ഒരു സംരംഭം കെട്ടിപ്പടുക്കുക എന്നാൽ നിക്ഷേപകരെ കണ്ടെത്തുക, ടീമുകളെ നയിക്കുക, പ്രയാസമേറിയ ബിസിനസ്സ് തീരുമാനങ്ങൾ എടുക്കുക എന്നിവയെല്ലാമാണ്. എന്നാൽ ചില സംരംഭകരെ സംബന്ധിച്ച്, സ്വന്തം ആരോഗ്യം മോശമാകുമ്പോഴും ബിസിനസ്സ് മുന്നോട്ട് കൊണ്ടുപോകേണ്ടതായി വരുന്നു. ക്യാഷ്‌കരോ (CashKaro), ഏൺകരോ (EarnKaro) എന്നിവയുടെ സഹസ്ഥാപകയായ സ്വാതി ഭാർഗവ തൻ്റെ ഔദ്യോഗിക എക്സ് (X) അക്കൗണ്ടിൽ പങ്കുവെച്ച വീഡിയോയിലൂടെ സംരംഭകത്വത്തിന്റെ ഇത്തരം ചില യാഥാർത്ഥ്യങ്ങൾ വെളിപ്പെടുത്തിയിരിക്കുകയാണ്. ഇൻവെസ്റ്റ്‌മെന്റ് ബാങ്കിംഗിലെ ഔദ്യോഗിക ജീവിതത്തിൽ നിന്ന് ഭർത്താവ് രോഹൻ ഭാർഗവയ്ക്കൊപ്പം ബിസിനസ്സ് ലോകത്തേക്ക് എത്തിയ തൻ്റെ യാത്രയെക്കുറിച്ചാണ് സ്വാതി ഇതിൽ സംസാരിക്കുന്നത്.
രോഹനുമായി ചേർന്ന് യുകെയിൽ ബിസിനസ്സ് ആരംഭിക്കുന്നതിന് മുൻപ് താൻ അഞ്ച് വർഷം ഗോൾഡ്മാൻ സാക്‌സിൽ (Goldman Sachs) ജോലി ചെയ്തിരുന്നതായി സ്വാതി പറഞ്ഞു. എന്നാൽ ഈ പ്രൊഫഷണൽ നേട്ടങ്ങൾക്കെല്ലാം പിന്നിൽ വലിയൊരു ആരോഗ്യപ്രശ്നവും അവർ നേരിടുന്നുണ്ടായിരുന്നു. തൻ്റെ വൃക്കയുടെ പ്രവർത്തനം വെറും 3-4 ശതമാനമായി കുറഞ്ഞപ്പോഴും താൻ ജോലി തുടർന്നുവെന്നും, ഒടുവിൽ വൃക്ക മാറ്റിവെക്കൽ ശസ്ത്രക്രിയയ്ക്ക് വിധേയയായെന്നും അവർ വെളിപ്പെടുത്തി.
സ്വാതിയുടെ കഥ പേടിഎം (Paytm) സ്ഥാപകൻ വിജയ് ശേഖർ ശർമ്മയുടെ ശ്രദ്ധ പിടിച്ചുപറ്റി. “തൻ്റെ വൃക്കയുടെ പ്രവർത്തനം വെറും 3-4 ശതമാനം മാത്രമായിരുന്നപ്പോഴും അവർ തൻ്റെ സ്റ്റാർട്ടപ്പിനായി ഫണ്ട് കണ്ടെത്താനുള്ള ശ്രമത്തിലായിരുന്നു,” സ്വാതിയെ അഭിവാദ്യം ചെയ്തുകൊണ്ട് ശർമ്മ എക്സിൽ കുറിച്ചു. ബിസിനസ്സ് കെട്ടിപ്പടുക്കുന്നതിനിടയിൽ ഉണ്ടാകുന്ന വ്യക്തിപരമായ വെല്ലുവിളികളുടെ ഓർമ്മപ്പെടുത്തലാണ് സ്വാതിയുടെ ഈ യാത്ര. സ്റ്റാർട്ടപ്പ് യാത്രകൾ പലപ്പോഴും ഫണ്ടിംഗ്, മൂല്യനിർണ്ണയം, വളർച്ചയുടെ കണക്കുകൾ എന്നിവയിലൂടെയാണ് പുറംലോകം അറിയാറുള്ളതെങ്കിലും, ഈ നേട്ടങ്ങൾക്ക് പിന്നിലെ ത്യാഗങ്ങളും അനിശ്ചിതത്വങ്ങളും പലപ്പോഴും ആരും കാണാതെ പോകുന്നു.
നേരത്തെ പങ്കുവെച്ച ഒരു സോഷ്യൽ മീഡിയ പോസ്റ്റിലും സ്വാതി തൻ്റെ ആരോഗ്യത്തെക്കുറിച്ച് സംസാരിച്ചിരുന്നു. ലണ്ടൻ സ്കൂൾ ഓഫ് ഇക്കണോമിക്‌സിലെ ആദ്യ വർഷ പഠനകാലത്താണ്, അതായത് ഏകദേശം 20 വർഷം മുൻപ്, തനിക്ക് വൃക്കരോഗം സ്ഥിരീകരിച്ചതെന്ന് അവർ വെളിപ്പെടുത്തിയിരുന്നു. എന്നാൽ ഇതുകാരണം തൻ്റെ പഠനമോ കരിയറോ ഉപേക്ഷിക്കാൻ അവർ തയ്യാറായില്ല. തുടർന്ന് ലണ്ടനിലെ ഗോൾഡ്മാൻ സാക്‌സിൽ ജോലി ചെയ്യുകയും പിന്നീട് ഭർത്താവിനൊപ്പം ബിസിനസ്സ് ആരംഭിക്കുകയുമായിരുന്നു.
വൃക്കയുടെ പ്രവർത്തനം 10 ശതമാനത്തിൽ താഴെയായിരുന്ന സമയത്തും താൻ മുഴുവൻ സമയവും ജോലി ചെയ്തിരുന്നുവെന്ന് സ്വാതി പറഞ്ഞു. വൃക്ക മാറ്റിവെക്കൽ ശസ്ത്രക്രിയയ്ക്ക് തൊട്ടുമുൻപാണ് 130 കോടി രൂപയുടെ സീരീസ് സി (Series C) ഫണ്ടിംഗ് റൗണ്ട് പൂർത്തിയാക്കിയതെന്നും അവർ വ്യക്തമാക്കി. സ്വാതിയുടെ അമ്മയാണ് അവർക്ക് വൃക്ക ദാനം ചെയ്തത്. വൃക്ക മാറ്റിവെക്കൽ തൻ്റെ ജീവിതത്തെ മാറ്റിയ അനുഭവമായിരുന്നുവെന്ന് വിശേഷിപ്പിച്ച സ്വാതി തൻ്റെ കുടുംബത്തിനും ടീമിനും പിന്തുണച്ചവർക്കും നന്ദി അറിയിക്കുകയും ചെയ്തു.
