ദക്ഷിണേന്ത്യൻ വിഭവങ്ങളോട് ആർക്കാണ് ‘നോ’ പറയാൻ കഴിയുക? ഇന്ത്യയിലെത്തിയ ബ്രിട്ടീഷ് ഉപപ്രധാനമന്ത്രി ഡേവിഡ് ലാമിക്കും അതിന് സാധിച്ചില്ല. 2026-ലെ ‘എഐ സമ്മിറ്റിൽ’ പങ്കെടുക്കാൻ എത്തിയ അദ്ദേഹം ഇന്ത്യയിലെ പ്രാദേശിക ഭക്ഷണങ്ങളും സംസ്കാരവും ആസ്വദിക്കുകയാണ്.
പ്രശസ്ത ഫുഡ് വ്ലോഗർ സമീർ ബാവയ്ക്കൊപ്പം ഡൽഹിയിലെ ഭക്ഷണരുചികൾ തേടി ഡേവിഡ് ലാമി നടത്തിയ യാത്രയുടെ വീഡിയോ ഇപ്പോൾ വൈറലാണ്. “അദ്ദേഹത്തിന് ഒരു ടേസ്റ്റ് ചെക്ക് നടത്തണമെന്ന് പറഞ്ഞു, ഞാൻ പറഞ്ഞു തീർച്ചയായും ആകാമെന്ന്,” എന്ന് പറഞ്ഞുകൊണ്ടാണ് സമീർ വീഡിയോ തുടങ്ങുന്നത്.
ഡൽഹിയിലെ പ്രശസ്തമായ ‘ജഗ്ഗർനോട്ട്’ എന്ന റെസ്റ്റോറന്റിൽ വെച്ചായിരുന്നു ഇരുവരും ദക്ഷിണേന്ത്യൻ പ്രഭാതഭക്ഷണം കഴിച്ചത്. സംഭാഷണത്തിനിടയിൽ ഇന്ത്യയെക്കുറിച്ച് ഓർക്കുമ്പോൾ ആദ്യം മനസ്സിൽ വരുന്ന മൂന്ന് കാര്യങ്ങൾ ഏതാണെന്ന് സമീർ ചോദിച്ചപ്പോൾ, “എരിവ് , ചൂട് , രുചി എന്നായിരുന്നു ഡേവിഡ് ലാമിയുടെ മറുപടി. അദ്ദേഹത്തിന് ഏറ്റവും ഇഷ്ടപ്പെട്ട ഇന്ത്യൻ വിഭവം ഏതെന്ന ചോദ്യത്തിന് ” മീൻ കറി” (Fish Curry) എന്നാണ് അദ്ദേഹം ഉത്തരം നൽകിയത്.
രുചിയൂറും വിഭവങ്ങൾ: പൊടി ഇഡ്ഡലി, മിനി ഇഡ്ഡലി, വട, ഫിൽട്ടർ കോഫി എന്നിവയാണ് അവർ കഴിച്ചത്. ഒരു വടയെടുത്ത് തക്കാളി ചട്ണിയിലും തേങ്ങാ ചട്ണിയിലും മുക്കി കഴിച്ചുകൊണ്ട് “അതിമനോഹരം, ആത്മാവ് തൊടുന്ന രുചി” എന്ന് ലാമി വിശേഷിപ്പിച്ചു.
സോഷ്യൽ മീഡിയ പ്രതികരണം:
സമീർ ബാവ തന്റെ ഇൻസ്റ്റാഗ്രാമിൽ ഈ വീഡിയോ പങ്കുവെച്ചുകൊണ്ട് കുറിച്ചു: “ബ്രിട്ടീഷ് ഉപപ്രധാനമന്ത്രിയോടൊപ്പം ഡൽഹിയിൽ പ്രഭാതഭക്ഷണം. അദ്ദേഹത്തോടും യുകെ ഹൈക്കമ്മീഷൻ ടീമിനോടും ഒപ്പം സമയം ചെലവഴിക്കാൻ കഴിഞ്ഞതിൽ സന്തോഷം.”
ഡേവിഡ് ലാമി ഈ വീഡിയോ തന്റെ ഇൻസ്റ്റാഗ്രാം സ്റ്റോറിയായി പങ്കുവെക്കുകയും, “ഇന്ന് രാവിലെ ഞാനൊരു ഫുഡ് കണ്ടന്റ് ക്രിയേറ്ററായി മാറി,” എന്ന് തമാശയായി കുറിക്കുകയും ചെയ്തു. സമീർ വീഡിയോകൾ ചിത്രീകരിക്കുന്ന രീതി കാണുന്നത് രസകരമായിരുന്നുവെന്നും ഭക്ഷണം അതിശയകരമായിരുന്നുവെന്നും അദ്ദേഹം കൂട്ടിച്ചേർത്തു.
