ഫ്ളോറിഡയിലെ എവര്‍ഗ്ലേഡ്സില്‍ ഒരു കൂറ്റന്‍ ബര്‍മീസ് പെരുമ്പാമ്പ് ഒരു മാനിനെ മുഴുവനായി വിഴുങ്ങി. പാമ്പുകളുടെ ശാരീരികമായ പരിമിതികളെക്കുറിച്ചുള്ള വിശ്വാസങ്ങളെ വെല്ലുവിളിക്കുന്നതായി മാറിയിട്ടുണ്ട് സംഭവം. പാമ്പിന്റെ പിണ്ഡത്തിന്റെ 67 ശതമാനം വരുന്ന 35 കിലോഗ്രാം ഭാരമുള്ള മാനിനെ പെരുമ്പാമ്പ് ഭക്ഷിക്കുകയായിരുന്നു.
മാനിനെ വായില്‍ കയറ്റാന്‍, പെരുമ്പാമ്പ് വായ അതിന്റെ പരമാവധി വിടവിന്റെ 93 ശതമാനത്തിലെത്തിയതായി റെപ്റ്റൈല്‍സ് & ആംഫിബിയന്‍സ് ജേണലില്‍ പ്രസിദ്ധീകരിച്ച ഒരു പഠനം പറയുന്നു. ബര്‍മീസ് പെരുമ്പാമ്പുകള്‍ മാനുകളെയും ചീങ്കണ്ണികളെയും ഭക്ഷിക്കുന്നതായി അറിയപ്പെടുന്നു. എന്നിരുന്നാലും, അവരെ പിടികൂടുന്നത് അത്ര എളുപ്പമല്ല.
ഇരുപതാം നൂറ്റാണ്ടിന്റെ മധ്യത്തിലും അവസാനത്തിലുാണ് എവര്‍ഗ്ലേഡ്സില്‍ ബര്‍മീസ് പെരുമ്പാമ്പുകളെ കണ്ടെത്തിയത്. 1979-ലാണ് ഇവയെ ആദ്യമായി കണ്ടത്. 1990-കളില്‍ ഇവ ശക്തമായി നിലയുറപ്പിക്കുകയും തദ്ദേശീയ ഇനങ്ങളെ ഭക്ഷണമാക്കുകയും ചെയ്തു.
പ്രകൃതിദത്ത വേട്ടക്കാരുടെ അഭാവത്തില്‍ അവ വളര്‍ന്നുകൊണ്ടിരുന്നു. ഫ്‌ലോറിഡയില്‍ ബര്‍മീസ് പൈത്തണുകള്‍ ലക്ഷക്കണക്കിന് വരുമെന്ന് വിദഗ്ധര്‍ കണക്കാക്കുന്നു. കഴിഞ്ഞ ദശകങ്ങളില്‍ അവ പ്രാദേശിക ആവാസവ്യവസ്ഥകളെ നശിപ്പിക്കുകയും നിരവധി സസ്തനികളെ കൊല്ലുകയും ചെയ്തു. പഠനമനുസരിച്ച്, ഒരു ബര്‍മീസ് പെരുമ്പാമ്പിന്റെ പരമാവധി വിടവ് ഏകദേശം 8.6 ഇഞ്ച് ആണെന്ന് അനുമാനിക്കപ്പെടുന്നു. ഒരു മാനിനെ ഭക്ഷിച്ചതുള്‍പ്പെടെ അവയ്ക്ക് പരമാവധി 10.2 ഇഞ്ച് വിടര്‍ത്താനാകുമെന്ന് കണ്ടെത്തി.
