ്രൈവിംഗിലും അഭിനിവേശവും ഉണ്ടെന്ന് തിരിച്ചറിഞ്ഞതോടെ ഒരു ഇന്ത്യന്‍ യാത്രയ്ക്ക് പുറപ്പെട്ടു.
ഇന്ത്യ-പാകിസ്ഥാന്‍ അതിര്‍ത്തി, ചൈന-ഇന്ത്യന്‍ അതിര്‍ത്തി, ഇന്ത്യ-മ്യാന്‍മര്‍ അതിര്‍ത്തി എന്നിവയുള്‍പ്പെടെ എല്ലാ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും അവള്‍ വാഹനമോടിച്ചു. പാന്‍-ഇന്ത്യ യാത്രയുടെ ഭാഗമായി ലക്ഷദ്വീപിലെ 10 ദ്വീപുകള്‍ 30 ദിവസം കൊണ്ട് കവര്‍ ചെയ്തു. അവളുടെ ഏറ്റവും പുതിയ യാത്ര 2024 സെപ്റ്റംബര്‍ 10 ന് യുഎഇയില്‍ നിന്ന് ആരംഭിച്ചിരിക്കുകയാണ്. അബുദാബിയില്‍ നിന്ന് ഒമാനിലേക്കും പിന്നീട് സൗദി അറേബ്യയിലേക്കും മൂന്ന് മാസത്തേക്ക് യാത്ര ചെയ്തു. ‘ഇത് പരമ്പരയുടെ ആറാം മാസമാണ്, കുവൈത്തിന് ശേഷം ഞാന്‍ ഇറാഖിലേക്ക് പോകും,’ അവര്‍ പറഞ്ഞു,
ഇന്ത്യയിലേക്ക് മടങ്ങും മുമ്പ് 15 രാജ്യങ്ങള്‍ കവര്‍ ചെയ്യാന്‍ താന്‍ അഫ്ഗാനിസ്ഥാനിലേക്കും ചൈനയിലേക്കും പോകുമെന്നും കൂട്ടിച്ചേര്‍ത്തു. ഫിഫ ലോകകപ്പില്‍ തന്റെ പ്രിയപ്പെട്ട ടീം കളിക്കുന്നത് കാണാന്‍ കാറില്‍ ഖത്തറിലേക്ക് പോകാന്‍ തീരുമാനിച്ച നാജി സോഷ്യല്‍ മീഡിയയില്‍ വൈറലാണ്. ”എന്തുകൊണ്ടാണ് ഒരു ഇന്ത്യന്‍ വനിതയ്ക്ക് അവിടെ പോയി ഫിഫ ലോകകപ്പ് കാണാന്‍ കഴിയാത്തതെന്ന് ഞാന്‍ അത്ഭുതപ്പെട്ടു. എന്റെ പ്രിയപ്പെട്ട ടീമായ അര്‍ജന്റീന ലോകകപ്പില്‍ കളിക്കുന്നത് കാണുന്നത് സ്വപ്ന സാക്ഷാത്കാരമായിരുന്നു,” അവര്‍ പറഞ്ഞു.
