ആർട്ടിഫിഷ്യൽ ഇന്റലിജൻസ് (എഐ) എന്ന് പറയുമ്പോൾ നിലവിലുള്ള എഐ സാങ്കേതികവിദ്യകളെയാണ് ഉദ്ദേശിക്കുന്നതെങ്കിൽ, അവയ്ക്ക് ചെയ്യാൻ കഴിയാത്തതായി ഒരൊറ്റ കാര്യം മാത്രമില്ല. എന്നാൽ എഐയ്ക്ക് ഒരിക്കലും ഇല്ലാത്ത ഒരു അടിസ്ഥാന കാര്യമുണ്ട്- അത് സ്വന്തമായ ജീവിതാനുഭവങ്ങളാണ്. എഐയ്ക്ക് ചെയ്യാൻ കഴിയാത്ത ഏറ്റവും പ്രധാനപ്പെട്ട കാര്യം ജീവിതം അനുഭവിച്ചറിയുക എന്നതാണ്. പ്രണയം, സന്തോഷം, ദുഃഖം, ഭയം, ആവേശം തുടങ്ങിയ വികാരങ്ങളെക്കുറിച്ചുള്ള വിവരങ്ങൾ വിശകലനം ചെയ്യാൻ എഐയ്ക്ക് സാധിക്കുമെങ്കിലും, അവയൊന്നും യഥാർത്ഥത്തിൽ അനുഭവിക്കാൻ അതിന് കഴിയില്ല.
ഒരു പ്രിയപ്പെട്ടയാളെ നഷ്ടപ്പെടുന്നതിന്റെ വേദനയെക്കുറിച്ചോ അല്ലെങ്കിൽ ഒരു സ്വപ്നം യാഥാർത്ഥ്യമാകുന്നതിന്റെ സന്തോഷത്തെക്കുറിച്ചോ എഐയ്ക്ക് വിവരിക്കാൻ കഴിഞ്ഞേക്കാം, പക്ഷേ അതിന് ഇതൊന്നും അനുഭവിച്ചറിവില്ല. അതിന്റെ അറിവ് ഡാറ്റയിലെ പാറ്റേണുകളിൽ നിന്ന് ഉണ്ടാകുന്നതാണ്, അല്ലാതെ വ്യക്തിപരമായ അനുഭവങ്ങളിൽ നിന്നല്ല. മികച്ച കലാരൂപങ്ങളും സാഹിത്യവും സൃഷ്ടിക്കാൻ ഇതിന് സാധിക്കുമെങ്കിലും, നിലവിലുള്ള വിവരങ്ങൾ വിശകലനം ചെയ്തും കൂട്ടിച്ചേർത്തുമാണ് അത് ചെയ്യുന്നത്. മനസ്സിൽ പ്രചോദനമോ ആഗ്രഹമോ തോന്നിയിട്ടല്ല എഐ ഒന്നും സൃഷ്ടിക്കുന്നത്.
ദുഃഖം, പ്രണയം, വിശപ്പ്, സൗഹൃദം, പ്രസവം, വഞ്ചന അല്ലെങ്കിൽ സന്തോഷം എന്നിവയെക്കുറിച്ചുള്ള ദശലക്ഷക്കണക്കിന് വിവരണങ്ങൾ വിശകലനം ചെയ്യാനും അവയെക്കുറിച്ച് ഹൃദയസ്പർശിയായി എഴുതാനും എഐയ്ക്ക് കഴിയും. എന്നാൽ അത് ഒരിക്കലും ഒരു ആശുപത്രി കിടക്കയ്ക്ക് അരികിൽ ഇരുന്നിട്ടില്ല, അസ്തമയം ആസ്വദിച്ചിട്ടില്ല, മാതാപിതാക്കളെ നഷ്ടപ്പെട്ടിട്ടില്ല, പ്രണയത്തിലായിട്ടില്ല, അല്ലെങ്കിൽ ഭയം അറിഞ്ഞിട്ടില്ല. എഐ ഈ കാര്യങ്ങളെയെല്ലാം അറിയുന്നത് ഡാറ്റയിലൂടെ മാത്രമാണ്, അനുഭവങ്ങളിലൂടെയല്ല.
ഇത് പല പരിമിതികളിലേക്കും നയിക്കുന്നു: അതിന് കാര്യങ്ങൾ മനസ്സിലാക്കുന്നത് പോലെ അനുകരിക്കാൻ കഴിയും, എന്നാൽ സ്വന്തമായി ബോധമുണ്ടാകില്ല. കൃത്യമായ ഉത്തരങ്ങൾ പ്രവചിക്കാൻ കഴിഞ്ഞേക്കാം, എങ്കിലും മനുഷ്യരെപ്പോലെ കാര്യങ്ങൾ യഥാർത്ഥത്തിൽ അറിയാൻ അതിന് കഴിയില്ല. ആശയങ്ങൾ ഉണ്ടാക്കാൻ സാധിക്കുമെങ്കിലും, അതിൽ അതിന് വ്യക്തിപരമായ താല്പര്യങ്ങളുണ്ടാകില്ല. വികാരങ്ങൾ അനുകരിക്കാൻ കഴിയും, പക്ഷേ അവ അനുഭവിക്കാൻ കഴിയില്ല. തീരുമാനങ്ങൾ എടുക്കാൻ സഹായിക്കുമെങ്കിലും, അതിന്റെ അനന്തരഫലങ്ങളുടെ ഉത്തരവാദിത്തം ഏറ്റെടുക്കാൻ എഐയ്ക്ക് കഴിയില്ല.
കൗതുകകരമായ കാര്യം എന്തെന്നാൽ, ചെസ്സ് കളിക്കുക, സംഗീതം ചിട്ടപ്പെടുത്തുക, ചിത്രം വരയ്ക്കുക, കഥകൾ എഴുതുക, രോഗനിർണ്ണയം നടത്തുക എന്നിങ്ങനെ മനുഷ്യന് മാത്രം ചെയ്യാൻ കഴിയുമെന്ന് കരുതിയിരുന്ന പല കാര്യങ്ങളും ഇന്ന് എഐ വളരെ മികച്ച രീതിയിൽ ചെയ്യുന്നുണ്ട്. മനുഷ്യനെ എഐയിൽ നിന്ന് വ്യത്യസ്തനാക്കുന്നത് കേവലം സർഗ്ഗാത്മകതയോ ബുദ്ധിയോ മാത്രമല്ല, മറിച്ച് ലോകത്തെ അനുഭവിച്ചറിയാനും ആ അനുഭവങ്ങൾക്ക് വ്യക്തിപരമായ അർത്ഥം നൽകാനുമുള്ള കഴിവാണ്.
എഴുത്തുകാരനും തത്ത്വചിന്തകനുമായ അലൻ വാട്ട്സ് ഒരിക്കൽ പറഞ്ഞതുപോലെ, മെനു കാർഡ് എന്നത് ഒരിക്കലും ഒരു ഭരണമല്ല. ലോകത്ത് ഇതുവരെ എഴുതപ്പെട്ടിട്ടുള്ള എല്ലാ മെനു കാർഡുകളും വായിക്കാനും, ഓരോ രുചിയെയും കുറിച്ച് വളരെ വിശദമായി വിവരിക്കാനും, പുതിയ പാചകക്കുറിപ്പുകൾ കണ്ടുപിടിക്കാനും എഐയ്ക്ക് കഴിഞ്ഞേക്കും. എന്നാൽ അതിന് ഒരിക്കലും ഭക്ഷണത്തിന്റെ യഥാർത്ഥ രുചി അറിയാൻ കഴിയില്ല.
