ഉന്മേഷക്കുറവ് തോന്നുന്ന ദിവസങ്ങളിലും, അമിതമായ ഉറക്കം വരുമ്പോഴും, ജോലികളിൽ ശ്രദ്ധ കേന്ദ്രീകരിക്കാൻ കഴിയാതെ വരുമ്പോഴും കാപ്പി ഒരു മികച്ച പരിഹാരമാണ്. മിക്കവരുടെയും പ്രഭാത ദിനചര്യയുടെ ഭാഗമാണിന്ന് കാപ്പി. ദിവസം ഊർജ്ജസ്വലമായി തുടങ്ങാനും ജോലിസമയത്ത് ഉന്മേഷം നിലനിർത്താനും ഉച്ചകഴിഞ്ഞുള്ള തളർച്ച മാറ്റാനും പലരും കാപ്പിയെ ആശ്രയിക്കുന്നു.
കാപ്പിയിൽ അടങ്ങിയിരിക്കുന്ന ‘കഫീൻ’ ശ്രദ്ധയും ഏകാഗ്രതയും വർദ്ധിപ്പിക്കാൻ സഹായിക്കുന്ന ഒരു പ്രകൃതിദത്ത ഉത്തേജകമാണ്. കാപ്പി കുടിച്ച് 15 മുതൽ 30 മിനിറ്റിനുള്ളിൽ ഇതിന്റെ ഫലം കണ്ടുതുടങ്ങും. എന്നാൽ കാപ്പി മിതമായ അളവിൽ കുടിക്കുന്നതിനൊപ്പം തന്നെ ശരിയായ സമയത്ത് കുടിക്കേണ്ടതും വളരെ പ്രധാനമാണ്.
ശരിയായ സമയത്ത് കാപ്പി കുടിക്കുന്നത് അമിതമായ അസ്വസ്ഥതകൾ, ദഹനപ്രശ്നങ്ങൾ, വിറയൽ എന്നിവ ഒഴിവാക്കാൻ സഹായിക്കും.
കാപ്പിയുടെ ഗുണങ്ങൾ പൂർണ്ണമായും ലഭിക്കാൻ സമയം കൃത്യമായിരിക്കണം:
1. ഉണർന്നയുടനെ കാപ്പി കുടിക്കുന്നത് ഒഴിവാക്കുക: നമ്മെ ഉണർവോടെ ഇരിക്കാൻ സഹായിക്കുന്ന ‘കോർട്ടിസോൾ’ ( ഹോർമോൺ ശരീരത്തിൽ ഏറ്റവും കൂടുതൽ ഉത്പാദിപ്പിക്കപ്പെടുന്നത് നാം ഉണരുന്ന സമയത്താണ്. ആ സമയത്ത് തന്നെ കഫീൻ ശരീരത്തിലെത്തുന്നത് അമിതമായ ഉത്കണ്ഠയ്ക്കും വിറയലിനും കാരണമാകും. കൂടാതെ ശരീരത്തിന് കഫീനിനോടുള്ള സഹിഷ്ണുത (Tolerance) വേഗത്തിൽ വർദ്ധിക്കാനും ഇത് ഇടയാക്കും.
2. 60-90 മിനിറ്റ് നിയമം പാലിക്കുക: ഉണർന്ന് ചുരുങ്ങിയത് ഒരു മണിക്കൂർ കഴിഞ്ഞതിന് ശേഷം മാത്രം ആദ്യത്തെ കാപ്പി കുടിക്കുക. ഈ സമയമാകുമ്പോഴേക്കും ശരീരത്തിലെ കോർട്ടിസോൾ നില കുറഞ്ഞു തുടങ്ങും, ആ ഘട്ടത്തിൽ കാപ്പി കുടിക്കുന്നത് ജോലിയിൽ കൂടുതൽ ശ്രദ്ധ നൽകാൻ സഹായിക്കും.
3. ഉച്ചകഴിഞ്ഞുള്ള തളർച്ച മാറ്റാൻ: ഉച്ചകഴിഞ്ഞ് 1:00 നും 3:00 നും ഇടയിൽ ഒരു കപ്പ് കാപ്പി കുടിക്കുന്നത് ഉച്ചയ്ക്കുള്ള ക്ഷീണം മാറ്റാൻ സഹായിക്കും. ഇത് രാത്രിയിലെ ഉറക്കത്തെ ബാധിക്കുകയുമില്ല.
4. വ്യായാമത്തിന് മുൻപ്: കായിക പ്രകടനം മെച്ചപ്പെടുത്താൻ കാപ്പി സഹായിക്കും. വ്യായാമം തുടങ്ങുന്നതിന് 30-60 മിനിറ്റ് മുമ്പ് കാപ്പി കുടിക്കുന്നത് രക്തത്തിൽ കഫീന്റെ അളവ് കൃത്യമായി നിലനിർത്താൻ സഹായിക്കും.
5. വൈകുന്നേരം ഒഴിവാക്കുക: വൈകുന്നേരമോ രാത്രിയിലോ കാപ്പി കുടിക്കുന്നത് ഒഴിവാക്കുന്നതാണ് നല്ലത്, കാരണം ഇത് നിങ്ങളുടെ ഉറക്കത്തെ തടസ്സപ്പെടുത്തിയേക്കാം.
സുരക്ഷിതമായ കാപ്പി ഉപയോഗത്തിന് ചില നിർദ്ദേശങ്ങൾ:
- മിതത്വം പാലിക്കുക: ഒരു ദിവസം 3-4 കപ്പ് കാപ്പി കുടിക്കുന്നത് മിക്കവർക്കും സുരക്ഷിതമാണ്.
- ധാരാളം വെള്ളം കുടിക്കുക: കാപ്പി കുടിക്കുന്നത് ശരീരത്തിലെ ജലാംശം കുറയ്ക്കാൻ സാധ്യതയുള്ളതിനാൽ ഇടയ്ക്കിടെ വെള്ളം കുടിക്കാൻ ശ്രദ്ധിക്കണം.
- പഞ്ചസാര കുറയ്ക്കുക: കാപ്പി ആരോഗ്യകരമായി നിലനിർത്താൻ പഞ്ചസാരയുടെയും ക്രീമുകളുടെയും ഉപയോഗം കുറയ്ക്കുക.
- ഒഴിഞ്ഞ വയറ്റിൽ കുടിക്കരുത്: കാപ്പിയിൽ ആസിഡ് അടങ്ങിയിട്ടുള്ളതിനാൽ ഒഴിഞ്ഞ വയറ്റിൽ കുടിക്കുന്നത് വയറിൽ അസ്വസ്ഥത ഉണ്ടാക്കിയേക്കാം. അതിനാൽ പ്രഭാതഭക്ഷണത്തിനൊപ്പമോ ലഘുഭക്ഷണത്തിനൊപ്പമോ കുടിക്കുക.
കാപ്പിയുടെ ഗുണങ്ങൾ:
- ഏകാഗ്രതയും ശ്രദ്ധയും വർദ്ധിപ്പിക്കാൻ സഹായിക്കുന്നു.
- അഡ്രിനാലിൻ അളവ് വർദ്ധിപ്പിക്കുന്നതിലൂടെ ശാരീരിക പ്രകടനം മെച്ചപ്പെടുത്തുന്നു.
- ഇതിൽ ആന്റിഓക്സിഡന്റുകൾ ധാരാളമായി അടങ്ങിയിട്ടുണ്ട്.
- ടൈപ്പ് 2 പ്രമേഹം, പാർക്കിൻസൺസ്, അൽഷിമേഴ്സ് തുടങ്ങിയ രോഗങ്ങൾ വരാനുള്ള സാധ്യത കുറയ്ക്കാൻ സഹായിക്കുമെന്ന് ചില പഠനങ്ങൾ സൂചിപ്പിക്കുന്നു.
ചുരുക്കത്തിൽ, പരമാവധി ഗുണം ലഭിക്കാൻ രാവിലെ 9:30 നും 11:30 നും ഇടയിലുള്ള സമയമാണ് കാപ്പി കുടിക്കാൻ ഏറ്റവും അനുയോജ്യം.
