ഇന്ത്യയിലെയും ലോകമെമ്പാടുമുള്ള ഏറ്റവും പ്രശസ്തമായ വിനോദസഞ്ചാര കേന്ദ്രങ്ങളിൽ ഒന്നാണ് ഗോവ . ഇവിടുത്തെ മനോഹരമായ ബീച്ചുകളും രാത്രി ജീവിതവും സഞ്ചാരികൾക്ക് ഏറെ പ്രിയപ്പെട്ടതാണ്. എന്നാൽ ഗോവയിലെ പ്രകൃതിദത്തമായ ഈ പ്രതിഭാസത്തെക്കുറിച്ച് നിങ്ങൾ കേട്ടിട്ടുണ്ടോ? 400 വർഷം പഴക്കമുള്ള നെത്രാവലിയിലെ ബുദ്ബുദ്യാഞ്ചെ താലെ എന്ന ഈ തടാകമാണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്. തെക്കൻ ഗോവയിലെ സംഗ്വേമിലാണ് ഈ തടാകം സ്ഥിതി ചെയ്യുന്നത്.
നിങ്ങൾ ഈ തടാകത്തിന് സമീപം ചെന്ന് കൈ കൊട്ടിയാല്, തടാകത്തിന്റെ ഉപരിതലത്തിൽ കുമിളകൾ ഉണ്ടാകും. ശാസ്ത്രജ്ഞരുടെയും വിദഗ്ധരുടെയും അഭിപ്രായത്തിൽ, തടാകത്തിന്റെ അടിത്തട്ടിൽ കുടുങ്ങിക്കിടക്കുന്ന മീഥേൻ വാതകമാണ് കുമിളകൾ ഉണ്ടാകാനുള്ള കാരണമെന്നാണ്. നിങ്ങൾ കൈയ്യടിക്കുമ്പോൾ ഉണ്ടാകുന്ന ശബ്ദം കാരണം തടാകത്തിന്റെ അടിത്തട്ടിൽ നിന്ന് മീഥേൻ കുമിളകൾ ഉപരിതലത്തിലേക്ക് വരുന്നു. ഇത് മനുഷ്യന് കൈ കൊട്ടുമ്പോള് തടാകം പ്രതികരിക്കുന്നു എന്ന തോന്നൽ ഉണ്ടാക്കുന്നു.
ഈ പ്രതിഭാസത്തിന് പിന്നിൽ ശാസ്ത്രീയ കാരണങ്ങളുണ്ടെങ്കിലും, ഇതിനെക്കുറിച്ച് പ്രദേശവാസികൾക്ക് അവരുടേതായ വിശ്വാസങ്ങളുണ്ട്. ഈ കുമിളകൾ തടാകത്തിലെ ദേവതകളുടെ അനുഗ്രഹമാണെന്ന് ചിലർ വിശ്വസിക്കുന്നു, മറ്റു ചിലർ മനുഷ്യന്റെ സാന്നിധ്യം കാരണം തടാകം ശ്വാസമെടുക്കുന്നതാണെന്നും വിശ്വസിക്കുന്നു. ഈ ശാസ്ത്രവും വിശ്വാസവും കൂടിക്കലർന്ന ഈ പ്രതിഭാസം ഇവിടേക്ക് കൂടുതൽ സഞ്ചാരികളെ ആകർഷിക്കുന്നു.
എന്തുകൊണ്ട് നെത്രാവലി തടാകം സന്ദർശിക്കണം?
നെത്രാവലി തടാകം കുമിളകൾക്ക് പേരുകേട്ടത് മാത്രമല്ല. തടാകത്തിന് ചുറ്റുമുള്ള ഗ്രാമം ജൈവവൈവിധ്യം, ഇടതൂർന്ന വനങ്ങൾ, മനോഹരമായ ട്രെക്കിംഗ് വഴികൾ എന്നിവയ്ക്ക് പേരുകേട്ടതാണ്. അടുത്ത് തന്നെയുള്ള ശ്രീകൃഷ്ണന് സമർപ്പിക്കപ്പെട്ട ഗോപിനാഥ് ക്ഷേത്രവുമായി ഈ തടാകം ബന്ധപ്പെട്ടിരിക്കുന്നതിനാൽ ഇത് വളരെ പവിത്രമായി കരുതുന്നു. രാവിലെ 8 മുതൽ രാത്രി 8 വരെയാണ് തടാകം സന്ദർശിക്കാനായി തുറന്നിരിക്കുന്നത്.
