‘‘ഒരു വർഷം മുമ്പ് നിങ്ങൾ എന്നെ കണ്ടിരുന്നെങ്കിൽ, ഞാൻ സ്വയം മദ്യം ഉപേക്ഷിക്കുമെന്ന് ഒരിക്കലും വിശ്വസിക്കുമായിരുന്നില്ല. ജോലി കഴിഞ്ഞ് കുടിക്കുന്ന കോസ്മോപൊളിറ്റൻ കോക്ടെയിലുകൾ, ആഡംബര റെസ്റ്റോറന്റുകളിലെ മാർട്ടിനി, ജന്മദിനങ്ങളിലെ ടെക്വില ഷോട്ടുകൾ, യാത്രകളിലെ വൈനും ബിയറും ഒക്കെ എനിക്ക് അത്രയേറെ പ്രിയപ്പെട്ടതായിരുന്നു. ഏതെങ്കിലും ആഘോഷമോ അവധിക്കാലമോ വാരാന്ത്യങ്ങളോ വന്നാൽ എന്റെ കൈയിൽ എപ്പോഴും ഒരു ഗ്ലാസ് മദ്യമുണ്ടാകുമായിരുന്നു.
എന്നാൽ, മദ്യപാനം കാരണം എന്റെ ജീവിതം തകരുകയോ, ഞാൻ വലിയ തകർച്ചകൾ നേരിടുകയോ ചെയ്തത് കൊണ്ടല്ല ഞാൻ ഇത് നിർത്തിയത്. ‘സോബർ ക്യൂരിയോസിറ്റി’ (മദ്യപാനം ബോധപൂർവ്വം ഒഴിവാക്കുന്ന ശീലം) പരീക്ഷിക്കുന്ന ആളുകൾക്ക് എന്താണ് പറയാനുള്ളതെന്ന് അറിയാനുള്ള ഒരു കൗതുകം മാത്രമായിരുന്നു എനിക്ക്. മദ്യം ശരിക്കും എനിക്ക് അത്രയേറെ ആവശ്യമാണോ എന്ന് അറിയണമായിരുന്നു. അതുകൊണ്ട് ഈ വർഷം പുതുവർഷ തീരുമാനമായി ഞാൻ മദ്യം പൂർണ്ണമായും ഉപേക്ഷിക്കുകയാണെന്ന് പറഞ്ഞപ്പോൾ ആരും എന്നെ വിശ്വസിച്ചില്ല. സത്യം പറഞ്ഞാൽ എനിക്ക് പോലും എന്നിൽ പൂർണ്ണ വിശ്വാസമുണ്ടായിരുന്നില്ല. പക്ഷേ, ആറ് മാസങ്ങൾക്കിപ്പുറവും ഞാൻ മദ്യമില്ലാതെ ജീവിക്കുന്നു. ഒരു തമാശയ്ക്ക് എടുത്ത ആ തീരുമാനം എന്റെ ജീവിതത്തെ തന്നെ മാറ്റിമറിച്ചു.
കഴിഞ്ഞ ജനുവരി ഒന്നിന് ഞാനും എന്റെ ഒരു കൂട്ടുകാരനും ചേർന്നാണ് ഈ വർഷം മുഴുവൻ മദ്യം തൊടില്ലെന്ന് തീരുമാനിച്ചത്. ഫെബ്രുവരിയാകുമ്പോഴേക്കും പരാജയപ്പെടുന്ന സാധാരണ പുതുവർഷ തീരുമാനങ്ങൾ പോലെ ഇതും അവസാനിക്കുമെന്നാണ് കരുതിയത്. എന്നാൽ ആറ് മാസം കഴിഞ്ഞിട്ടും ഞങ്ങൾ രണ്ടുപേരും ആ തീരുമാനത്തിൽ ഉറച്ചുനിൽക്കുന്നു. ഓഫീസ് പാർട്ടികൾ, വിവാഹങ്ങൾ, യാത്രകൾ എന്നിവയ്ക്കിടയിലും സുഹൃത്തുക്കളുടെ സ്നേഹപൂർവ്വമായ നിർബന്ധങ്ങൾക്കിടയിലും ഞാൻ ഒരു കാര്യം മനസ്സിലാക്കി; മദ്യം ഉപേക്ഷിക്കുന്നതിനേക്കാൾ പാട് ഞാൻ തീരുമാനത്തില് ഉറച്ചു നില്ക്കുന്നവളാണെന്ന് മറ്റുള്ളവരെ ബോധ്യപ്പെടുത്താനായിരുന്നു.
ആദ്യം ഇതൊരു ചെറിയ പരീക്ഷണമായിരുന്നെങ്കിൽ, ഫെബ്രുവരിയായപ്പോഴേക്കും ഞാൻ എപ്പോഴാണ് വീണ്ടും കുടിക്കാൻ തുടങ്ങുക എന്ന് ആളുകൾ ചോദിച്ചു തുടങ്ങി. ഏപ്രിൽ മാസമായപ്പോഴേക്കും “ഒരു ചെറിയ ഡ്രിങ്ക് മാത്രം കഴിക്കൂ” എന്ന് പറഞ്ഞ് അവർ എന്നെ സ്വാധീനിക്കാൻ നോക്കി. ജൂൺ ആയപ്പോഴാണ് ഞാൻ തമാശ പറയുകയല്ലെന്ന് അവർക്ക് മനസ്സിലായത്. ഈ ആറ് മാസത്തിനിടയിൽ “ഒരേയൊരു ഡ്രിങ്ക്” എന്ന് എത്രപേർ എന്നോട് പറഞ്ഞിട്ടുണ്ടെന്ന് എനിക്ക് ഒരൂഹവുമില്ല. മദ്യം ഒഴിവാക്കുന്നതിനേക്കാൾ ക്ഷീണമുണ്ടാക്കിയത് അതിനെക്കുറിച്ചുള്ള ചോദ്യങ്ങൾക്ക് മറുപടി നൽകുന്നതായിരുന്നു. ഒരു വീട്ടിലെ പാർട്ടിയിൽ വെച്ച് ഞാൻ മദ്യം നിരസിച്ചപ്പോൾ, എന്റെ ഒരു അടുത്ത കൂട്ടുകാരി പറഞ്ഞത് തീരുമാനങ്ങൾ ഒക്കെ ലംഘിക്കാനുള്ളതാണെന്നാണ്. അവളുടെ അമ്മയും അത് ശരിവെച്ചു. മദ്യം കഴിക്കാതിരിക്കുന്നത് ഇത്ര വലിയൊരു വിവാദ തീരുമാനമാണെന്ന് ഞാൻ കരുതിയിരുന്നില്ല. ഞാൻ എത്രത്തോളം നിരസിച്ചോ, അത്രത്തോളം എന്റെ മനസ്സ് മാറ്റാൻ അവർ ശ്രമിച്ചുകൊണ്ടിരുന്നു.
ഞാൻ ഒരുപാട് കുടിക്കുന്ന ഒരാളായിരുന്നില്ല, പകരം നല്ല കോക്ടെയിലുകളും വൈനും ആസ്വദിച്ചു കുടിച്ചിരുന്ന ആളായിരുന്നു. അതുകൊണ്ട് തന്നെ ഞാൻ മദ്യം നിർത്തിയത് എല്ലാവരെയും അത്ഭുതപ്പെടുത്തി. ഇന്ന് പാർട്ടികളിലും കല്യാണങ്ങളിലും എല്ലാവരും കോക്ടെയിലുകൾ കുടിക്കുമ്പോൾ ഞാൻ മോക്ടെയിലോ സോഡയോ മാത്രമാണ് കുടിക്കുന്നത്. അതിശയിപ്പിക്കുന്ന കാര്യം, എനിക്ക് മദ്യത്തിന്റെ കുറവ് ഒട്ടും അനുഭവപ്പെടുന്നില്ല എന്നതാണ്.
മദ്യം നിർത്താനുള്ള മറ്റൊരു കാരണം ഒരു ആരോഗ്യപ്രശ്നമായിരുന്നു. കഴിഞ്ഞ വർഷം, 24-ാം വയസ്സിൽ എനിക്ക് ‘ഗ്രേഡ് 2 ഫാറ്റി ലിവർ’ ഉള്ളതായി കണ്ടെത്തി. അത് എന്നെ ശരിക്കും ഭയപ്പെടുത്തി. മദ്യം മാത്രമല്ല അതിന് കാരണം എങ്കിലും എന്റെ ജീവിതരീതി മാറ്റാൻ ഞാൻ തീരുമാനിച്ചു. മദ്യം ഉപേക്ഷിച്ച് ആറ് മാസം കഴിഞ്ഞപ്പോൾ എന്റെ കരളിന്റെ ആരോഗ്യം സാധാരണ നിലയിലായി.
ശാരീരികമായും വലിയ മാറ്റങ്ങളുണ്ടായി. രണ്ട്-മൂന്ന് മാസം കഴിഞ്ഞപ്പോൾ എന്റെ ചർമ്മം കൂടുതൽ തിളക്കമുള്ളതും ആരോഗ്യമുള്ളതുമായി മാറി. വിലകൂടിയ ക്രീമുകളോ ചികിത്സകളോ ഇല്ലാതെ തന്നെ മുഖത്തെ ക്ഷീണം മാറി. രാവിലെകൾ കൂടുതൽ ഉന്മേഷമുള്ളതായി. നന്നായി ഉറങ്ങാനും വ്യായാമം ചെയ്യാനും കഴിഞ്ഞു. ഇതിലും വലിയ മാറ്റം മാനസികമായാണ് ഉണ്ടായത്. മദ്യം കഴിക്കാത്തതിനാൽ അടുത്ത ദിവസം ഓർത്ത് വിഷമിക്കേണ്ടി വന്നില്ല, ആരോടെങ്കിലും മോശമായി സംസാരിച്ചോ എന്ന ഭയമില്ലായിരുന്നു. ഞാൻ കൂടുതൽ ശാന്തനും ആത്മവിശ്വാസമുള്ളവളുമായി മാറി. മദ്യമില്ലാതെ തന്നെ സുഹൃത്തുക്കൾക്കും അനുഭവങ്ങൾക്കും സന്തോഷം തരാൻ കഴിയുമെന്ന് ഞാൻ തിരിച്ചറിഞ്ഞു.
ഇന്ന് പുതിയ തലമുറയിലെ (ജെൻ സി) ഒരുപാട് യുവാക്കൾ മദ്യപാനം കുറയ്ക്കുകയോ പൂർണ്ണമായി ഒഴിവാക്കുകയോ ചെയ്യുന്നുണ്ട്. മികച്ച മാനസികാരോഗ്യം, ഫിറ്റ്നസ്, സ്വന്തം ജീവിതത്തിന്മേലുള്ള നിയന്ത്രണം എന്നിവ ആഗ്രഹിക്കുന്ന അവർക്ക് മദ്യം ഉപേക്ഷിക്കുന്നത് ഒരു നഷ്ടമല്ല, മറിച്ച് അതൊരു മികച്ച ജീവിതശൈലിയാണ്.
വിദഗ്ദ്ധരായ ഡോക്ടർമാരുടെ അഭിപ്രായത്തിൽ, മദ്യം നിർത്തിക്കഴിഞ്ഞാൽ ഏതാനും ആഴ്ചകൾക്കുള്ളിൽ തന്നെ കരളിന്റെ ആരോഗ്യത്തിൽ വലിയ പുരോഗതി ഉണ്ടാകും. ശാരീരിക മാറ്റങ്ങൾക്കൊപ്പം ആളുകളുടെ മൂഡ് മെച്ചപ്പെടാനും, ശ്രദ്ധയും ഉൽപ്പാദനക്ഷമതയും കൂടാനും ഇത് സഹായിക്കും. പുതിയ തലമുറയിലെ യുവാക്കൾ വെറുതെ ഒരു ഫാഷന് വേണ്ടിയല്ല, മറിച്ച് മികച്ച ഉറക്കവും ആരോഗ്യവും ജീവിതനിയന്ത്രണവും ആഗ്രഹിച്ചാണ് മദ്യം വേണ്ടെന്ന് വെക്കുന്നത്.
ഈ ആറ് മാസത്തെ യാത്രയിൽ എനിക്ക് ഒന്നും നഷ്ടപ്പെട്ടിട്ടില്ല, പകരം നല്ല ആരോഗ്യവും തെളിഞ്ഞ ചർമ്മവും മികച്ച മാനസികാവസ്ഥയും മാത്രമാണ് ലഭിച്ചത്. ഭാവിയിൽ ഞാൻ വീണ്ടും കുടിക്കുമോ എന്ന് എനിക്കറിയില്ല. എങ്കിലും, കൈയിൽ എപ്പോഴും കോക്ടെയിൽ ഗ്ലാസുമായി നടന്നിരുന്ന ആ പഴയ പെൺകുട്ടി ഇന്ന് ഒരു ബാറിൽ മോക്ടെയിലുമായി പൂർണ്ണ സംതൃപ്തിയോടെ നിൽക്കുന്നത് കണ്ടാൽ അവൾ തന്നെ അത്ഭുതപ്പെടുമായിരുന്നു.’’
