പീറ്റർ പാർക്കറും എം.ജെ.യും തമ്മിൽ ഒന്നിച്ചൊരു സന്തോഷ ജീവിതം കെട്ടിപ്പടുത്തിരുന്നെങ്കിലോ? വൈറലായ ഒരു എ.ഐ. വീഡിയോയിലൂടെ ടോം ഹോളണ്ടിന്റെയും സെൻഡയയുടെയും ഐക്കണിക് മാർവൽ ജോഡികൾക്ക് മനോഹരമായ ഒരു തെക്കേ ഇന്ത്യൻ വിവാഹം ഒരുക്കിയിരിക്കുകയാണ് ആരാധകർ. പരമ്പരാഗത ചടങ്ങുകളും മുല്ലപ്പൂമാലകളും വാഴയിലയിലെ സദ്യയുമെല്ലാം ഉൾപ്പെടുത്തിയാണ് ഈ വീഡിയോ നിർമ്മിച്ചിരിക്കുന്നത്.
ന്യൂയോർക്ക് നഗരത്തിന് പകരം വർണ്ണാഭമായ തെക്കേ ഇന്ത്യൻ വിവാഹവേദിയിലാണ് പീറ്ററും എം.ജെ.യും ഈ എ.ഐ. വീഡിയോയിൽ പ്രത്യക്ഷപ്പെടുന്നത്. പരമ്പരാഗത വസ്ത്രങ്ങളണിഞ്ഞ ഇവർക്കൊപ്പം പൂക്കളാൽ അലങ്കരിച്ച മണ്ഡപവും ക്ഷേത്ര മാതൃകയിലുള്ള അലങ്കാരങ്ങളും കാണാം. ഒപ്പം ടോബി മക്വയർ, ആൻഡ്രൂ ഗാർഫീൽഡ് എന്നീ മുൻ സപൈഡർമാൻ താരങ്ങളും ചടങ്ങുകളിൽ പങ്കെടുക്കാനെത്തുന്നുണ്ട്. എം.ജെ.യുടെ വിവിധ മൾട്ടിവേഴ്സ് പതിപ്പുകളും കല്യാണത്തിരക്കുകളിൽ സഹായികളായി എത്തുന്നുണ്ട്.
സ്പൈഡർമാൻ കഥാപാത്രങ്ങൾക്ക് പുറമെ അയൺമാൻ, ക്യാപ്റ്റൻ അമേരിക്ക, ഡോക്ടർ സ്ട്രേഞ്ച് തുടങ്ങിയ പ്രമുഖ മാർവൽ സൂപ്പർഹീറോകളും വിവാഹത്തിൽ അതിഥികളായി പങ്കെടുക്കുന്നുണ്ട്. ഇതിൽ ഏറ്റവും രസകരമായ കാര്യം സദ്യയ്ക്ക് അതിഥികൾക്ക് സാമ്പാർ വിളമ്പുന്ന വൂൾവറിനും (ലോഗൻ), പീറ്ററിന്റെ കല്യാണം കണ്ട് സങ്കടത്തോടെ നിൽക്കുന്ന ജീൻ ഗ്രേയുമാണ്.
‘സ്പൈഡർമാൻ: നോ വേ ഹോം’ എന്ന ചിത്രത്തിൽ ലോകത്തെ രക്ഷിക്കാനായി പീറ്റർ പാർക്കർ എല്ലാവരുടെയും ഓർമ്മകളിൽ നിന്ന് മാഞ്ഞുപോകാൻ തീരുമാനിക്കുന്നതോടെയാണ് എം.ജെ.യുമായുള്ള പ്രണയം അവസാനിക്കുന്നത്. എന്നാൽ ഈ എ.ഐ. വീഡിയോ ആ പഴയ സങ്കടത്തിന് പകരം പീറ്ററിനും എം.ജെ.ക്കും മനോഹരമായ ഒരു ശുഭപര്യവസാനം നൽകുകയാണ് ചെയ്യുന്നത്. ഇന്ത്യയിലെ പരമ്പരാഗത വിവാഹ രീതികളും സൂപ്പർഹീറോ കഥാപാത്രങ്ങളും ഒന്നിച്ചെത്തിയ ഈ വീഡിയോ ഇപ്പോൾ സോഷ്യൽ മീഡിയയിൽ തരംഗമായി മാറിക്കഴിഞ്ഞു.
