യുകെയിലെ നിരത്തുകളിലൂടെ ഓടുന്ന ഇന്ത്യൻ ഓട്ടോറിക്ഷയുടെ വീഡിയോ സോഷ്യൽ മീഡിയയിൽ തരംഗമാകുന്നു. പ്രമുഖ വ്യവസായി ആനന്ദ് മഹീന്ദ്ര എക്‌സിൽ (X) പങ്കുവെച്ച വീഡിയോയാണ് ആളുകളിൽ വലിയ കൗതുകവും തമാശയും ഉണർത്തുന്നത്. ‘ബ്രിട്ടനെ തിരികെ കോളനിവൽക്കരിക്കുന്നു’ എന്ന തരത്തിലുള്ള രസകരമായ കമന്റുകളാണ് വീഡിയോയ്ക്ക് താഴെ നിറയുന്നത്.
ഇന്ത്യയിലെ ജനത്തിരക്കേറിയ തെരുവുകളിൽ ദിനംപ്രതി കാണാറുള്ള ഓട്ടോറിക്ഷകൾ യുകെയിലെ റോഡുകളിൽ വളരെ അപൂർവ്വമായ കാഴ്ചയാണ്. “യുകെയിൽ ഓട്ടോറിക്ഷ എത്തിയിരിക്കുന്നു… ഇത് മഹീന്ദ്രയുടേതാണ്, നമ്മുടേതാണ്” എന്ന ഗുജറാത്തി കുറിപ്പോടെയാണ് ആനന്ദ് മഹീന്ദ്ര വീഡിയോ പങ്കുവെച്ചത്. സാധാരണ നമ്മൾ കാണാറുള്ളതിൽ നിന്ന് തികച്ചും വ്യത്യസ്തമായ യുകെയിലെ പരിസരങ്ങളിലൂടെ ഈ മൂന്നുചക്ര വാഹനം ഓടിപ്പോകുന്നതാണ് വീഡിയോയിലുള്ളത്.
വീഡിയോ വൈറലായതോടെ നിരവധി രസകരമായ കമന്റുകളാണ് ആളുകൾ പങ്കുവെക്കുന്നത്. “200 വർഷങ്ങൾക്ക് ശേഷം ബ്രിട്ടീഷുകാർ തിരികെ കോളനിവൽക്കരണത്തിന്റെ രുചി അറിയുകയാണ്, ഇനി ലണ്ടനിലെ മഴയത്തും ഓട്ടോ ഡ്രൈവർമാർ അങ്ങോട്ട് വരാൻ പറ്റില്ലെന്ന് പറഞ്ഞ് ആളുകളെ മടക്കും” എന്നായിരുന്നു ഒരാളുടെ കമന്റ്. “അടുത്ത തവണ ലണ്ടനിൽ പോകുമ്പോൾ സ്വന്തം ഓട്ടോറിക്ഷയിൽ തന്നെ ഒരു റൗണ്ട് അടിക്കണം” എന്ന് മറ്റൊരാൾ ആനന്ദ് മഹീന്ദ്രയോട് നിർദ്ദേശിച്ചു. കഴിഞ്ഞ ആഴ്ച സ്കോട്ട്‌ലൻഡിൽ മഹീന്ദ്ര വാഹനം കണ്ടപ്പോൾ വലിയ സന്തോഷം തോന്നിയെന്നും ഇന്ത്യൻ ബ്രാൻഡുകൾ ആഗോളതലത്തിലേക്ക് വളരുന്നത് അഭിമാനകരമാണെന്നും ചിലർ കുറിച്ചു. ഇന്ത്യൻ ഓട്ടോ ഡ്രൈവർമാരുടെ വശങ്ങളിലേക്ക് തിരിയാൻ കാൽ പുറത്തേക്ക് നീട്ടുന്ന ശീലത്തെക്കുറിച്ചും സൂചന നൽകുന്ന ദിശയിലേക്ക് തന്നെ വണ്ടി തിരിക്കാൻ പഠിപ്പിക്കണമെന്നുമുള്ള തമാശകളും കമന്റ് ബോക്സിൽ നിരന്നു.
