കലോറി ട്രാക്ക് ചെയ്യുക, വർക്കൗട്ടുകൾ പ്ലാൻ ചെയ്യുക, ഭക്ഷണത്തോടുള്ള കൊതി നിയന്ത്രിക്കുക എന്നിവ ശരീരഭാരം കുറയ്ക്കാൻ ശ്രമിക്കുന്ന ഒരാൾക്ക് പലപ്പോഴും വലിയൊരു വെല്ലുവിളിയായി മാറാറുണ്ട്. ഇന്റർനെറ്റിലെ പരസ്പരവിരുദ്ധമായ ഉപദേശങ്ങൾ കൂടി ചേരുമ്പോൾ എല്ലാം കൂടുതൽ കുഴപ്പത്തിലാകുന്നു. ഇത്തരം സാഹചര്യത്തിൽ പുതിയൊരു ഭക്ഷണക്രമം (Fad diet) പരീക്ഷിക്കുന്നതിന് പകരം സാങ്കേതികവിദ്യയുടെ സഹായം തേടുന്നത് ഫലപ്രദമായ മാറ്റം കൊണ്ടുവരും.
രജിസ്റ്റർ ചെയ്ത ഡയറ്റീഷ്യനും ഫിറ്റ്നസ് വിദഗ്ധയുമായ ജൂലി തന്റെ ഇൻസ്റ്റാഗ്രാം പോസ്റ്റിലൂടെ ശരീരഭാരം കുറയ്ക്കാനും കൊഴുപ്പ് ഇല്ലാതാക്കാനും സഹായിക്കുന്ന 5 ചാറ്റ് ജിപിടി പ്രോംപ്റ്റുകൾ പങ്കുവെച്ചിരിക്കുന്നു. കൃത്യമായ ചോദ്യങ്ങൾ ചോദിക്കാൻ അറിഞ്ഞാൽ ചാറ്റ് ജിപിടിയെ ഒരു “സൗജന്യ ഡിജിറ്റൽ കോച്ചായി” മാറ്റാമെന്ന് ജൂലി പറയുന്നു.
നിങ്ങളുടെ ഫാറ്റ് ലോസ് യാത്ര സുഗമമാക്കാൻ സഹായിക്കുന്ന ആ 5 പ്രോംപ്റ്റുകൾ താഴെ നൽകുന്നു:
1. കലോറി ഡെഫിസിറ്റ് കണക്കാക്കാം
“എനിക്ക് 180 പൗണ്ട് ഭാരമുണ്ട്, 45 വയസ്സാണ്, സ്ത്രീയാണ്, ഉയരം 5’3”. ആഴ്ചയിൽ മൂന്ന് തവണ വ്യായാമം ചെയ്യുന്നു. ആരോഗ്യകരമായി ഭാരം കുറയ്ക്കാൻ ഞാൻ പ്രതിദിനം എത്ര കലോറി ലക്ഷ്യം വെക്കണം?” എന്ന് ചോദിക്കാൻ ജൂലി നിർദ്ദേശിക്കുന്നു. ഇത് നിങ്ങളുടെ പ്രായത്തിനും ശരീരപ്രകൃതിക്കും അനുയോജ്യമായ ഒരു തുടക്കം നൽകും.
2. ഭക്ഷണക്രമം പ്ലാൻ ചെയ്യാം
“രക്തത്തിലെ പഞ്ചസാരയുടെ അളവ് നിലനിർത്താനും മധ്യവയസ്സിലെ ഭാരം കുറയ്ക്കാനും സഹായിക്കുന്ന 1700 കലോറിയുള്ള ഒരു സിമ്പിൾ മീൽ പ്ലാൻ തയ്യാറാക്കി തരിക. എനിക്ക് ചിക്കനും പാസ്തയും ഇഷ്ടമാണ്, എന്നാൽ കടൽ വിഭവങ്ങൾ ഇഷ്ടമല്ല.” ഇങ്ങനെ ചോദിക്കുന്നതിലൂടെ നമുക്ക് ഇഷ്ടപ്പെട്ട ഭക്ഷണങ്ങൾ ഉൾപ്പെടുത്തിക്കൊണ്ടുള്ള മെനു ലഭിക്കും.
3. തിരക്കിനിടയിലും വർക്കൗട്ടുകൾ പ്ലാൻ ചെയ്യാം
“ആഴ്ചയിൽ മൂന്ന് ദിവസം എനിക്ക് 12 മണിക്കൂർ ഷിഫ്റ്റ് ജോലിയുണ്ട്. എനിക്ക് വ്യായാമത്തിനായി തിങ്കൾ മുതൽ വെള്ളി വരെ 30 മിനിറ്റ് മാത്രമേ ലഭിക്കൂ. എനിക്കൊരു വർക്കൗട്ട് ഷെഡ്യൂൾ തയ്യാറാക്കി തരിക.” ജോലിത്തിരക്കുള്ളവർക്ക് ഇത് ഏറെ ഉപകാരപ്പെടും.
4. ഹോർമോൺ മാറ്റങ്ങളെക്കുറിച്ച് മനസ്സിലാക്കാം
മധ്യവയസ്സിലുണ്ടാകുന്ന പെട്ടെന്നുള്ള വയറിലെ കൊഴുപ്പ് വർദ്ധനവിനെക്കുറിച്ച് ഇങ്ങനെ ചോദിക്കാം: “എനിക്ക് 52 വയസ്സാണ്, ജീവിതശൈലിയിൽ മാറ്റമില്ലാഞ്ഞിട്ടും മൂഡ് സ്വിംഗും വയറിലെ കൊഴുപ്പും വർദ്ധിക്കുന്നു. ഇതിന്റെ ഹോർമോൺ കാരണങ്ങൾ വിശദീകരിക്കുക.” ഇത് ഡോക്ടറുമായി സംസാരിക്കുമ്പോൾ നിങ്ങൾക്ക് കൂടുതൽ വ്യക്തത നൽകും.
5. തടസ്സങ്ങൾ പരിഹരിക്കാം
ശരീരഭാരം ഒരേ അളവിൽ നിൽക്കുമ്പോൾ ഈ പ്രോംപ്റ്റ് പരീക്ഷിക്കാം: “ഞാൻ ആരോഗ്യകരമായ ഭക്ഷണമാണ് കഴിക്കുന്നത്, വ്യായാമവും ചെയ്യുന്നുണ്ട്. എന്നിട്ടും ഭാരം കുറയുന്നില്ല. ഇതിന് സാധ്യമായ 3 കാരണങ്ങൾ പറയുക.” വെറുതെ ‘ഭക്ഷണം കുറയ്ക്കുക’ എന്ന ഉപദേശത്തിന് പകരം പ്രായോഗികമായ പരിഹാരങ്ങൾ കണ്ടെത്താൻ ഇത് സഹായിക്കും.
ശ്രദ്ധിക്കുക: എഐ നൽകുന്ന നിർദ്ദേശങ്ങൾ ഒരിക്കലും ഒരു ഡോക്ടറുടെ ഉപദേശത്തിന് പകരമാവില്ല. അതിനാൽ വലിയ രീതിയിലുള്ള മാറ്റങ്ങൾ വരുത്തുന്നതിന് മുൻപ് ഒരു വിദഗ്ദ്ധനെ കാണുന്നത് നന്നായിരിക്കും.
