ന്യൂഡല്‍ഹി: ഐപിഎല്‍ 2025 ലേലത്തില്‍ 1.1 കോടി രൂപയ്ക്ക് രാജസ്ഥാന്‍ റോയല്‍സ് അടുത്തിടെ സൈന്‍ ചെയ്ത ഇന്ത്യയുടെ കൗമാര ക്രിക്കറ്റ് പ്രതിഭ വൈഭവ് സൂര്യവന്‍ഷി എല്ലായിടത്തും സംസാരമാണ്. പ്രത്യേകിച്ചും അണ്ടര്‍ 19 ഏഷ്യാകപ്പിലെ പ്രകടനം കൂടിയായപ്പോള്‍. താരത്തിന്റെ സിക്‌സര്‍ അടിക്കാനുള്ള കഴിവും അദ്ദേഹത്തിന്റെ പ്രായവും തമ്മില്‍ താരതമ്യപ്പെടുത്തി എല്ലാം തട്ടിപ്പാണെന്ന് പറയുന്നത് പാക് സൂപ്പര്‍താരങ്ങളാണ്.
അണ്ടര്‍ 19 ഏഷ്യാ കപ്പിലെ അസാധാരണ പ്രകടനത്തെത്തുടര്‍ന്ന് 13-കാരനായ വൈഭവിന്റെ പ്രായത്തിന്റെ ആധികാരികതയെ ചോദ്യം ചെയ്ത മുന്‍ പാകിസ്ഥാന്‍ ക്രിക്കറ്റ് താരം ജുനൈദ് ഖാനാണ് വിവാദത്തിന് തുടക്കമിട്ടത്. ടൂര്‍ണമെന്റിന്റെ സെമിയില്‍ ശ്രീലങ്കയ്ക്കെതിരെ വൈഭവ് 36 പന്തില്‍ 67 റണ്‍സ് നേടി. ഇതില്‍ അഞ്ച് ബൗണ്ടറികളും അഞ്ച് പടുകൂറ്റന്‍ സിക്സറുകളും ഉള്‍പ്പെട്ടിരുന്നു. അദ്ദേഹത്തിന്റെ സ്ഫോടനാത്മക ഇന്നിംഗ്സ് അദ്ദേഹത്തെ ടൂര്‍ണമെന്റിലെ ഇന്ത്യയുടെ സംയുക്ത ടോപ് സ്‌കോറര്‍ ആക്കുക മാത്രമല്ല, ഈ പ്രായത്തില്‍ ഒരു കളിക്കാരന് ഈ രീതിയില്‍ ഒരു പവര്‍-ഹിറ്റിംഗ് കഴിവ് പ്രകടിപ്പിക്കാന്‍ കഴിയുമോ എന്ന തരത്തിലുള്ള ഊഹാപോഹങ്ങള്‍ക്കും ചര്‍ച്ചകള്‍ക്കും ആക്കം കൂട്ടുകയും ചെയ്തു. പാക്കിസ്ഥാനെ 22 ടെസ്റ്റുകളിലും 76 ഏകദിനങ്ങളിലും 9 ടി20കളിലും പ്രതിനിധീകരിച്ചിട്ടുള്ള ജുനൈദ്, വൈഭവിന്റെ ഇന്നിംഗ്സിന്റെ ഒരു ക്ലിപ്പ് സോഷ്യല്‍ മീഡിയയില്‍ പോസ്റ്റ് ചെയ്തുകൊണ്ട് വിവാദം തൊടുത്തുവിട്ടത്.
”13 വയസ്സുള്ള ഒരു കുട്ടിക്ക് ശരിക്കും ഇത്രയും നീളമുള്ള സിക്സ് അടിക്കാന്‍ കഴിയുമോ?” എന്നായിരുന്നു ചോദ്യം. എന്നാല്‍ ഈ ചോദ്യം തങ്ങള്‍ പല സമയത്തും നേരിട്ടിട്ടുണ്ടെന്നാണ് മുമ്പ് വൈഭവിന്റെ പിതാവ് തന്നെ വ്യക്തമാക്കിയിട്ടുള്ളത്. വൈഭവിന്റെ മികച്ച പ്രകടനം ശ്രീലങ്കയ്ക്കെതിരെ ഏഴ് വിക്കറ്റിന്റെ സമഗ്ര വിജയം ഉറപ്പാക്കാന്‍ ഇന്ത്യയെ സഹായിച്ചു, അവര്‍ക്ക് അണ്ടര്‍ 19 ഏഷ്യാ കപ്പ് ഫൈനലില്‍ ഇടം നേടി. എന്നാല്‍, കിരീടപ്പോരാട്ടത്തില്‍ ബംഗ്ലാദേശിനോട് 59 റണ്‍സിന് തോറ്റ ഇന്ത്യ ഇടറി. ഫൈനലില്‍ ഒമ്പത് റണ്‍സായിരുന്നു വൈഭവിന്റെ സംഭാവന.
