തന്റെ ആകർഷകമായ കണ്ണുകൾ കൊണ്ടും, കൊത്തുപണികൾ ചെയ്തതുപോലെയുള്ള ശരീരപ്രകൃതി കൊണ്ടും, മാസ്മരികമായ നൃത്തചലനങ്ങൾ കൊണ്ടും ബോളിവുഡിന്റെ സ്വന്തം “ഗ്രീക്ക് ഗോഡ്” എന്ന് വിളിക്കപ്പെടുന്ന താരമാണ് ഹൃതിക് റോഷൻ. അദ്ദേഹത്തിന് 51 വയസ്സ് തികയുമ്പോഴും ആരാധകർക്കും ഫിറ്റ്നസ് പ്രേമികൾക്കും മുന്നിലുള്ള വലിയ ചോദ്യം ഇതാണ്: വർഷങ്ങൾ കഴിഞ്ഞിട്ടും അദ്ദേഹം എങ്ങനെയാണ് ഈ അസാമാന്യമായ ശാരീരികക്ഷമത നിലനിർത്തുന്നത്?
അടുത്തിടെ ഇൻസ്റ്റാഗ്രാമിലൂടെ തന്റെ ഫിറ്റ്നസ് യാത്രയെ രൂപപ്പെടുത്തുന്ന ലളിതവും പ്രായോഗികവുമായ ചില പ്രധാന തത്വങ്ങൾ വെളിപ്പെടുത്തി.
പോർഷൻ കൺട്രോൾ: മിതമായി കഴിക്കുന്നതിന്റെ കരുത്ത്
താൻ കഴിക്കുന്ന ഭക്ഷണത്തിന്റെ ചിത്രം പങ്കുവെച്ചുകൊണ്ട്, ഹൃതിക് തന്റെ ഭക്ഷണരീതിയെക്കുറിച്ച് വ്യക്തമാക്കി. റോസ്റ്റഡ് തക്കാളി, കാരറ്റ്, ബ്രസൽസ് സ്പ്രൗട്ട്സ്, വെണ്ടയ്ക്ക, ബെൽ പെപ്പർ, ബ്രൊക്കോളി, പയർ വർഗ്ഗങ്ങൾ, സാലഡ്, തന്തൂരി ചിക്കൻ ടിക്ക എന്നിവയടങ്ങിയ വൈവിധ്യമാർന്ന ഒരു പ്ലേറ്റായിരുന്നു അത്. ഇതിലെ രഹസ്യം മെനുവിലല്ല, മറിച്ച് അതിന്റെ അളവിലായിരുന്നു.
ഓരോ വിഭവവും വളരെ ചെറിയ അളവിൽ മാത്രമാണ് അദ്ദേഹം എടുത്തത്. ഇതിലൂടെ മിതമായി ഭക്ഷണം കഴിക്കുക എന്ന തന്റെ വിശ്വാസത്തെ അദ്ദേഹം അടിവരയിടുന്നു. “കുറച്ച് കഴിക്കൂ, കൂടുതൽ സ്നേഹിക്കൂ. പക്ഷേ പ്ലേറ്റ് വലുതായി തോന്നിപ്പിക്കണം,” എന്നാണ് മറ്റൊരു ചിത്രത്തോടൊപ്പം അദ്ദേഹം കുറിച്ചത്. ഈ രീതി അമിതഭക്ഷണം ഒഴിവാക്കുന്നതിനൊപ്പം മെറ്റബോളിസം സജീവമായി നിലനിർത്താനും സഹായിക്കുന്നു.
സമീകൃതാഹാരം
ഹൃതിക്കിന്റെ ഭക്ഷണക്രമത്തില് പേശികളുടെ ആരോഗ്യത്തിന് ചിക്കൻ, മുതിര തുടങ്ങിയ പ്രോട്ടീനുകൾ സഹായിക്കുമ്പോൾ, നാരുകൾ അടങ്ങിയ പച്ചക്കറികൾ ദഹനത്തെയും രോഗപ്രതിരോധ ശേഷിയെയും മെച്ചപ്പെടുത്തുന്നു. ബീറ്റ്റൂട്ട് ധാതുക്കളും വിറ്റാമിനുകളും നൽകുമ്പോൾ, വാഴപ്പഴം പേശികളുടെയും ദഹനത്തിന്റെയും ആരോഗ്യത്തിന് ആവശ്യമായ പൊട്ടാസ്യം നൽകുന്നു. അമിതമായ പരീക്ഷണങ്ങൾക്കും പകരം കൃത്യമായ പോഷക ഗുണങ്ങളിലാണ് അദ്ദേഹം ശ്രദ്ധ കേന്ദ്രീകരിക്കുന്നത്.
ലക്ഷ്യബോധത്തോടെയുള്ള പരിശീലനം
ജിം സെഷനുകൾ, നീന്തൽ, കടൽതീരത്തെ നീണ്ട നടത്തം എന്നിവ സമന്വയിപ്പിച്ചുകൊണ്ടുള്ള ഒരു വർക്കൗട്ട് രീതിയാണ് ഹൃതിക്കിന്റേത്. ശരീരം ഒരേ രീതിയിലുള്ള വ്യായാമങ്ങളുമായി ശീലിച്ചുപോകാതിരിക്കാൻ അദ്ദേഹം ശ്രദ്ധിക്കുന്നു. ചലനം എന്നത് ശരീരത്തിന് നൽകുന്ന ശിക്ഷയല്ല, മറിച്ച് അത് നിലനിർത്താനുള്ള മാർഗമാണെന്ന് അദ്ദേഹം വിശ്വസിക്കുന്നു.
നടത്തം, കാർഡിയോ
മുടക്കമില്ലാത്ത ഒരു ശീലം അദ്ദേഹത്തിനുണ്ട്: ദിവസവും കുറഞ്ഞത് 10,000 ചുവടുകൾ. കടൽതീരത്തുകൂടിയുള്ള ജോഗിംഗായാലും 40 മിനിറ്റ് നീളുന്ന നീന്തലായാലും, ശരീരം സജീവമാണെന്ന് അദ്ദേഹം ഉറപ്പാക്കുന്നു. ഒരേ രീതി തുടരുന്നതിന് പകരം വ്യായാമ മുറകളിൽ മാറ്റങ്ങൾ വരുത്തുന്നത് ശരീരത്തെയും മനസ്സിനെയും ഒരുപോലെ ഉന്മേഷത്തോടെ നിലനിർത്താൻ സഹായിക്കുന്നു.
അച്ചടക്കമുള്ള ജീവിതശൈലി: വിജയത്തിന്റെ അടിസ്ഥാനം
വ്യായാമത്തിനും ഭക്ഷണത്തിനും അപ്പുറം അദ്ദേഹത്തിന്റെ വിജയത്തിന് പിന്നിലെ അദൃശ്യമായ ഘടകം വിശ്രമമാണ്. രാത്രി 9 മണിയോടെ ഉറങ്ങാൻ പോകുന്ന താരം കൃത്യമായ ഉറക്കത്തിന് മുൻഗണന നൽകുന്നു. അതുപോലെ തന്നെ ദിവസവും 4-5 ലിറ്റർ വെള്ളം കുടിച്ച് ശരീരത്തിലെ ജലാംശം നിലനിർത്താനും അദ്ദേഹം ശ്രദ്ധിക്കാറുണ്ട്.
ദിവസവും 6 മുതൽ 7 തവണയായി ചെറിയ അളവിൽ ഭക്ഷണം കഴിക്കുന്നതിലൂടെ വിശപ്പില്ലാതെ ശരീരത്തിന് ആവശ്യമായ ഊർജ്ജം ലഭിക്കുന്നു. മുട്ടയുടെ വെള്ള, ചിക്കൻ, മത്സ്യം എന്നിവയ്ക്കൊപ്പം ഓട്സ്, ക്വിനോവ, മധുരക്കിഴങ്ങ് തുടങ്ങിയ കാർബോഹൈഡ്രേറ്റുകളും ചേരുന്നതാണ് അദ്ദേഹത്തിന്റെ ഡയറ്റ്.
കുറുക്കുവഴികൾക്ക് പിന്നാലെ പോകുന്ന ഒരു ഇൻഡസ്ട്രിയിൽ, ഹൃതിക് റോഷന്റെ ഈ യാത്ര ക്ഷമയുടെയും അച്ചടക്കത്തിന്റെയും ഉത്തമ ഉദാഹരണമാണ്. “ഗ്രീക്ക് ഗോഡ്” എന്ന വിശേഷണം അദ്ദേഹത്തിന് ഇന്നും ചേരുന്നത് എങ്ങനെ കാണപ്പെടുന്നു എന്നതിലല്ല, മറിച്ച് എത്രമാത്രം അച്ചടക്കത്തോടെ അദ്ദേഹം ജീവിക്കുന്നു എന്നതിലാണ്.
