എന്ത് കറിവെച്ചാലും തേങ്ങ അരച്ച് വെക്കുന്നതിന് പ്രത്യേക രുചിതന്നെയാണ്. തേങ്ങ പൊതിക്കുകയെന്നത് അല്‍പം പാടുള്ള പണിയാണ് . പൊതിച്ചു കഴിഞ്ഞാലോ പിന്നെ ചിരവിയെടുക്കലാണ് അടുത്ത പ്രശ്‌നം. എന്നും ചിരവിയെടുക്കുന്നതിന് പകരമായി തേങ്ങ പൂളിയെടുത്ത് ഉപയോഗിക്കുന്നതാണ് നല്ലത്.
പിന്നീട് ഇത് മിക്‌സിയില്‍ അടിച്ച് സിപ്പ് ലോക്ക് ബാഗുകളിലാക്കി ഫ്രീസറില്‍ സൂക്ഷിച്ചാല്‍ തിരക്കുള്ള സമയത്ത് കറികളിലും മറ്റും നേരിട്ടു ഉപയോഗിക്കാം. തേങ്ങയുടെ ഉള്ളിലെ മാംസളഭാഗം എളുപ്പത്തില്‍ പുറത്തെടുക്കാനായി കുറച്ച് വിദ്യകളുണ്ട്.
ആദ്യം കണ്ണ് തുളച്ച് വെള്ളം ഊറ്റികളയണം. തേങ്ങയുടെ നടുഭാഗത്ത് ചുറ്റികകൊണ്ട് അടിക്കുക. അപ്പോള്‍ നടുവേ പിളര്‍ന്ന് വരും. പിളര്‍ന്നുകഴിഞ്ഞാല്‍ രണ്ട് ഭാഗങ്ങളും വേര്‍പ്പെടുത്തണം. ഒരു കത്തിയോ സ്പൂണോ ഉപയോഗിച്ച് തേങ്ങ എഴുപ്പത്തില്‍ പുറംതോടില്‍ നിന്ന് പുറത്തെടുക്കാം. പൂളിയെടുക്കാന്‍ പറ്റുന്നില്ലെങ്കില്‍ മാംസളഭാഗം വേര്‍പ്പെടുത്താനായി ശ്രമിക്കുന്നതിന് മുമ്പ് തേങ്ങാക്കഷ്ണങ്ങളും 10-15 മിനിറ്റ് ഫ്രീസറില്‍ വയ്ക്കാം.
ചിരട്ടയ്ക്ക് നല്ല കടുപ്പം ഉണ്ടെങ്കില്‍ ഒന്ന് ചൂടാക്കിയാല്‍ ചിരട്ട എളുപ്പത്തില്‍ നീക്കം ചെയ്യാം. ഓവന്‍ 180 ഡിഗ്രി ല്‍ ചൂടാക്കുക . തുടര്‍ന്ന് തേങ്ങയുടെ കണ്ണുകളില്‍ ദ്വാരങ്ങള്‍ ഉണ്ടാക്കി തേങ്ങാവെള്ളം വറ്റിച്ചു കളയുക. തേങ്ങ ബേക്കിംഗ് ഷീറ്റില്‍ വച്ച് തേങ്ങ പ്രീഹിറ്റ് ചെയ്ത് അടുപ്പില്‍ വെച്ച് എകദേശം 10-15 മിനിറ്റ് ബേക്ക് ചെയ്യുക. തോട് പൊട്ടും. തണുത്തതിന് ശേഷം ചുറ്റിക കൊണ്ട് തോട് പിളരുന്നതുവരെ വിള്ളലുകളില്‍ മൃദുവായി തട്ടണം.
തോടും മാംസവും മൃദുവാക്കുന്ന ഒരു രീതിയാണ് തേങ്ങ തിളപ്പിക്കുന്നത്. ആദ്യം തന്നെ തേങ്ങയുടെ കണ്ണുകളില്‍ ദ്വാരങ്ങള്‍ ഉണ്ടാക്കി തേങ്ങാവെള്ളം ഊറ്റികളയുക. തേങ്ങ വെള്ളത്തില്‍ പാത്രത്തിലിട്ട് തിളപ്പിക്കുക. 15 മിനിറ്റിന് ശേഷം തേങ്ങ വെള്ളത്തില്‍ നിന്ന് പുറത്തെടുത്ത് തണുക്കാനായി അനുവദിക്കണം. തേങ്ങ പൊട്ടിച്ചതിന് ശേഷം കഷ്ണങ്ങള്‍ കുറച്ച്മണിക്കൂര്‍ ഫ്രീസറില്‍ വയ്ക്കുക. തണുത്ത താപനില തേങ്ങയുടെ മാംസം ചെറുതായി ചുരുങ്ങാനായി കാരണമാകും.
