പരിമിതമായ തോതില്‍ ബിയര്‍ കുടിച്ചാല്‍ കുറച്ച് ആരോഗ്യ ഗുണങ്ങളുണ്ടെന്ന് കണ്ടെത്തി പ്ലോസ് വണ്‍ ജേണലില്‍ പ്രസിദ്ധീകരിച്ച ഗവേഷണ പഠനം. ഹൃദയത്തിന്റെ ആരോഗ്യത്തിന് സഹായിക്കുന്ന ചില പോളിഫെനോളുകളും വൈറ്റമിനുകളും അമിനോ ആസിഡുകളും ബിയറിലുണ്ടെന്നാണ് പഠനം വ്യക്തമാക്കുന്നത്.
അഞ്ച്‌ ശതമാനം ആല്‍ക്കഹോള്‍ തോതുള്ള ബിയറിന്റെ 330 മില്ലി വരുന്ന കാന്‍ പ്രതിദിനം ഒരെണ്ണം വീതം സ്ത്രീകളും രണ്ടെണ്ണം വീതം പുരുഷന്മാരും കഴിക്കുന്നതിനെയാണ് പഠനത്തില്‍ പരിമിതമായ ബിയര്‍ ഉപയോഗമായി പറയുന്നത്. ബിയറിലുള്ള പോളിഫെനോലുകള്‍ക്ക് ആന്റി ഇന്‍ഫ്ളമേറ്ററി, ആന്റി ഓക്സിഡന്റ് ഗുണങ്ങളുണ്ടെന്നും ഇത് ഹൃദയത്തിന്റെ രക്തക്കുഴലുകളുടെ ആവരണമായ എന്‍ഡോത്തിലിയത്തിന്റെ പ്രവര്‍ത്തനത്തെ മെച്ചപ്പെടുത്തുന്നുവെന്നും ഗവേഷകര്‍ വ്യക്തമാക്കുന്നു. കൊളസ്ട്രോള്‍ തോത് താഴ്ത്താനും ഇത് ഉപകരിക്കും.
ബിയറില്‍ അടങ്ങിയിരിക്കുന്ന ഡയറ്ററി സിലിക്കണ്‍ എല്ലുകളുടെ ആരോഗ്യത്തെയും മെച്ചപ്പെടുത്തുവെന്ന് പഠനം വ്യക്തമാക്കുന്നു. ബിയറില്‍ അടങ്ങിയിരിക്കുന്ന ഉയര്‍ന്ന ജലത്തിന്റെ അളവ് ഡൈയുറെറ്റിക് ഗുണങ്ങളും വൃക്കകളില്‍ കല്ലുണ്ടാകാനുള്ള സാധ്യതയും കുറയ്ക്കുമെന്നും പഠനം തെളിയിക്കുന്നു. കൂടുതല്‍ മൂത്രമൊഴിക്കുന്നതിലൂടെ വിഷവസ്തുക്കള്‍ പുറന്തള്ളുന്നുവെന്നും ധാതുക്കള്‍ കട്ടപ്പിടിച്ച് വൃക്കയില്‍ കല്ലുകളാകുന്നത് തടയുമെന്നും ഗവേഷകര്‍ കൂട്ടിച്ചേര്‍ക്കുന്നു.
വൈറ്റമിന്‍ ബി1 ബി 2, ബി6, ബി9, ബി12 എന്നിവയെല്ലാം ബിയറില്‍ അടങ്ങിയിരിക്കുന്നതായും ഇത് ഊര്‍ജ്ജോദിപാദനത്തിലും ചുവന്ന രക്തകോശങ്ങളുടെ നിര്‍മ്മാണത്തിലും തലച്ചോറിന്റെ പ്രവര്‍ത്തനും സഹായിക്കുമെന്നും ഗവേഷകര്‍ പറയുന്നു. എന്നാല്‍ പഠനത്തിലെ കാര്യങ്ങളൊക്കെ കണ്ണുമടച്ച് വിശ്വസിച്ച് ജീവിതത്തില്‍ നടപ്പാക്കരുതെന്ന് ആരോഗ്യ വിദഗ്ധര്‍ മുന്നറിയിപ്പും നല്‍കുന്നുണ്ട്.
