നടി നയൻതാര തിരുപ്പതി ക്ഷേത്രദർശനത്തിനിടെ തലമൊട്ടയടിച്ചെന്ന രീതിയിൽ സമൂഹമാധ്യമങ്ങളിൽ പ്രചരിക്കുന്ന ചിത്രങ്ങൾ വ്യാജമാണെന്ന് തെളിഞ്ഞു. യഷ് നായകനാകുന്ന ‘ടോക്സിക്’ എന്ന പുതിയ സിനിമയുടെ റിലീസിന് മുന്നോടിയായി താരം മൊട്ടയടിച്ചുവെന്ന വാദത്തോടെയാണ് എക്സ് അടക്കമുള്ള പ്ലാറ്റ്‌ഫോമുകളിൽ ഈ ചിത്രങ്ങൾ പ്രചരിച്ചത്. എന്നാൽ ഇവ ആർട്ടിഫിഷ്യൽ ഇന്റലിജൻസ് (എഐ) സാങ്കേതികവിദ്യ ഉപയോഗിച്ച് കൃത്രിമമായി നിർമിച്ചതാണെന്ന് പരിശോധനയിൽ വ്യക്തമായിട്ടുണ്ട്.
കഴിഞ്ഞ ഏപ്രിലിൽ ഭർത്താവും സംവിധായകനുമായ വിഘ്നേഷ് ശിവനൊപ്പം നയൻതാര തിരുപ്പതിയിൽ ദർശനം നടത്തിയപ്പോഴുള്ള യഥാർത്ഥ ചിത്രങ്ങളാണ് എഐ വഴി തിരുത്തിയത്. അന്നത്തെ ദർശനത്തിൽ താരം മൊട്ടയടിച്ചിരുന്നില്ല. യഥാർത്ഥ ചിത്രത്തിലെ അതേ വസ്ത്രധാരണവും കമ്മലുകളും അതേപടി നിലനിർത്തി തല ഭാഗം മാത്രം എഐ ഉപയോഗിച്ച് മൊട്ടയടിച്ച രീതിയിലേക്ക് മാറ്റി സൃഷ്ടിക്കുകയായിരുന്നു.
ഗീതു മോഹൻദാസ് സംവിധാനം ചെയ്യുന്ന ‘ടോക്സിക്’ ആണ് നയൻതാരയുടേതായി ഉടൻ തിയറ്ററുകളിലെത്തുന്ന പ്രധാന ചിത്രം. യഷ് നായകനാകുന്ന ഈ ചിത്രത്തിൽ കിയാര അദ്വാനി, താര സുതാര്യ, രുക്മിണി വസന്ത്, ഹുമ ഖുറേഷി എന്നിവരും പ്രധാന വേഷങ്ങളിലുണ്ട്. ഓഗസ്റ്റ് 26-നാണ് ചിത്രം റിലീസ് ചെയ്യുന്നത്. ഇതുകൂടാതെ വംശി പൈഡിപ്പള്ളി സംവിധാനം ചെയ്യുന്ന പുതിയ ചിത്രത്തിൽ (SVC63) സൽമാൻ ഖാന്റെ നായികയായും നയൻതാര എത്തുന്നുണ്ട്. സൽമാൻ ഖാനും നയൻതാരയും ആദ്യമായി ഒന്നിക്കുന്ന ചിത്രം കൂടിയാണിത്.
