മഡ്ഡി പാഡി ഫീൽഡ് അഥവാ ചെളിനിറഞ്ഞ നെൽവയലുകൾ ഒരു ഫാഷൻ ഷൂട്ടിന് പറ്റിയ ഇടമായി സാധാരണ ആരും കരുതാനിടയില്ല. എന്നാൽ നിശാന്ത് കെർക്കട്ട എന്ന യുവാവ് ആ ചിന്താഗതി മാറ്റിയെഴുതുകയാണ്. ഒരു കർഷകനായുള്ള തന്റെ ജീവിതവും മെൻസ് വെയറിലെ വേറിട്ട കാഴ്ചപ്പാടും സമന്വയിപ്പിച്ച് ഇൻസ്റ്റാഗ്രാം റീലുകളിലൂടെയാണ് അദ്ദേഹം ഇത് സാധ്യമാക്കുന്നത്. നഗ്നപാദനായി വയലിൽ പണിയെടുക്കുന്നതിൽ നിന്ന് ഓവർസൈസ്ഡ് വസ്ത്രങ്ങളണിഞ്ഞുള്ള ഗാംഭീര്യമുള്ള പോസുകളിലേക്കുള്ള അദ്ദേഹത്തിന്റെ മാറ്റം, തികച്ചും അപ്രതീക്ഷിതമായൊരു കാരണത്താലാണ് ഇന്റർനെറ്റിന്റെ ശ്രദ്ധ കവർന്നത് — അതവന്റെ സ്റ്റൈൽ ഒന്നുകൊണ്ട് മാത്രമാണ്.
‘ഇന്ത്യൻ ഫാർമർ സ്റ്റാർട്ടിങ് ഫാഷൻ’ എന്ന് പേരിട്ടിരിക്കുന്ന അദ്ദേഹത്തിന്റെ പുതിയൊരു റീൽ തുടങ്ങുന്നത് ഗ്രാമീണ ജാർഖണ്ഡിലെ മേഘാവൃതമായ ആകാശത്തിന് കീഴിലാണ്. വിത്ത് വിതറാൻ ഉപയോഗിക്കുന്ന കൊട്ടയും പേറി, ഷർട്ടില്ലാതെ ഒരു ഗ്രേ ഷോർട്സ് മാത്രം ധരിച്ച്, നഗ്നപാദനായി അദ്ദേഹം ചെളിനിറഞ്ഞ നെൽവയലിലൂടെ നടന്നു നീങ്ങുന്നു. അദ്ദേഹത്തിന്റെ ഫിറ്റ്നസ്സിലേക്ക് ശ്രദ്ധ ക്ഷണിക്കുന്നതിനൊപ്പം തന്നെ, തികഞ്ഞ ആത്മവിശ്വാസമാണ് ആ വീഡിയോയ്ക്ക് ഒരു പ്രൊഫഷണൽ ഫാഷൻ ഫിലിമിന്റെ ഭംഗി നൽകുന്നത്. വയലിൽ പണിയെടുക്കുന്നതിനിടയിൽ ക്യാമറയിലേക്ക് നോക്കുന്ന അദ്ദേഹം, അടുത്ത് വന്ന് ചെറിയൊരു തംബ്‌സ് അപ്പ് നൽകുന്നുമുണ്ട്.
“ഗ്രാമത്തിലെ ചെറുപ്പക്കാർക്ക് നന്നായി വസ്ത്രം ധരിക്കാനറിയില്ല” എന്ന പൊതുബോധത്തെ വെല്ലുവിളിക്കുന്നതാണ് മറ്റൊരു റീൽ. “ഗാവ് കേ ലഡ്കേ കാന്റ് ഡ്രസ്സ് വെൽ” എന്ന വാചകത്തോടെ ആരംഭിക്കുന്ന വീഡിയോ പിന്നീട് കെർക്കട്ടയുടെ സ്റ്റൈലിഷ് വേഷവിധാനത്തിലേക്ക് മാറുന്നു. വെളുത്ത ഷർട്ട്, ലൈറ്റ് ബ്ലൂ ഡെനിം, പ്രിന്റഡ് ടൈ, ബൂട്ട്സ്, നീളമുള്ള കോട്ട് എന്നിവയാണ് ഇതിൽ ധരിച്ചിരിക്കുന്നത്. ഗോൾഡ് വാച്ചും കൂളിങ് ഗ്ലാസും കൂടി ചേരുന്നതോടെ ആ ലുക്ക് പൂർണ്ണമാകുന്നു.
കർഷകനായി ജോലി ചെയ്യുന്നതിനൊപ്പം ഇൻസ്റ്റാഗ്രാമിൽ ഫാഷൻ കണ്ടന്റുകൾ സൃഷ്ടിക്കുന്ന, ജാർഖണ്ഡിൽ നിന്നുള്ള ഒരു ഫാഷൻ-ഫിറ്റ്നസ് പ്രേമിയാണ് നിശാന്ത് കെർക്കട്ട. അദ്ദേഹത്തിന്റെ വീടും ഗ്രാമാന്തരീക്ഷവുമാണ് വീഡിയോകൾക്ക് പശ്ചാത്തലമാകുന്നത് എന്നതിനാൽ തന്നെ മറ്റ് പ്രൊഫഷണൽ ഫാഷൻ പേജുകളിൽ നിന്ന് ഇത് വേറിട്ടുനിൽക്കുന്നു. മൺ വീടുകൾ, മുറ്റം, വലിയ മരങ്ങൾ, പുഴയോരങ്ങൾ, ഹൈവേകൾ എന്നിവയാണ് അദ്ദേഹത്തിന്റെ പശ്ചാത്തലങ്ങൾ. ഇത്തരം പരിചിതമായ ഗ്രാമീണ കാഴ്ചകൾക്ക് മുന്നിൽ നിന്ന്, പുതിയകാല മെൻസ് വെയറുകൾ പരീക്ഷിച്ച് ഒരു മോഡലിന്റെ കൃത്യതയോടെയാണ് അദ്ദേഹം പോസ് ചെയ്യുന്നത്.
വെളുപ്പ്, കറുപ്പ്, ചാരനിറം, ഫേഡഡ് ഡെനിം തുടങ്ങിയ ശാന്തമായ നിറങ്ങളാണ് വസ്ത്രങ്ങളിൽ കൂടുതൽ ഉപയോഗിക്കുന്നത്. ചിലപ്പോഴൊക്കെ ചുവപ്പും പിങ്കും നിറങ്ങളിലുള്ള വസ്ത്രങ്ങളും കാണാം. അയഞ്ഞ വസ്ത്രധാരണ രീതിയും വീതിയേറിയ ട്രൗസറുകളും നീളൻ കോട്ടുകളും അയഞ്ഞ ഷർട്ടുകളും അദ്ദേഹത്തിന് പ്രിയപ്പെട്ടതാണ്. പോക്കറ്റിൽ കൈകൾ ഇട്ടുള്ള നിൽപ്പ്, ഫുൾ ബോഡി ഫ്രെയിമുകൾ, സൈഡ് പ്രൊഫൈലുകൾ, പിന്നിൽ നിന്നുള്ള ഷോട്ടുകൾ എന്നിവയാണ് വീഡിയോകളുടെ പ്രധാന പ്രത്യേകത.
കൃഷിയും ഫാഷനും തമ്മിലുള്ള ഈ വേറിട്ട പരീക്ഷണം ബോളിവുഡ് താരങ്ങളുടെയും ശ്രദ്ധ പിടിച്ചുപറ്റിയിട്ടുണ്ട്. ഒക്ടോബർ 5-ന് പങ്കുവെച്ച വീഡിയോയിൽ “ക്യാ ബാത്ത് ഹൈ” (ഗംഭീരം) എന്ന് ഭൂമി പെഡ്നേക്കർ കുറിച്ചപ്പോൾ, “സ്റ്റൈൽ ഇഷ്ടപ്പെട്ടു” എന്ന് ഷിബാനി ദണ്ഡേക്കറും “സ്റ്റൈൽ ചെക്ക്” എന്ന് അനുഷ ദണ്ഡേക്കറും കമന്റ് ചെയ്തു. സോഷ്യൽ മീഡിയ ഉപയോക്താക്കളും വലിയ പിന്തുണയാണ് നൽകുന്നത്. ഇൻസ്റ്റാഗ്രാമിൽ റീലുകൾ തരംഗമായതോടെ പലരും അദ്ദേഹത്തെ ‘ഓറ ഫാർമർ’ എന്നാണ് വിശേഷിപ്പിക്കുന്നത്.
