സാങ്കേതികവിദ്യയിൽ ശ്രദ്ധേയമായ മുന്നേറ്റങ്ങൾ നടത്തുന്നതിന് പേരുകേട്ട രാജ്യമാണ് ജപ്പാൻ. വൈദ്യുതി ഉൽപ്പാദിപ്പിക്കുന്നതിനുള്ള അവരുടെ ഏറ്റവും പുതിയ പദ്ധതി ആഗോള ശ്രദ്ധ പിടിച്ചുപറ്റിയിരിക്കുകയാണ്. ബഹിരാകാശത്ത് സൗരോർജ്ജം ഉപയോഗപ്പെടുത്തുകയും ആ ഊർജ്ജം ഭൂമിയിലേക്ക് തിരികെ കൈമാറുകയും ചെയ്യുക എന്ന ഒരു വിപ്ലവകരമായ സംരംഭത്തിനു പിന്നിലാണ് ഇപ്പോള്‍ ജപ്പാന്‍. എന്നാല്‍ ഒരു ചോദ്യം
ഇവിടെ ഉയരുന്നുണ്ട്. ഭൗതികമായി വയറുകൾ സാധ്യമല്ലാത്തപ്പോൾ ബഹിരാകാശത്ത് നിന്ന് ഭൂമിയിലേക്ക് വൈദ്യുതി എങ്ങനെ എത്തിക്കാം?
റിപ്പോർട്ടുകൾ പ്രകാരം, സൗരോർജ്ജത്തെ മൈക്രോവേവുകളാക്കി മാറ്റുന്ന പ്രക്രിയയാണ് ആദ്യഘട്ടം. തുടർന്ന് അത് വയർലെസ് വഴി ഊർജ്ജ രശ്മികളായി ഭൂമിയിലേക്ക് കൈമാറ്റം ചെയ്യപ്പെടും. അവിടെവച്ച് പ്രത്യേകം രൂപകൽപ്പന ചെയ്ത ആന്റിനകൾ അവയെ സ്വീകരിച്ച് വൈദ്യുതിയാക്കി മാറ്റും.
ഈ ആശയം ഭാവിയുടേതാണെന്ന് തോന്നുമെങ്കിലും, ജപ്പാൻ അത് പരീക്ഷിക്കാൻ തയ്യാറാവുകയാണ്. ഒഹിസാമ പദ്ധതിയുടെ ഭാഗമായി 2 ചതുരശ്ര മീറ്റർ സോളാർ പാനൽ ഘടിപ്പിച്ച 180 കിലോഗ്രാം ഉപഗ്രഹം താഴ്ന്ന ഭൂമിയുടെ ഭ്രമണപഥത്തിലേക്ക് വിക്ഷേപിക്കാൻ രാജ്യം തയ്യാറെടുക്കുകയാണ്. ‘ഒഹിസാമ’ എന്നാൽ ജാപ്പനീസ് ഭാഷയിൽ ‘സൂര്യൻ’ എന്നാണ് അർത്ഥമാക്കുന്നത്. ഉപഗ്രഹം സൂര്യപ്രകാശം ശേഖരിച്ച് അതിന്റെ ഓൺബോർഡ് ബാറ്ററികൾ ചാർജ് ചെയ്യും. തുടർന്ന് സംഭരിച്ചിരിക്കുന്ന ഊർജ്ജം ഭൂമിയിലേക്ക് മൈക്രോവേവുകളാക്കി അയയ്ക്കുകയും ചെയ്യും.
ജപ്പാൻ സ്‌പേസ് സിസ്റ്റംസിലെ ഉപദേഷ്ടാവായ കൊയിച്ചി ഇജിച്ചി, ഈ ചെറിയ ഉപഗ്രഹം ഏകദേശം 400 കിലോമീറ്റർ ഉയരത്തിൽ ഭ്രമണം ചെയ്യുമെന്നും ഒരു ചെറിയ വീട്ടുപകരണം ഒരു മണിക്കൂർ പ്രവർത്തിപ്പിക്കാൻ ആവശ്യമായ ഒരു കിലോവാട്ട് വൈദ്യുതി ഇത് ഭൂമിയിലേയ്ക്ക് പ്രക്ഷേപണം ചെയ്യുമെന്നും പറഞ്ഞു. ഉപഗ്രഹത്തിന്റെ വേഗത കാരണം (ഏകദേശം 28,000 കിലോമീറ്റർ/മണിക്കൂർ) ഉയർന്ന വേഗത്തിലെത്തുന്ന ഊർജ്ജം
കാര്യക്ഷമമായി പിടിച്ചെടുക്കുന്നതിന് ഭൂമിയില്‍ സ്വീകരണ ആന്റിനകൾ നിരവധി കിലോമീറ്ററുകളോളം വ്യാപിപ്പിക്കേണ്ടതുണ്ട്.
2025-ൽ ഒഹിസാമ ദൗത്യം വിക്ഷേപിക്കാൻ പദ്ധതി തയാറായിട്ടുണ്ട്. ഭൂമിയിലേക്ക് ബഹിരാകാശ അധിഷ്ഠിത സൗരോർജ്ജ പ്രക്ഷേപണത്തിന്റെ ലോകത്തിലെ ആദ്യത്തെ പദ്ധതിയാണിത്. ചെറിയ ദൂരങ്ങളിൽ വയർലെസ് ഊർജ്ജ പ്രക്ഷേപണം സാധ്യമാണെന്ന് മുൻ പരീക്ഷണങ്ങൾ ഇതിനകം തെളിയിച്ചിട്ടുണ്ട്. കൂടാതെ ഉപഗ്രഹ വിക്ഷേപണത്തിന് മുമ്പ് വിമാനങ്ങൾ ഉപയോഗിച്ച് കൂടുതൽ പരീക്ഷണങ്ങൾ നടത്താനും ജപ്പാൻ പദ്ധതിയിടുന്നു.
ചെറിയ തോതിലുള്ള ഉപയോഗത്തിന് ആവശ്യമായ വൈദ്യുതി മാത്രമേ ഈ മോഡല്‍ നൽകുകയുള്ളുവെങ്കിലും, ഭാവിയിലെ പരിധിയില്ലാത്ത ഊർജ്ജത്തിലേയ്ക്കള്ള ഒരു നിർണായക ചുവടുവയ്പ്പാണ് ഈ ദൗത്യം. വിജയിച്ചാൽ, കാലാവസ്ഥയെ ആശ്രയിക്കാതെ ബഹിരാകാശത്തെ അടിസ്ഥാനമാക്കിയുള്ള സൗരോർജ്ജ വിതരണം നൽകാൻ ഇതിന് കഴിയും. ഇത് ഭൂമിയിലെ ഫോസിൽ ഇന്ധനങ്ങളെ ആശ്രയിക്കുന്നത് കുറയ്ക്കാനും കാലാവസ്ഥാ വ്യതിയാനത്തിനെതിരായ ആഗോള ശ്രമങ്ങൾക്ക് സഹായകമാകുകയും ചെയ്യും.
