ഒരു യുവതി അയൽവാസിയുടെ മതിൽ മാന്തി അതില്നിന്നും സിമന്റ് കഴിക്കുന്നതിന്റെ വിചിത്രമായ ഒരു വീഡിയോ ഓൺലൈനിൽ പ്രചരിക്കുന്നു, ഇത് സോഷ്യൽ മീഡിയ പ്ലാറ്റ്ഫോമുകളിൽ വലിയ ആശങ്കയും ഭീതിയും ഉളവാക്കിയിട്ടുണ്ട്. ഒരു റെസിഡൻഷ്യൽ പരിസരത്തുനിന്ന് റെക്കോർഡ് ചെയ്തതെന്ന് കരുതുന്ന ഈ ദൃശ്യങ്ങൾ അതിവേഗം വൈറലായി, ആയിരക്കണക്കിന് പ്രതികരണങ്ങൾ നേടുകയും പെൺകുട്ടിയെക്കുറിച്ച് ചില ചോദ്യങ്ങൾ ഉയർത്തുകയും ചെയ്തു.
ക്ലിപ്പിൽ, പെൺകുട്ടി സ്വന്തം കൈകൾ ഉപയോഗിച്ച് മതിലിൽ നിന്ന് സിമന്റ് ചുരണ്ടി വായിൽ ഇടുന്നത് കാണാം. യാതൊരു മടിയുമില്ലാതെ, ശാന്തതയോടെ ചെയ്യുന്ന ഈ പ്രവൃത്തി കാഴ്ചക്കാരെ ഞെട്ടിക്കുകയും ആശങ്കപ്പെടുത്തുകയും ചെയ്തു.
വീഡിയോ ആദ്യം അവിശ്വാസത്തിന്റെയും കൗതുകത്തിന്റെയും തരംഗം സൃഷ്ടിച്ചപ്പോൾ, ആരോഗ്യ വിദഗ്ധര് പൈക (Pica) എന്ന അപൂർവവും ഗുരുതരവുമായ ഒരു ഭക്ഷണ വൈകല്യത്തെക്കുറിച്ച് ചൂണ്ടിക്കാട്ടി. ഭക്ഷ്യയോഗ്യമല്ലാത്ത വസ്തുക്കൾ കഴിക്കുന്ന അവസ്ഥയെ പറയുന്ന പേരാണിത്. അസാധാരണമായ വസ്തുക്കൾ തിന്നുന്ന പൈക എന്ന ഒരിനം പക്ഷിയുടെ പേരിൽ നിന്നാണ് ഈയവസ്ഥയ്ക്കും ഈ പേര് ലഭിച്ചത്.
പൈകയുള്ള വ്യക്തികൾക്ക് മണ്ണ്, ചോക്ക്, മുടി, പേപ്പർ, അപൂർവമായി സിമന്റ് പോലുള്ള ഭക്ഷ്യേതര വസ്തുക്കളോട് compulsive cravings ഉണ്ടാകാറുണ്ട്. ഈ അവസ്ഥ പലപ്പോഴും പോഷകാഹാരക്കുറവ്, വിട്ടുമാറാത്ത മാനസിക സമ്മർദ്ദം, അല്ലെങ്കിൽ മറ്റ് മാനസികാരോഗ്യ പ്രശ്നങ്ങൾ എന്നിവയുമായി ബന്ധപ്പെട്ടിരിക്കുന്നു. ഭക്ഷ്യയോഗ്യമല്ലാത്ത വസ്തുക്കൾ തിന്നുന്നത് ശീലമാക്കുന്നതും ഒരുതരം ഈറ്റിങ് ഡിസോർഡറാണ്.
ഇത്തരം പെരുമാറ്റങ്ങൾ തള്ളിക്കളയുകയോ പരിഹസിക്കുകയോ ചെയ്യരുതെന്ന് മെഡിക്കൽ വിദഗ്ധർ പറയുന്നു. പൈക ചികിത്സിക്കാതെ വിട്ടാൽ, വിഷമുള്ളതോ ദോഷകരമായതോ ആയ വസ്തുക്കൾ കഴിക്കുന്നത് കാരണം ഗുരുതരമായ ആരോഗ്യ പ്രശ്നങ്ങൾക്ക് കാരണമാകും. ഭക്ഷ്യയോഗ്യമല്ലാത്ത വസ്തുക്കൾ കഴിക്കാനുള്ള ത്വര ഇക്കൂട്ടർക്ക് തടയാനാകില്ല, എന്തൊക്കെതരം വസ്തുക്കളാണ് തിന്നുന്നത് എന്നതിനെ അപേക്ഷിച്ച് അവസ്ഥയും സങ്കീർണമാകാം. തെറാപ്പിയിലൂടെയും ജീവിതശൈലീമാറ്റങ്ങളിലൂടെയും ഇതിന് പരാഹാരം കണ്ടെത്താമെന്നാണ് വിദഗ്ധർ പറയുന്നത്.
എന്താണ് പൈകയ്ക്ക് പിന്നിലെ കാരണമെന്നത് സംബന്ധിച്ച യഥാർഥ കാരണമൊന്നും ഇതുവരെ കണ്ടെത്തിയിട്ടില്ല. പക്ഷേ ചില ഘടകങ്ങൾ സാധ്യത വർധിപ്പിക്കാം. അമിതസമ്മർദത്തിലൂടെ കടന്നുപോകുന്നവർ അതിനെ മറികടക്കാൻ ഈ ഈറ്റിങ് ഡിസോർഡറിൽ അഭയം തേടാറുണ്ട്. കുട്ടിക്കാലത്തെ അരക്ഷിതാവസ്ഥകളും മറ്റും ഇതിലേക്ക് നയിച്ചേക്കാം. അയൺ, കാൽസ്യം, സിങ്ക് തുടങ്ങിയവയുടെ കുറവുകളും കാരണമാകാറുണ്ട്. ഗർഭവും സിക്കിൾ സെൽ അനീമിയ രോഗവും ഈയവസ്ഥയിലേക്ക് നയിക്കാറുണ്ട്. ചില മരുന്നുകളും പൈകയ്ക്ക് സമാനമായ അവസ്ഥയിലേക്ക് നയിക്കുമെന്ന് പറയാറുണ്ട്.
വീഡിയോയിലുള്ള പെൺകുട്ടിയുടെ വ്യക്തിത്വവും സ്ഥലവും സ്ഥിരീകരിച്ചിട്ടില്ലെങ്കിലും, അവൾക്ക് വൈദ്യസഹായവും പരിചരണവും ലഭിക്കുന്നുണ്ടെന്ന് ഉറപ്പാക്കാൻ രക്ഷിതാക്കളോടും പ്രാദേശിക അധികാരികളോടും ഇടപെടാൻ ആവശ്യം ഉയർന്നിട്ടുണ്ട്. ഇത്തരം സംഭവങ്ങളോട് പരിഹാസമല്ല, സഹാനുഭൂതി കാണിക്കണമെന്ന് നിരവധി ഉപയോക്താക്കൾ പൊതുജനങ്ങളോട് അഭ്യർത്ഥിക്കുകയും ചെയ്തു.
