ഭഗൽപൂർ, : 2025-ലെ ബീഹാർ നിയമസഭാ തിരഞ്ഞെടുപ്പിനോടനുബന്ധിച്ച് പ്രധാനമന്ത്രി നരേന്ദ്ര മോദിയുടെ ഭഗൽപൂരിലെ ഹവായി അഡ്ഡ മൈതാനത്ത് നടന്ന റാലിയിൽ വിചിത്രവും എന്നാൽ രസകരവുമായ ഒരു സംഭവം അരങ്ങേറി. സംഭവം ക്യാമറയിൽ പതിയുകയും വീഡിയോ സമൂഹമാധ്യമങ്ങളിൽ വൈറലാവുകയും ചെയ്തിട്ടുണ്ട്. ആട് വലിക്കുന്ന വണ്ടിയിൽ ഒരാൾ മോദിയുടെ റാലിയിലേക്ക് എത്തുന്നതാണ് വീഡിയോയിൽ കാണുന്നത്.
ഗോപാൽപൂർ നിയമസഭാ മണ്ഡലത്തിൽ നിന്നുള്ള പ്രകാശ് മണ്ഡൽ എന്ന ചായ വിൽപ്പനക്കാരനാണ് ഈ വ്യക്തിയെന്ന് റിപ്പോർട്ടുകളുണ്ട്. താൻ പ്രധാനമന്ത്രി നരേന്ദ്ര മോദിയുടെ കടുത്ത ആരാധകനാണെന്നും, തനിക്ക് ഏറെ പ്രിയപ്പെട്ടവരായതുകൊണ്ട് ആടുകളെയും ഒപ്പം കൊണ്ടുവരാൻ ആഗ്രഹിച്ചെന്നും അദ്ദേഹം പറഞ്ഞു. “ഞാൻ മോദിജിയുടെ വലിയ ആരാധകനായത് പോലെ, എന്റെ ആടും ആരാധകനാണ്. മോദിജി ഇത് ഒന്നു കണ്ടാൽ എനിക്ക് അഭിമാനമാകും,” അദ്ദേഹം കൂട്ടിച്ചേർത്തു.
ആട് വലിക്കുന്ന വണ്ടിയിൽ സഞ്ചരിക്കുന്ന ഇയാളുടെ വീഡിയോ സമൂഹമാധ്യമങ്ങളിൽ വൈറലായി. ഈ അസാധാരണ കാഴ്ച, രാഷ്ട്രീയ പരിപാടിക്കായി തടിച്ചുകൂടിയ ആയിരക്കണക്കിന് അണികൾക്കിടയിൽ പെട്ടെന്ന് ശ്രദ്ധാകേന്ദ്രമായി.
ഇയാളുടെ ദൃശ്യങ്ങൾ മൊബൈൽ ഫോണുകളിൽ പകർത്തുന്ന ആളുകളെയും വീഡിയോയിൽ കാണാം. ആവേശം നിറഞ്ഞ അന്തരീക്ഷത്തിൽ ആളുകൾ “മോദി”, “മോദി” എന്ന് ആർത്തുവിളിക്കുകയും ആഹ്ലാദിക്കുകയും ചെയ്യുന്നുണ്ട്.
ഈ റാലിയിൽ വൻ ജനപങ്കാളിത്തമാണ് ഉണ്ടായത്. നിരവധി ആളുകളാണ് പ്രധാനമന്ത്രി മോദിയെ കേൾക്കാനായി എത്തിയത്. നവംബർ 11-ന് നടക്കാനിരിക്കുന്ന ബീഹാർ നിയമസഭാ തിരഞ്ഞെടുപ്പിന്റെ രണ്ടാം ഘട്ടത്തിന് മുന്നോടിയായി എൻഡിഎ പ്രവർത്തകർക്കും അണികൾക്കുമിടയിലെ പിന്തുണയും ആവേശവും ഈ വൻ ജനക്കൂട്ടം പ്രതിഫലിപ്പിക്കുന്നു. വോട്ടെണ്ണൽ നവംബർ 14-ന് നടക്കും.
